മുംബൈ: ഏകദിന ലോകകപ്പ് 2023-ല്‍ ഇന്ത്യയ്‌ക്കായി വമ്പന്‍ പ്രകടനമാണ് പേസര്‍ മുഹമ്മദ് ഷമി (Mohammed Shami) നടത്തിയത്. ടീമിന്‍റെ ആദ്യ നാല് മത്സരങ്ങളിലും പുറത്തിരിക്കേണ്ടി വന്ന ഷമിയ്‌ക്ക് ഹാര്‍ദിക് പാണ്ഡ്യയ്ക്ക് പരിക്കേറ്റതാണ് പ്ലേയിങ് ഇലവനില്‍ ഇടം നല്‍കിയത്. തുടര്‍ന്ന് കളിച്ച ഏഴ്‌ മത്സരങ്ങളില്‍ നിന്നും 24 വിക്കറ്റ് വീഴ്‌ത്തിയ താരം ടൂര്‍ണമെന്‍റിലെ വിക്കറ്റ് വേട്ടക്കാരനമായും മാറി (Mohammed Shami in Cricket World Cup 2023).
ടൂർണമെന്‍റിലുടനീളം ഷമി ഉൾപ്പെടെയുള്ള ഇന്ത്യൻ ബൗളിങ്‌ യൂണിറ്റ് മികച്ച പ്രകടനമാണ് നടത്തിയത്. എന്നാൽ ഇന്ത്യന്‍ ബോളര്‍മാരുടെ പ്രകടനത്തിന് പിന്നില്‍ അവര്‍ക്ക് മാത്രമായി ഒരു പ്രത്യേക പന്ത് നൽകിയതിനാലാണ് എന്ന് പാകിസ്ഥാന്‍റെ മുന്‍ താരം ഹസൻ റാസ ആരോപിച്ചിരുന്നു. ഇപ്പോഴിതാ ഹസൻ റാസയ്‌ക്ക് മറുപടിയുമായി രംഗത്ത് എത്തിയിരിക്കുകയാണ് മുഹമ്മദ് ഷമി.(Mohammed Shami against Hasan Raza over controversial remarks during Cricket World Cup 2023).
ചില പാകിസ്ഥാന്‍ കളിക്കാര്‍ക്ക് ലോകകപ്പില്‍ തങ്ങളുടെ പ്രകടനം അത്ര ദഹിച്ചിട്ടില്ലെന്നാണ് ഷമി പറയുന്നത്. "ചില പാകിസ്ഥാൻ കളിക്കാർക്ക് ലോകകപ്പിലെ ഞങ്ങളുടെ പ്രകടനം ദഹിച്ചിട്ടില്ല. അവരുടെ മനസിലുള്ള വിചാരം അവര്‍ മികച്ചവരാണ് എന്നാണ്.
ഏറ്റവും പ്രാധാന്യമുള്ളപ്പോൾ മിന്നും പ്രകടനം നടത്തുന്നവരാണ് ഏറ്റവും മികച്ചത്. ഞങ്ങൾക്ക് വേറെ പന്ത് നൽകിയെന്ന് പറഞ്ഞ്, വിവാദങ്ങള്‍ സൃഷ്‌ടിക്കുകയാണ് അവര്‍ ചെയ്‌തത്. സ്വയം മെച്ചപ്പെടുക. ഒരു മുൻ കളിക്കാരൻ ഇങ്ങനെ സംസാരിക്കുമ്പോൾ, തീര്‍ച്ചയായും എല്ലാവരും അവനെ നോക്കി ചിരിക്കും"- മുഹമ്മദ് ഷമി പറഞ്ഞു.
ഏകദിന ലോകകപ്പിനിടെ താന്‍ നേടിയ റെക്കോഡുകളെക്കുറിച്ച് സോഷ്യൽ മീഡിയയിലൂടെയാണ് അറിഞ്ഞതെന്നും മുഹമ്മദ് ഷമി പ്രസ്‌തുത അഭിമുഖത്തില്‍ പറയുന്നുണ്ട്. "ടീമില്‍ എനിക്ക് ലഭിച്ച റോൾ ഭംഗിയായി തന്നെ നിർവഹിക്കുക എന്നതായിരുന്നു എന്‍റെ പ്രാഥമിക ലക്ഷ്യം. ടീമിന് നല്ലത് എന്താണെന്ന് മാത്രമാണ് ഞാൻ എപ്പോഴും ചിന്തിക്കുന്നത്.
ALSO READ: ഐസിസി നിയമം തിരിച്ചടിയായി ; കളി മതിയാക്കി ആദ്യ ട്രാൻസ്‌ജെൻഡർ ക്രിക്കറ്റര്‍ ഡാനിയേൽ മക്‌ഗഹേ
നിങ്ങൾക്ക് എല്ലായ്‌പ്പോഴും മികച്ച പ്രകടനം നടത്താൻ കഴിയില്ല. എന്നാല്‍ സാഹചര്യം നന്നായി മനസിലാക്കേണ്ടത് ഏറെ പ്രധാനമാണ്. ഇൻസ്റ്റാഗ്രാം തുറന്നപ്പോൾ മാത്രമാണ് തകർത്ത റെക്കോർഡുകളെ കുറിച്ച് ഞാന്‍ അറിഞ്ഞത്" - മുഹമ്മദ് ഷമി പറഞ്ഞു നിര്‍ത്തി.
അതേസമയം അപരാജിത കുതിപ്പുമായി ഏകദിന ലോകകപ്പ് ഫൈനലിലെത്താന്‍ ഇന്ത്യയ്‌ കഴിഞ്ഞിരുന്നു. എന്നാല്‍ കലാശപ്പോരില്‍ ഓസ്‌ട്രേലിയയ്‌ക്ക് എതിരെ ടീം തോല്‍വി വഴങ്ങി. അഹമ്മദാബാദിലെ നരേന്ദ്രമോദി സ്റ്റേഡിയത്തില്‍ നടന്ന മത്സരത്തില്‍ ആറ് വിക്കറ്റുകള്‍ക്കായിരുന്നു ആതിഥേയരുടെ തോല്‍വി.
ALSO READ: ഗില്ലും ശ്രേയസും കുല്‍ദീപും വേണ്ട ; ടി20 ലോകകപ്പ് നേടാന്‍ ഇവര്‍ മതിയെന്ന് എസ്‌ ശ്രീശാന്ത്
