മുംബൈ: ഇന്ത്യന്‍ മണ്ണില്‍ വീണ്ടുമൊരു ഇന്ത്യ-പാകിസ്ഥാന് പോരാട്ടം. ഏകദിന ലോകകപ്പിന്‍റെ ഭാഗമായി അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ ഒക്‌ടോബര്‍ 15-നാണ് ഈ ഗ്ലാമര്‍ പോര് അരങ്ങേറുക. ഏറെ നീണ്ട അനിശ്ചിതത്വങ്ങള്‍ക്ക് ഒടുവിലാണ് പാകിസ്ഥാന് ഇന്ത്യയിലേക്ക് ലോകകപ്പിന് എത്തുന്നത്. പന്തും ബോളും കൊണ്ടുള്ള പോരാട്ടത്തിനപ്പുറം ഇരു രാജ്യങ്ങളുടേയും ക്രിക്കറ്റില്‍ രാഷ്‌ട്രീയവും കൂടിക്കര്‍ന്നിട്ടുണ്ടെന്നതാണ് ഇതിന് പ്രധാന കാരണം.
ഈ വര്‍ഷം ഓഗസ്റ്റ്- സെപ്‌റ്റംബര്‍ മാസങ്ങളില്‍ പാകിസ്ഥാനില്‍ നിശ്ചയിച്ചിരുന്ന ഏഷ്യ കപ്പിനായി പാക് മണ്ണിലേക്ക് ഇന്ത്യന്‍ ടീമിനെ അയയ്‌ക്കില്ലെന്ന് ബിസിസിഐ നേരത്തെ തന്നെ നിലപാട് എടുത്തിരുന്നു. ഇതോടെ ലോകകപ്പിനായി ഇന്ത്യയിലേക്കില്ലെന്നായിരുന്നു പാകിസ്ഥാന് ക്രിക്കറ്റ് ബോര്‍ഡ് പറഞ്ഞിരുന്നത്. ബിസിസിഐയുടെ തീരുമാനം ഒരു ഘട്ടത്തില്‍ ഏഷ്യ കപ്പിന്‍റെ ആതിഥേയത്വം തന്നെ പാകിസ്ഥാന് നഷ്‌ടമാവുമെന്ന സ്ഥിതിയിലേക്ക് കാര്യങ്ങള്‍ എത്തിച്ചിരുന്നു.
ഒടുവില്‍ ഏറെ നീണ്ട ചര്‍ച്ചകള്‍ക്ക് ശേഷം ഏഷ്യ കപ്പ് പാകിസ്ഥാനും ശ്രീലങ്കയിലുമായി നടക്കുന്ന ഹൈബ്രിഡ് മോഡലിന് ഏഷ്യന്‍ ക്രിക്കറ്റ് കൗണ്‍സില്‍ അംഗീകാരം നല്‍കുകയായിരുന്നു. ഇതിന് പിന്നാലെ സര്‍ക്കാറിന്‍റെ അനുമതിയുണ്ടെങ്കില്‍ മാത്രമേ ഇന്ത്യയിലേക്ക് എത്തുവെന്ന് പാകിസ്ഥാന് ക്രിക്കറ്റ് ബോര്‍ഡ് അറിയിച്ചതോടെ ടീമിന്‍റെ പങ്കാളിത്തം വീണ്ടും ചോദ്യചിഹ്നമായി. ഇതിനിടെ ഐസിസി നല്‍കിയ ലോകകപ്പിന്‍റെ ഡ്രാഫ്‌റ്റ് ഷെഡ്യൂളിലും പാകിസ്ഥാന് ക്രിക്കറ്റ് ബോര്‍ഡ് മാറ്റങ്ങള്‍ ആവശ്യപ്പെട്ടതും ശ്രദ്ധേയമാണ്.
നോക്കൗട്ട് മത്സരങ്ങള്‍ അല്ലാതെ അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ കളിക്കില്ലെന്നായിരുന്നു പാക് ബോര്‍ഡ് ആദ്യം പറഞ്ഞത്. പിന്നീട് അഫ്‌ഗാനിസ്ഥാനെതിരെ ചെന്നൈയിലും ഓസ്‌ട്രേലിയയ്‌ക്ക് എതിരെ ബെംഗളൂരുവിലും നിശ്ചയിച്ചിരിക്കുന്ന മത്സരങ്ങളുടെ വേദികള്‍ തമ്മില്‍ പരസ്‌പരം മാറ്റണമെന്നും പാകിസ്ഥാന് ആവശ്യപ്പെട്ടു. സ്‌പിന്നിനെ പിന്തുണയ്‌ക്കുന്ന ചെന്നൈയില്‍ അഫ്‌ഗാനെയും ബാറ്റിങ് പറുദീസയായ ബെംഗളൂരുവില്‍ ഓസ്‌ട്രേലിയയേയും നേരിടുകയെന്ന് വെല്ലുവിളിയാണെന്ന വിലയിരുത്തലായിരുന്നു പാക് ടീമിന് ഇതിന് പ്രേരിപ്പിച്ചത്.
സുരക്ഷാ കാരണങ്ങള്‍ മാത്രമാണ് വേദി മാറ്റത്തിന് അനുമതി നല്‍കുകയെന്നിരിക്കെ മതിയായ കാരണങ്ങളില്ലാതെയുള്ള പാക് ടീമിന്‍റെ ആവശ്യം ഐസിസി തള്ളുകയായിരുന്നു. ലോകകപ്പിന്‍റെ ചരിത്രത്തില്‍ ഇതാദ്യമായാണ് തങ്ങളുടെ ശക്തിയ്‌ക്ക് അനുസരിച്ച് വേദി മാറ്റണമെന്ന് ആവശ്യപ്പെട്ട് ഒരു ടീം രംഗത്ത് എത്തുന്നത്. എന്നാല്‍ വീണ്ടും നടന്ന ചര്‍ച്ചകള്‍ക്ക് ഒടുവില്‍ ബിസിസിഐയും ഐസിസിയും നിശ്ചയിച്ചതുപോലെ തന്നെ കളിക്കാന്‍ തയ്യാറാണെന്ന് പാകിസ്ഥാന് അറിയിക്കുകയായിരുന്നു.
2012-ന് ശേഷം ഇതാദ്യമായാണ് പാകിസ്ഥാന് വീണ്ടും ഇന്ത്യന്‍ മണ്ണിലേക്ക് എത്തുന്നത്. രാഷ്‌ട്രീയത്തിനപ്പുറം ചിന്തിച്ചാല്‍ ലോകകപ്പില്‍ പാകിസ്ഥാന്‍റെ പങ്കാളിത്തം ടൂര്‍ണമെന്‍റിന്‍റെ മാറ്റുകൂട്ടുമെന്നുറപ്പ്. ഏകദിന ലോകകപ്പ് വേദിയില്‍ ഇതിന് മുൻപ് 1992, 1996, 1999, 2003, 2011, 2015, 2019 വര്‍ഷങ്ങളിലാണ് ഇന്ത്യയും പാകിസ്ഥാനും നേര്‍ക്കുനേര്‍ എത്തിയിട്ടുള്ളത്. ഇതില്‍ ഒരൊറ്റ തവണയും ഇന്ത്യയെ തോല്‍പ്പിക്കാന്‍ പാകിസ്ഥാന് കഴിഞ്ഞിട്ടില്ലെന്നതാണ് ചരിത്രം.
1992 മുതലുള്ള ചരിത്രമെടുത്താല്‍ 2007-ലെ ഏകദിന ലോകകപ്പില്‍ മാത്രമാണ് ഇന്ത്യ-പാക് പോരാട്ടം ഇല്ലാതെ പോയത്. അന്ന് ടൂര്‍ണമെന്‍റിന്‍റെ ആദ്യ റൗണ്ടില്‍ തന്നെ ഇരു ടീമുകളും പുറത്താവുകയായിരുന്നു. നിലവില്‍ ഐസിസി ടൂര്‍ണമെന്‍റുകളില്‍ മാത്രമാണ് അയര്‍ക്കാരായ രാജ്യങ്ങള്‍ തമ്മില്‍ മത്സരിക്കുന്നത്. കഴിഞ്ഞ ടി20 ലോകകപ്പിലായിരുന്നു ഇരു ടീമുകളും അവസാനമായി നേര്‍ക്കുനേര്‍ എത്തുന്നത്. അന്ന് പാകിസ്ഥാനെതിരെ ഇന്ത്യ ത്രില്ലര്‍ വിജയം പിടിച്ചിരുന്നു. ഇനി ആ തോല്‍ക്ക് കണക്ക് ചോദിക്കാന്‍ പാകിസ്ഥാനും ചരിത്രം ആവര്‍ത്തിക്കാന്‍ ഇന്ത്യയും ഇറങ്ങുമ്പോള്‍ അഹമ്മദാബാദില്‍ പോരാട്ടം കനക്കുമെന്ന് തന്നെ പ്രതീക്ഷിക്കാം.
ALSO READ: odi world cup 2023| ലോകകപ്പ് വരുന്നു, കാര്യവട്ടത്ത് സന്നാഹം: ഇന്ത്യ- പാക് പോരാട്ടം അഹമ്മദാബാദില്‍
