ഐപിഎൽ രണ്ടാം ക്വാളിഫയറിൽ ചെന്നൈ സൂപ്പർ കിങ്സ് ഇന്ന് ഡൽഹി ക്യാപിറ്റൽസിനെ നേരിടും. ഒന്നാം ക്വാളിഫയറിൽ മുംബൈ ഇന്ത്യൻസിനോട് പരാജയപ്പെട്ട് ചെന്നൈ ഇറങ്ങുമ്പോൾ എലിമിനേറ്ററിൽ സൺറൈസേഴ്സ് ഹൈദരാബാദിനെ കീഴടക്കിയ ആത്മവിശ്വാസവുമായാണ് ഡൽഹി എത്തുന്നത്. ഇന്ന് ജയിക്കുന്നവർ ഞായറാഴ്ച്ച നടക്കുന്ന ഫൈനലിൽ മുംബൈ ഇന്ത്യൻസിനെ നേരിടും.
ആദ്യ പ്ലേഓഫിൽ മുംബൈയോട് തോറ്റെങ്കിലും നിലവിലെ ചാമ്പ്യൻമാരായ ചെന്നൈയെ എഴുതി തള്ളാനാവില്ല. കഴിഞ്ഞ കളിയിൽ ബാറ്റ്സ്മാൻമാർ പരാജയപ്പെട്ടതാണ് ചെന്നൈക്ക് തിരിച്ചടിയായത്. ഓപ്പണിംഗിൽ ഫാഫ് ഡുപ്ലെസിസിന് പിന്തുണ നൽകാൻ ഷെയിൻ വാട്സണ് സാധിക്കുന്നില്ല. ബാറ്റിംഗിൽ അവസാന മത്സരങ്ങളിൽ തിളങ്ങിയ സുരേഷ് റെയ്നയും നിർണായക മത്സരത്തിൽ നിരാശപ്പെടുത്തിയത് ചെന്നൈക്ക് തലവേദനയാണ്. എന്നാൽ അമ്പാട്ടി റായുഡുവും ടീമിനെ ഒറ്റക്ക് ചുമരിലേറ്റുന്ന ധോണിയും ഫോമിലാണെന്നത് സിഎസ്കെയ്ക്ക് ആശ്വാസമാണ്. ബൗളിംഗിൽ സ്പിൻ നിരയാണ് ചെന്നൈയുടെ കരുത്ത്. ഇമ്രാൻ താഹിറും, ഹർഭജൻ സിങും മികച്ച രീതിയിൽ പന്തെറിയുമ്പോൾ രവീന്ദ്ര ജഡേജ ദീപക് ചാഹറും പിന്തുണ നൽകുന്നു. ബാറ്റിംഗ് നിര ഫോമിലേക്ക് ഉയർന്നാൽ ഇന്നത്തെ മത്സരത്തിൽ ജയിച്ച് ചെന്നൈക്ക് ജയിച്ച് ഫൈനലിൽ എത്താം.
മറുവശത്ത് ബാറ്റിംഗിലും ബൗളിംഗിലും ഡൽഹി ക്യാപിറ്റൽസ് അപാര ഫോമിലാണ്. കഴിഞ്ഞ മത്സരത്തിൽ ഹൈദരാബാദിനെ അവസാന ഓവറിൽ തോൽപ്പിച്ചതിന്‍റെ ആത്മവിശ്വാസത്തിലാണ് ഡൽഹി. പൃഥി ഷായും ശിഖർ ധവാനും ഓപ്പണിംഗിൽ ഭേദപ്പെട്ട തുടക്കം നൽകുമ്പോൾ പിന്നാലെയെത്തുന്ന ശ്രേയസ് അയ്യരും, റിഷഭ് പന്തും മികച്ച രീതിയിൽ ബാറ്റ് വീശുന്നു. അവസാന ഓവറുകളിൽ തകർത്തടിക്കാൻ കോളിൻ മൻറോയും ഡൽഹിയുടെ കരുത്താണ്. പരിക്കേറ്റിന്‍റെ പിടിയിലായ കഗിസോ റബാഡയുടെ അഭാവം ബൗളിംഗിൽ ഡൽഹിക്ക് തിരിച്ചടിയാണ്. എങ്കിലും ഇഷാന്ത് ശർമ്മയും കീമോ പോളും റൺസ് വഴങ്ങുന്നതിൽ പിശുക്ക് കാണിക്കുന്നത് ടീമിന് ആത്മവിശ്വാസം പകരുന്നു. സ്പിൻ നിരയിൽ അമിത് മിശ്രയും അക്സർ പട്ടേലും ഭേദപ്പെട്ട പ്രകടനമാണ് കാഴ്ച്ചവെക്കുന്നത്. ഇന്ന് ചെന്നൈക്കെതിരെ ജയിച്ചാൽ ഡൽഹി ടൂർണമെന്‍റിലെ ആദ്യ ഫൈനലിനാകും യോഗ്യത നേടുക.
സീസണിൽ രണ്ട് തവണ ഏറ്റുമുട്ടിയപ്പോഴും ചെന്നൈക്കായിരുന്നു ജയം. എന്നാൽ നിലവിലെ ഫോമിൽ ഡൽഹിക്കാണ് ഇന്ന് മുൻതൂക്കം. മത്സരം രാത്രി 7.30 ന് ഡൽഹി വാങ്കഡെ സ്റ്റേഡിയത്തിൽ.
