കൊളംബോ: ഏഷ്യ കപ്പ് (Asia Cup 2023) ക്രിക്കറ്റിന്‍റെ ഫൈനലില്‍ ലങ്കാദഹനം നടത്തിയ ഇന്ത്യ ചാമ്പ്യന്മാര്‍. കൊളംബോയിലെ ആര്‍ പ്രേമദാസ സ്റ്റേഡിയത്തില്‍ നടന്ന മത്സരത്തില്‍ 10 വിക്കറ്റുകള്‍ക്കാണ് ഇന്ത്യ ശ്രീലങ്കയെ തോല്‍പ്പിച്ചത്. ഏഷ്യ കപ്പില്‍ ഇന്ത്യയുടെ എട്ടാം കിരീടമാണിത്. ആദ്യം ബാറ്റ് ചെയ്യാന്‍ ഇറങ്ങിയ ശ്രീലങ്ക ഉയര്‍ത്തിയ 51 റണ്‍സിന്‍റെ വിജയ ലക്ഷ്യം 6.1 ഓവറിലാണ് ഇന്ത്യ നേടിയെടുത്തത്.
ചെറിയ ലക്ഷ്യത്തിലേക്ക് ബാറ്റ് വീശിയ ഇന്ത്യ അനായാസം തന്നെ വിജയത്തിലേക്ക് എത്തുകയായിരുന്നു. ഓപ്പണര്‍മാരായ ഇഷാന്‍ കിഷന്‍ (17 പന്തില്‍ 22), ശുഭ്‌മാന്‍ ഗില്‍ (19 പന്തില്‍ 27) എന്നിവര്‍ പുറത്താവാതെ നിന്നു. ആറ് ബൗണ്ടറികളടങ്ങിയതാണ് ശുഭ്‌മാന്‍ ഗില്ലിന്‍റെ ഇന്നിങ്‌സ്. മൂന്ന് ഫോറുകളാണ് ഇഷാന്‍ കിഷന്‍റെ അക്കൗണ്ടിലുള്ളത്.
നേരത്തെ ടോസ് നേടി ബാറ്റ് ചെയ്യാന്‍ ഇറങ്ങിയ ശ്രീലങ്കയെ 15.2 ഓവറില്‍ 50 റണ്‍സിന് ഇന്ത്യ എറിഞ്ഞിടുകയായിരുന്നു. ഏകദിനത്തില്‍ ശ്രീലങ്കയുടെ രണ്ടാമത്തെ ഏറ്റവും കുറഞ്ഞ ടോട്ടലാണിത്. ആറ് വിക്കറ്റുകള്‍ വീഴ്‌ത്തിക്കൊണ്ട് മുഹമ്മദ് സിറാജാണ് ലങ്കയെ പൊളിച്ചടുക്കിയത്.
ഹാര്‍ദിക് പാണ്ഡ്യ മൂന്ന് വിക്കറ്റുകള്‍ നേടിയപ്പോള്‍ ജസ്പ്രീത് ബുംറ ഒരു വിക്കറ്റ് സ്വന്തമാക്കി. 34 പന്തില്‍ 17 റണ്‍സെടുത്ത കുശാല്‍ മെൻഡിസാണ് ലങ്കയുടെ ടോപ് സ്‌കോറര്‍. മഴയെത്തുടര്‍ന്ന് അല്‍പം വൈകി ആരംഭിച്ച മത്സരത്തിന്‍റെ ആദ്യ ഓവറിലെ മൂന്നാം പന്തില്‍ കുശാല്‍ പെരേരയെ (2 പന്തില്‍ 0) പുറത്താക്കി ജസ്പ്രീത് ബുംറയാണ് വിക്കറ്റ് വേട്ടയ്‌ക്ക് തുടക്കമിട്ടത്.
പിന്നീട് സിറാജിന്‍റെ അഴിഞ്ഞാട്ടമാണ് കാണാന്‍ കഴിഞ്ഞത്. തന്‍റെ ആദ്യ ഓവര്‍ മെയ്‌ഡനാക്കിയ സിറാജ് രണ്ടാം ഓവറില്‍ നാല് വിക്കറ്റുകളായിരുന്നു വീഴ്‌ത്തിയത്. ആദ്യ പന്തില്‍ പാത്തും നിസ്സാങ്ക (4 പന്തില്‍ 2) ജഡേജയുടെ കയ്യില്‍ അവസാനിച്ചു. മൂന്നാം പന്തില്‍ സദീര സമരവിക്രമയും (2 പന്തില്‍ 0) നാലാം പന്തില്‍ ചരിത് അസലങ്കയും (1 പന്തില്‍ 0) ഡഗൗട്ടിലേക്ക് തിരികെ മടങ്ങി.
സദീരയെ വിക്കറ്റിന് മുന്നില്‍ കുരുക്കിയ സിറാജ് അസലങ്കയെ ഇഷാന്‍റെ കയ്യില്‍ എത്തിക്കുകയായിരുന്നു. തുടര്‍ന്നെത്തിയ ധനഞ്ജയ ഡി സിൽവ (2 പന്തില്‍ 4) ബൗണ്ടറി നേടിത്തുടങ്ങി. എന്നാല്‍ തൊട്ടടുത്ത പന്തില്‍ കെഎല്‍ രാഹുലിന്‍റെ കയ്യില്‍ അവസാനിച്ചു. ജസ്പ്രീത് ബുംറ എറിഞ്ഞ അഞ്ചാം ഓവറില്‍ റണ്‍സ് നേടിയില്ലെങ്കിലും വിക്കറ്റ് നഷ്‌ടപ്പെടുത്താതിരിക്കാന്‍ ലങ്കയ്‌ക്ക് കഴിഞ്ഞിരുന്നു.
എന്നാല്‍ വീണ്ടും പന്തെടുത്ത സിറാജ് ടീമിന് കടുത്ത പ്രഹരം നല്‍കി. പ്രതീക്ഷയായിരുന്ന ക്യാപ്റ്റന്‍ ദാസുന്‍ ഷനകയെ (4 പന്തില്‍ 0) ഇരയാക്കിയ സിറാജ് അഞ്ച് വിക്കറ്റ് നേട്ടം പൂര്‍ത്തിയാക്കുകയായിരുന്നു. പിന്നാലെ കുശാല്‍ മെൻഡിസിനെയും (34 പന്തില്‍ 17) താരം ബൗള്‍ഡാക്കി.
സിറാജ് നിര്‍ത്തിയതോടെയാണ് ഹാര്‍ദിക്ക് തുടങ്ങിയത്. ദുനിത് വെല്ലലഗെ (21 പന്തില്‍ 8), പ്രമോദ് മധുഷൻ (6 പന്തില്‍ 1), മതീഷ പതിരണ (1 പന്തില്‍ 0) എന്നിവര്‍ ഹാര്‍ദിക്കിന് മുന്നിലാണ് വീണത്. ദുഷൻ ഹേമന്ത (15 പന്തുകളില്‍ 13) പുറത്താവാതെ നിന്നു.
ഇന്ത്യ (പ്ലേയിങ് ഇലവൻ) India Playing XI against Sri Lanka: രോഹിത് ശർമ (ക്യാപ്റ്റന്‍), ശുഭ്‌മാൻ ഗിൽ, വിരാട് കോലി, കെഎൽ രാഹുൽ (വിക്കറ്റ് കീപ്പര്‍), ഇഷാൻ കിഷൻ, ഹാർദിക് പാണ്ഡ്യ, രവീന്ദ്ര ജഡേജ, വാഷിങ്‌ടൺ സുന്ദർ, ജസ്പ്രീത് ബുംറ, കുൽദീപ് യാദവ്, മുഹമ്മദ് സിറാജ്.
ശ്രീലങ്ക (പ്ലേയിങ് ഇലവൻ) Sri Lanka Playing XI against India: പാത്തും നിസ്സാങ്ക, കുശാല്‍ പെരേര, കുശാല്‍ മെൻഡിസ് (വിക്കറ്റ് കീപ്പര്‍), സദീര സമരവിക്രമ, ചരിത് അസലങ്ക, ധനഞ്ജയ ഡി സിൽവ, ദസുൻ ഷനക(ക്യാപ്റ്റന്‍), ദുനിത് വെല്ലലഗെ, ദുഷൻ ഹേമന്ത, പ്രമോദ് മധുഷൻ, മതീഷ പതിരണ.
