ഇൻഡോര്‍: അഫ്‌ഗാനിസ്ഥാനെതിരായ രണ്ടാം ടി20യ്‌ക്കായി ടീം ഇന്ത്യ ഇറങ്ങുമ്പോള്‍ ക്രിക്കറ്റ് ലോകത്തിന്‍റെ പ്രധാന ശ്രദ്ധാകേന്ദ്രമാണ് രോഹിത് ശര്‍മ (Rohit Sharma). 14 മാസത്തെ ഇടവേള കഴിഞ്ഞ് അന്താരാഷ്‌ട്ര ടി20 ക്രിക്കറ്റിലേക്ക് തിരിച്ചെത്തിയ ഇന്ത്യന്‍ നായകന് കഴിഞ്ഞ മത്സരത്തില്‍ അക്കൗണ്ട് പോലും തുറക്കാനായിരുന്നില്ല. മൊഹാലിയില്‍ നേരിട്ട രണ്ടാം പന്തില്‍ വിക്കറ്റിന് ഇടയിലൂടെയുള്ള ഓട്ടത്തിലെ ആശയക്കുഴപ്പത്തിനിടെ താരം റണ്‍ഔട്ട് ആയി മടങ്ങുകയായിരുന്നു.
ഇതിന്‍റെ ക്ഷീണം മാറ്റാനുറച്ചായിരിക്കും രോഹിത് ശര്‍മ ഇന്‍ഡോറിലെ ഹോള്‍ക്കര്‍ സ്റ്റേഡിയത്തില്‍ ഇറങ്ങുന്നത്. ലോകകപ്പ് വരാനിരിക്കെ ഇന്ത്യന്‍ നായകന് ഇന്നത്തേത് ഉള്‍പ്പടെ ശേഷിക്കുന്ന മത്സരങ്ങളിലൂടെ ടി20യില്‍ താളം കണ്ടെത്തുമെന്ന പ്രതീക്ഷയിലാണ് ആരാധകര്‍. റണ്‍സ് ഒഴുകുമെന്ന് കരുതുന്ന ഇന്‍ഡോറില്‍ ഹിറ്റ്‌മാന്‍റെ ബാറ്റിങ്ങ് വെടിക്കെട്ട് തന്നെയാണ് ആരാധകരും കാത്തിരിക്കുന്നത്.
ഇന്‍ഡോറിലെ ഹോള്‍ക്കര്‍ സ്റ്റേഡിയത്തില്‍ തകര്‍പ്പന്‍ റെക്കോഡാണ് രോഹിത് ശര്‍മയുടെ പേരിലുള്ളത് (Rohit Sharma T20I Stats In Indore). അന്താരാഷ്‌ട്ര ടി20 ക്രിക്കറ്റില്‍ തന്‍റെ ഏറ്റവും ഉയര്‍ന്ന വ്യക്തിഗത സ്‌കോറായ 118 റണ്‍സ് രോഹിത് ശര്‍മ അടിച്ചെടുത്തത് ഇതേ ഗ്രൗണ്ടില്‍ വച്ചാണ്. 2017ല്‍ ശ്രീലങ്കയ്‌ക്കെതിരെ ആയിരുന്നു രോഹിതിന്‍റെ ആ ബാറ്റിങ് വെടിക്കെട്ട്.
രോഹിതിന്‍റെ സെഞ്ച്വറി കരുത്തില്‍ ഇന്ത്യ അന്ന് അഞ്ച് വിക്കറ്റ് നഷ്‌ടത്തില്‍ 260 റണ്‍സാണ് ഇന്‍ഡോറില്‍ അടിച്ച് കൂട്ടിയത്. ഇവിടുത്തെ ഏറ്റവും ഉയര്‍ന്ന ടീം ടോട്ടലും ഇതാണ്.
ആകെ മൂന്ന് ടി20 മത്സരങ്ങള്‍ക്കാണ് ഇന്‍ഡോര്‍ സ്റ്റേഡിയം ഇതുവരെ വേദിയായത്. ഈ മത്സരങ്ങളില്‍ നിന്നും ആകെ 64 സിക്‌സറുകള്‍ പിറന്നു. അതില്‍ തന്നെ കൂടുതല്‍ സിക്‌സര്‍ പായിച്ചതും രോഹിത് ശര്‍മയാണ്. രണ്ട് മത്സരങ്ങളില്‍ നിന്നായി പത്ത് പ്രാവശ്യമായിരുന്നു രോഹിത് ഇന്‍ഡോര്‍ ഗാലറിയിലേക്ക് പന്ത് എത്തിച്ചത്. കൂടാതെ, ഇവിടെ ഫോറുകള്‍ അടിച്ച താരവും രോഹിത് ശര്‍മയാണ്.
അതേസമയം, അഫ്‌ഗാനിസ്ഥാനെതിരായ രണ്ടാം ടി20യ്‌ക്ക് ഇറങ്ങുന്ന ടീം ഇന്ത്യ പരമ്പരയും നോട്ടമിടുന്നുണ്ട്. മൊഹാലിയില്‍ നടന്ന ആദ്യത്തെ കളിയില്‍ ആറ് വിക്കറ്റിന് ടീം ജയം സ്വന്തമാക്കിയിരുന്നു. ഇതോടെ, ഇന്ന് ജയിക്കാനായാല്‍ ടീമിന് മൂന്ന് മത്സരങ്ങളുടെ ടി20 പരമ്പര സ്വന്തമാക്കാം. പരമ്പരയിലെ ആദ്യ മത്സരം കളിച്ച ടീമില്‍ നിന്നും മാറ്റങ്ങളോടെയാകും ടീം ഇന്ത്യ ഇന്ന് ഇന്‍ഡോറില്‍ കളിക്കാനിറങ്ങുക (India vs Afghanistan 2nd T20I).
Read More : കോലി കളിക്കും, സഞ്ജു കാത്തിരിക്കും; ഇന്‍ഡോറില്‍ ഇന്ന് രണ്ടാം ടി20, ഇന്ത്യയുടെ ലക്ഷ്യം പരമ്പര
