അഹമ്മദാബാദ്: ഇന്ത്യന്‍ ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍, വിരാട് കോലി എന്നിവര്‍ക്കൊപ്പം യുവ ബാറ്റര്‍ ശുഭ്‌മാന്‍ ഗില്ലിനെ താരതമ്യം ചെയ്യുന്നത് അന്യായമെന്ന് ഗുജറാത്ത് ടൈറ്റന്‍സ് മെന്‍റര്‍ ഗാരി കിര്‍സ്റ്റണ്‍. ഐപിഎല്ലിലെ തകര്‍പ്പന്‍ പ്രകടനത്തിന് പിന്നാലെ ഗില്ലിനെ സച്ചിനും കോലിയുമായി താരതമ്യപ്പെടുത്തി നിരവധി പ്രമുഖര്‍ രംഗത്തെത്തിയിരുന്നു. ഇതിനിടെയാണ് മുന്‍ ഇന്ത്യന്‍ പരിശീലകന്‍ കൂടിയായ ഗാരി കിര്‍സ്റ്റണിന്‍റെ പ്രതികരണം.
അടുത്തിടെ അവസാനിച്ച ഐപിഎല്ലില്‍ മിന്നും ഫോമിലായിരുന്നു ഗുജറാത്ത് ടൈറ്റന്‍സ് താരമായ ശുഭ്‌മാന്‍ ഗില്‍ ബാറ്റ് വീശിയത്. ഈ സീസണില്‍ ഐപിഎല്‍ ഫൈനല്‍ വരെയെത്തിയ ഗുജറാത്തിനായി ഗില്‍ 16 മത്സരങ്ങളില്‍ നിന്നും 59.33 ശരാശരിയില്‍ 890 റണ്‍സാണ് നേടിയത്. സീസണിലെ റണ്‍വേട്ടക്കാരുടെ പട്ടികയില്‍ ഒന്നാം സ്ഥാനക്കാരനായ താരമായിരുന്നു ഓറഞ്ച് ക്യാപ്പ് സ്വന്തമാക്കിയതും.
'ലോകത്തിലെ ഏറ്റവും മികച്ച കളിക്കാരിൽ ഒരാളാകാൻ അസാമാന്യമായ വൈദഗ്ധ്യവും നിശ്ചയദാർഢ്യവുമുള്ള ഒരു യുവ കളിക്കാരനാണ് ശുഭ്‌മാന്‍ ഗില്‍. കരിയറിന്‍റെ തുടക്കത്തില്‍ തന്നെ അവനെ സച്ചിനോടും വിരാടിനോടും താരതമ്യപ്പെടുത്തുന്നത് അന്യായമായ കാര്യമാണ്. അവന്‍ ഭാവിയില്‍ മൂന്ന് ഫോര്‍മാറ്റിലും ഇന്ത്യയുടെ താരമായി മാറുമെന്ന് തന്നെയാണ് ഞാന്‍ വിശ്വസിക്കുന്നത്.
ടി20 ക്രിക്കറ്റില്‍ വേഗത്തില്‍ വികസിക്കുന്നതുകൊണ്ട് തന്നെ അത് പലര്‍ക്കും മനസിലാക്കാന്‍ സാധിക്കുന്നില്ല', ഗാരി കിര്‍സ്റ്റണ്‍ വ്യക്തമാക്കി. ഐപിഎല്ലിലും അന്താരാഷ്‌ട്ര ക്രിക്കറ്റിലും മികവ് തുടരുന്ന ഗില്ലിനെ പ്രശംസിക്കാനും ഗുജറാത്ത് ടൈറ്റന്‍സ് ഉപദേഷ്‌ടാവ് മറന്നില്ല. ഐപിഎല്‍ പതിനാറാം പതിപ്പില്‍ തന്‍റെ കഴിവ് എന്താണെന്ന് മനസിലാക്കിയാണ് ഗില്‍ ബാറ്റ് ചെയ്‌തതെന്നും കിര്‍സ്റ്റണ്‍ പറഞ്ഞു.
'ഒന്ന്, കഴിവുകള്‍ എന്താണെന്ന് മനസിലാക്കാനുള്ള അവന്‍റെ ശേഷിയും ആത്മവിശ്വാസവും. രണ്ട്, ഒരു മത്സരത്തിനായി അവന്‍ നടത്തുന്ന തയ്യാറെടുപ്പുകള്‍ പ്രൊഫഷണലായിട്ടുള്ളതാണ്. അവസാനത്തേതാണ് തന്‍റെ കഴിവുകള്‍ക്ക് അനുസരിച്ച് എങ്ങനെയുള്ള പ്രകടനമാണ് നടത്തേണ്ടതെന്ന അറിവ്. ഈ സീസണില്‍ തന്‍റെ ശക്തി മനസിലാക്കി അത് എങ്ങനെ എപ്പോള്‍ ഉപയോഗിക്കണമെന്നെല്ലാം അവന്‍ ബാറ്റുകൊണ്ട് കാണിച്ചു തന്നു', ഗാരി കിര്‍സ്റ്റണ്‍ കൂട്ടിച്ചേര്‍ത്തു.
നിലവില്‍, ലോക ടെസ്റ്റ് ചാമ്പ്യന്‍ഷിപ്പ് ഫൈനലില്‍ പങ്കെടുക്കാനുള്ള ഇന്ത്യന്‍ ടീമിനൊപ്പം ഇംഗ്ലണ്ടിലാണ് ശുഭ്‌മാന്‍ ഗില്‍. ഐപിഎല്‍ ഫൈനല്‍ മത്സരം പൂര്‍ത്തിയായതിന് പിന്നാലെയായിരുന്നു ഗില്‍ ഇംഗ്ലണ്ടിലുള്ള ഇന്ത്യന്‍ ടീമിനൊപ്പം ചേര്‍ന്നത്. ഓസ്‌ട്രേലിയക്കെതിരായ കലാശപ്പോരാട്ടത്തില്‍ ഗില്ലിന്‍റെ ബാറ്റിങ് പ്രതീക്ഷയോടെയാണ് ആരാധകര്‍ ഉറ്റുനോക്കുന്നത്.
പരിചയസമ്പന്നനായ കെഎല്‍ രാഹുല്‍ പരിക്കേറ്റ് പുറത്തായ സാഹചര്യത്തില്‍ നായകന്‍ രോഹിത് ശര്‍മ്മയ്‌ക്കൊപ്പം ശുഭ്‌മാന്‍ ഗില്‍ ആയിരിക്കും ഇന്ത്യയുടെ ഇന്നിങ്‌സ് ഓപ്പണ്‍ ചെയ്യുക. ടെസ്റ്റില്‍ ഇതുവരെ 15 മത്സരങ്ങളിലാണ് 23കാരനായ ഗില്‍ ഇന്ത്യയുടെ വെള്ള ജഴ്‌സിയണിഞ്ഞ് കളിക്കാനിറങ്ങിയിട്ടുള്ളത്.
28 ഇന്നിങ്‌സില്‍ നിന്നും 34.23 ശരാശരിയില്‍ 890 റണ്‍സാണ് താരം ഇതുവരെ നേടിയത്. 128 ആണ് ടെസ്റ്റില്‍ ഗില്ലിന്‍റെ ഉയര്‍ന്ന വ്യക്തിഗത സ്‌കോര്‍. ഓസ്‌ട്രേലിയക്കെതിരെ അവസാനമായി കളിച്ച ടെസ്റ്റ് മത്സരത്തിലാണ് ഗില്‍ ഈ സ്‌കോര്‍ സ്വന്തമാക്കിയത്.
