സെഞ്ചൂറിയന്‍ : ദക്ഷിണാഫ്രിക്കയ്‌ക്കെതിരായ ഒന്നാം ക്രിക്കറ്റ് ടെസ്റ്റിലെ ബൗളര്‍മാരുടെ മോശം പ്രകടനത്തിന് പിന്നാലെ ഇന്ത്യന്‍ നായകന്‍ രോഹിത് ശര്‍മയ്‌ക്കെതിരെ വിമര്‍ശനവുമായി മുന്‍ പരിശീലകനും കമന്‍റേറ്ററുമായ രവി ശാസ്ത്രി (Ravi Shastri criticizes Rohit Sharma). സെഞ്ചൂറിയനിലെ രണ്ടാം ദിനത്തില്‍ ഉച്ചഭക്ഷണത്തിന് ശേഷമുള്ള സെഷനില്‍ രോഹിത് എടുത്ത തീരുമാനത്തിനെതിരെയാണ് രവി ശാസ്ത്രി അതൃപ്‌തി പ്രകടിപ്പിച്ചത്. ഇന്നലെ (ഡിസംബര്‍ 27) ഉച്ചഭക്ഷണത്തിന് പിരിയുമ്പോള്‍ ഒരു വിക്കറ്റ് നഷ്‌ടത്തില്‍ 49 റണ്‍സ് എന്ന നിലയിലായിരുന്നു ആതിഥേയരായ ദക്ഷിണാഫ്രിക്ക.
മത്സരത്തില്‍ സെഞ്ച്വറിയടിച്ച ഡീന്‍ എല്‍ഗാര്‍ 29 റണ്‍സുമായും 12 റണ്‍സ് നേടി ടോണി ഡി സോര്‍സിയുമായിരുന്നു ഉച്ചഭക്ഷണത്തിന് ശേഷം പ്രോട്ടീസ് ബാറ്റിങ്ങ് പുനരാരംഭിക്കുമ്പോള്‍ ക്രീസില്‍. മത്സരം പുനരാരംഭിച്ച സമയത്ത് ബൗളര്‍മാര്‍ക്ക് ഏറെ അനുകൂലമായിരുന്നു സെഞ്ചൂറിയനിലെ പിച്ച്. ഈ സമയത്ത് പ്രധാന ബൗളര്‍മാരായ ജസ്‌പ്രീത് ബുംറയേയും (Jasprit Bumrah) മുഹമ്മദ് സിറാജിനെയും (Mohammed Siraj) പന്തെറിയാന്‍ രോഹിത് കൊണ്ടുവന്നില്ല. പകരമായി ശര്‍ദുല്‍ താക്കൂര്‍ (Shardul Thakur), പ്രസിദ് കൃഷ്‌ണ (Prasidh Krishna) എന്നിവരെയാണ് ഇന്ത്യന്‍ നായകന്‍ പന്തേല്‍പ്പിച്ചത്.
ഈ തീരുമാനത്തിലൂടെ വലിയ മണ്ടത്തരമാണ് രോഹിത് ശര്‍മ കാണിച്ചതെന്ന് രവി ശാസ്ത്രി അഭിപ്രായപ്പെട്ടു. ഇന്ത്യയ്‌ക്ക് അനുകൂലമാകേണ്ടിയിരുന്ന സെഷനില്‍ നിന്നും ദക്ഷിണാഫ്രിക്കയെ രക്ഷപ്പെടുത്തുന്നതായിരുന്നു രോഹിതിന്‍റെ തീരുമാനമെന്നും ശാസ്ത്രി വ്യക്തമാക്കി. കമന്‍ററിക്കിടെ ആയിരുന്നു ഇന്ത്യന്‍ മുന്‍പരിശീലകന്‍റെ വിമര്‍ശനം.
ശര്‍ദുല്‍ താക്കൂറും പ്രസിദ് കൃഷ്‌ണയും പന്തെറിഞ്ഞ സമയത്ത് അനായാസമായിരുന്നു പ്രോട്ടീസ് ബാറ്റര്‍മാര്‍ റണ്‍സ് കണ്ടെത്തിയത്. ബുംറയും സിറാജും മടങ്ങിയെത്തിയതോടെ ഡി സോര്‍സി എല്‍ഗാര്‍ കൂട്ടുകെട്ട് പൊളിക്കാനും ഇന്ത്യന്‍ ബൗളര്‍മാര്‍ക്കായി. പിന്നാലെ ക്രീസിലെത്തിയ കീഗന്‍ പീറ്റേഴ്‌സണിനെയും അതിവേഗം മടക്കാന്‍ ഇന്ത്യയ്‌ക്ക് സാധിച്ചിരുന്നു.
അതേസമയം, ഡീന്‍ എല്‍ഗാറിന്‍റെ (Dean Elgar) സെഞ്ച്വറിക്കരുത്തില്‍ ഇന്ത്യയ്‌ക്കെതിരെ 11 റണ്‍സിന്‍റെ ഒന്നാം ഇന്നിങ്‌സ് ലീഡ് സ്വന്തമാക്കിയാണ് ദക്ഷിണാഫ്രിക്ക മത്സരത്തിന്‍റെ രണ്ടാം ദിനം കളി അവസാനിപ്പിച്ചത്. നിലവില്‍ അഞ്ച് വിക്കറ്റ് നഷ്‌ടത്തില്‍ 256 റണ്‍സ് എന്ന നിലയിലാണ് പ്രോട്ടീസ്. 140 റണ്‍സ് നേടിയ ഡീന്‍ എല്‍ഗാറും മൂന്ന് റണ്‍സുമായി മാര്‍കോ യാന്‍സനുമാണ് (Marco Jansen) ക്രീസില്‍ (South Africa vs India 1st Test Score Update).
Also Read : സെഞ്ചൂറിയനിലെ ബൗളിങ് പിഴവുകള്‍, ടീം ഇന്ത്യ ഷമിയെ 'മിസ്' ചെയ്യുന്നുവെന്ന് ദിനേശ് കാര്‍ത്തിക്
