ന്യൂഡല്‍ഹി: സമകാലിക ക്രിക്കറ്റിലെ മികച്ച ബാറ്റ്സ്മാന് വിരാട് കോലിയാണെന്ന് മുന്‍ ഓസ്‌ട്രേലിയന്‍ ക്രിക്കറ്റർ ഇയാൻ ചാപ്പൽ. ക്രിക്കറ്റിന്‍റെ എല്ലാ ഫോർമാറ്റിലും മികച്ച ബാറ്റ്സ്മാന് ഇന്ത്യന്‍ നായകന്‍ കോലിയാണ്. കോപ്പിബുക്ക് ക്രിക്കറ്റ് ഷോട്ടുകൾ കളിക്കുന്നതിൽ അദ്ദേഹത്തിന് പ്രത്യേക അഭിരുചിയാണ് ഉള്ളത്. ക്രിക്കറ്റിന്‍റെ മൂന്ന് ഫോർമാറ്റിലും കോലിയുടെ റെക്കോഡുകൾ അവിശ്വസനീയമാണ്. പ്രത്യേകിച്ച് നിശ്ചിത ഓവർ ക്രിക്കറ്റില്‍. സമകാലികനായ ഓസ്‌ട്രേലിയന്‍ ബാറ്റ്സ്മാന് സ്‌റ്റീവ് സ്‌മിത്ത് ഒരു മേഖലയിലും കോലിക്ക് ഒപ്പമെത്തില്ലെന്നും ചാപ്പൽ പറഞ്ഞു.
വെസ്റ്റ്ഇന്‍ഡീസ് ഇതിഹാസ താരം വിവിയന്‍ റിച്ചാർഡുമായി കോലിയെ താരതമ്യം ചെയ്യാനും ചാപ്പല്‍ മടി കാണിച്ചില്ല. ഇരുവരും കോപ്പി ബുക്ക് ഷോട്ടുകൾ കളിക്കാന്‍ മിടുക്കരാണ്. പന്ത് മികച്ച രീതിയില്‍ പ്ലേസ് ചെയ്യുന്നതിലൂടെ സ്‌കോർ വേഗത്തില്‍ ഉയർത്താനും ഇരുവരും ശ്രമിക്കും. കോലിയുടെ ക്യാപ്‌റ്റന്‍സിയെയും അദ്ദേഹം പ്രശംസിച്ചു. തോല്‍വിയെ ഭയപ്പെടാത്ത നായകനാണ് കോലി. ഒരു മത്സരം ജയിക്കാനായി ശ്രമിക്കുന്നതിനിടെ തോല്‍വിയെ അഭിമുഖീകരിക്കാനും അദ്ദേഹം തയാറാണെന്നും ചാപ്പല്‍ പറഞ്ഞു.
മുൻ ഇംഗ്ലണ്ട് ബാറ്റ്സ്മാന് കെവിൻ പീറ്റേഴ്‌സൺ ആധുനിക ക്രിക്കറ്റിലെ മികച്ച ബാറ്റ്സ്‌മാനാണ് കോലിയെന്ന് അഭിപ്രായം പ്രകടിപ്പിച്ചതിന് പിന്നാലെയാണ് ചാപ്പലും രംഗത്ത് വന്നത്. 70 അന്താരാഷ്‌ട്ര സെഞ്ച്വറികളാണ് കോലിയുടെ പേരിലുള്ളത്. 20,000ത്തിലധികം അന്താരാഷ്‌ട്ര റണ്‍സുകളും കോലി സ്വന്തമാക്കി.
