മുംബൈ : അഫ്‌ഗാനിസ്ഥാനെതിരായ ആദ്യ ടി20യിലെ ഓള്‍റൗണ്ടിങ് മികവിന് ശിവം ദുബെയെ പുകഴ്‌ത്തി ഇന്ത്യയുടെ മുന്‍ സ്‌പിന്നര്‍ ഹര്‍ഭജന്‍ സിങ് (Harbhajan Singh on Shivam Dube). പേസ് ബോളിങ് ഓള്‍റൗണ്ടറെന്ന നിലയില്‍ ഇന്ത്യയ്‌ക്ക് ദീര്‍ഘകാലത്തേക്ക് ഉപയോഗിക്കാന്‍ കഴിയുന്ന താരമാണ് ദുബെയെന്നാണ് ഹര്‍ഭജന്‍ പറഞ്ഞിരിക്കുന്നത്. അഫ്‌ഗാനെതിരായ ബാക്കി മത്സരങ്ങളിൽ റൺസ് നേടിയാൽ ഇന്ത്യന്‍ ടീമില്‍ നിന്നും താരത്തെ മാറ്റി നിര്‍ത്തുന്നത് പ്രയാസകരമാവുമെന്നും ഹര്‍ഭജന്‍ സിങ് വ്യക്തമാക്കി.
തന്‍റെ യൂട്യൂബ് ചാനലില്‍ ഇതുസംബന്ധിച്ച് ഹര്‍ഭജന്‍ നടത്തിയ പ്രതികരണം ഇങ്ങനെ..."അഫ്‌ഗാനെതിരെ ശിവം ദുബെയിൽ ഞാൻ കണ്ട ഒരു പ്രധാന മാറ്റം അവന്‍റെ ബോളിങ്ങിലെ പേസ് ആയിരുന്നു. അവന്‍ തന്‍റെ ബോളിങ് കുറച്ചുകൂടി മെച്ചപ്പെടുത്തിയിട്ടുണ്ട്. അവന്‍റെ പേസ് തീർച്ചയായും മെച്ചപ്പെട്ടിട്ടുണ്ട്.
തന്‍റെ ഫിറ്റ്നസിലും അവന്‍ വ്യക്തമായി പ്രവർത്തിച്ചു. ഇന്ത്യ തിരയുന്ന ദീർഘകാല പേസ് ബോളിങ് ഓൾറൗണ്ടര്‍ അവനാകാം. ശേഷിക്കുന്ന മത്സരങ്ങളിലും ശിവം ദുബെ റൺസ് നേടിയാൽ ടീമില്‍ നിന്നും അവഗണിക്കുക പ്രയാസമായിരിക്കും" - ഹര്‍ഭജന്‍ സിങ് പറഞ്ഞു. മൊഹാലിയില്‍ നടന്ന അഫ്‌ഗാനെതിരായ ആദ്യ ടി20യില്‍ (India vs Afghanistan) ഇന്ത്യയുടെ വിജയ ശില്‍പ്പിയാണ് ശിവം ദുബെ.
പന്തെടുത്തപ്പോള്‍ രണ്ട് ഓവറുകളില്‍ ഒമ്പത് റണ്‍സ് മാത്രം വഴങ്ങി ഒരു വിക്കറ്റ് വീഴ്‌ത്തിയ ദുബെ, ബാറ്റുകൊണ്ട് അപരാജിത അര്‍ധ സെഞ്ചുറി നേടിയാണ് തിളങ്ങിയത്. 40 പന്തുകളില്‍ അഞ്ച് ബൗണ്ടറികളും രണ്ട് സിക്‌സറും സഹിതം പുറത്താവാതെ 60 റണ്‍സായിരുന്നു താരം നേടിയത്. പ്രസ്‌തുത പ്രകടനത്തിന് മത്സരത്തിലെ താരമായും 30-കാരന്‍ തെരഞ്ഞെടുക്കപ്പെട്ടു.
മത്സരത്തില്‍ ഇന്ത്യ ആറ് വിക്കറ്റുകള്‍ക്ക് വിജയം നേടുകയും ചെയ്‌തിരുന്നു. ടോസ് നഷ്‌ടപ്പെട്ട് ആദ്യം ബാറ്റ് ചെയ്‌ത അഫ്‌ഗാന്‍ നിശ്ചിത 20 ഓവറില്‍ അഞ്ച് വിക്കറ്റ് നഷ്‌ടത്തില്‍ 158 റണ്‍സായിരുന്നു നേടിയിരുന്നത്. മറുപടിക്ക് ഇറങ്ങിയ ഇന്ത്യ 17.3 ഓവറില്‍ നാല് വിക്കറ്റ് നഷ്‌ടത്തില്‍ 158 റണ്‍സെടുത്ത് വിജയം ഉറപ്പിക്കുകയായിരുന്നു.
അതേസമയം ഹാര്‍ദിക് പാണ്ഡ്യയാണ് നിലവില്‍ ഇന്ത്യയുടെ പേസ് ബോളിങ് ഓള്‍റൗണ്ടര്‍. 2023-ലെ ഏകദിന ലോകകപ്പിനിടെ പരിക്കേറ്റ ഹാര്‍ദിക് നിലവില്‍ തിരിച്ചുവരവിന്‍റെ പാതയിലാണ്. ഐപിഎല്ലില്‍ താരം കളിക്കുമെന്നാണ് നിലവില്‍ പ്രതീക്ഷിക്കപ്പെടുന്നത്. ഐപിഎല്ലിന് തൊട്ടുപിന്നാലെ ടി20 ലോകകപ്പും നടക്കുന്നുണ്ട്. ജൂണ്‍ ഒന്ന് മുതല്‍ അമേരിക്കയിലും വെസ്റ്റ് ഇന്‍ഡീസിലുമായാണ് ടി20 ലോകകപ്പ് അരങ്ങേറുന്നത്.
ALSO READ: "ഗാലറി ഞങ്ങള്‍ക്ക് എതിരായിരുന്നു"; ലോകകപ്പിലെ ഇന്ത്യയ്‌ക്കെതിരായ മത്സരത്തെ കുറിച്ച് മിക്കി ആര്‍തര്‍
ടി20 ലോകകപ്പിന് മുമ്പ് ഫോര്‍മാറ്റില്‍ ഇന്ത്യ കളിക്കുന്ന അവസാന അന്താരാഷ്‌ട്ര പരമ്പരയാണ് അഫ്‌ഗാനിസ്ഥാനെതിരായത്. മൂന്ന് ടി20 മത്സരങ്ങളാണ് ഇന്ത്യ-അഫ്‌ഗാന്‍ പരമ്പരയിലുള്ളത്. പരമ്പരയിലും പിന്നീട് നടക്കുന്ന ഐപിഎല്ലിലും തിളങ്ങാന്‍ കഴിഞ്ഞാല്‍ ദുബെയ്‌ക്ക് ടി20 ലോകകപ്പ് ടീമിലേക്ക് വിളിയെത്തിയേക്കും.
ALSO READ: 'ഞാന്‍ അങ്ങിനെ പറഞ്ഞിട്ടേയില്ല'; പാകിസ്ഥാനെതിരെ മോശം പരാമര്‍ശം നടത്തിയിട്ടില്ലെന്ന് ഗില്‍ക്രിസ്റ്റ്
