മുംബൈ: ഇന്ത്യൻ ക്യാപ്റ്റൻ രോഹിത് ശർമയ്‌ക്ക് തന്‍റെ നിലവാരത്തിന് അനുസരിച്ച് കളിക്കാനാവുന്നില്ലെന്ന് മുൻ താരം ഇർഫാൻ പഠാന്‍. വൈകാതെ തന്നെ താരത്തിന് തന്‍റെ ഫോമിലേക്ക് തിരികെയെത്താനാവുമെന്ന് പ്രതീക്ഷിക്കുന്നു. ഇത് ലോകകപ്പിന് ഒരുങ്ങുന്ന ഇന്ത്യയെ മികച്ച ടീമാക്കി മാറ്റുമെന്നും പഠാന്‍ പറഞ്ഞു.
"തീർച്ചയായും, തന്‍റെ നിലവാരത്തിന് അനുസരിച്ച് രോഹിത്തിന് കളിക്കാന്‍ കഴിയുന്നില്ല. അതല്‍പ്പം കുറഞ്ഞതായി തോന്നുന്നു. മികച്ച ബാറ്ററാണ് രോഹിത്. 2019 ലോകകപ്പിൽ അത്ഭുതകരമായി ബാറ്റ് ചെയ്ത അദ്ദേഹം അഞ്ച് സെഞ്ചുറികളാണ് നേടിയത്. രോഹിത് ഇക്കാര്യം ഓർക്കുകയും തന്‍റെ ഫോം വീണ്ടെടുക്കുകയും വേണം.
ഏകദിന ലോകകപ്പിന് തയ്യാറെടുക്കുന്ന ഈ സന്ദര്‍ഭത്തില്‍ രോഹിത്തിന്‍റെ ഫോം തിരികെ വന്നാല്‍ ഇന്ത്യയേക്കാള്‍ മികച്ച മറ്റൊരു ടീമുണ്ടാകില്ല. പ്രത്യേകിച്ചും ലോകകപ്പ് സ്വന്തം മണ്ണില്‍ നടക്കുന്ന സാഹചര്യത്തില്‍". ഇര്‍ഫാന്‍ പഠാന്‍ പറഞ്ഞു.
