വിലയേറിയ സംഭാവനകളെക്കുറിച്ച് മിണ്ടുന്നില്ല, സെഞ്ചുറികളെ കുറിച്ച് മാത്രം ചിന്തിക്കുന്നതാണ് പ്രശ്‌നം; കോലിക്ക് പിന്തുണയുമായി യുസ്‌വേന്ദ്ര ചാഹല്‍

വിരാട് കോലി സമീപകാലത്തും ടീമിന് വിലയേറിയ നിരവധി സംഭാവനകള്‍ നല്‍കിയിട്ടുണ്ടെന്ന് സ്‌പിന്നര്‍ യുസ്‌വേന്ദ്ര ചാഹല്‍.

മുംബൈ: അന്താരാഷ്‌ട്ര കരിയറില്‍ ഏറ്റവും മോശം അവസ്ഥയിലൂടെ കടന്ന് പോകുന്ന ഇന്ത്യയുടെ സ്‌റ്റാര്‍ ബാറ്റര്‍ വിരാട് കോലിക്ക് പിന്തുണയുമായി ലെഗ്‌ സ്‌പിന്നര്‍ യുസ്‌വേന്ദ്ര ചാഹല്‍. സെഞ്ചുറി നേടാനായില്ലെങ്കിലും ഈ കാലയളവിൽ വിലയേറിയ നിരവധി സംഭാവനകൾ കോലി ടീമിന് നല്‍കിയിട്ടുണ്ടെന്നാണ് ചാഹല്‍ പറയുന്നത്. നമ്മള്‍ കോലിയുടെ സെഞ്ചുറികളെക്കുറിച്ച് മാത്രം ചിന്തിക്കുന്നതാണ് പ്രശ്‌നമെന്നും ചാഹല്‍ പറഞ്ഞു.

"അന്താരാഷ്‌ട്ര ടി20യില്‍ അന്‍പതിന് മുകളില്‍ ശരാശരിയും, രണ്ട് ടി20 ലോകകപ്പുകളിൽ ടൂർണമെന്റിലെ മാൻ ഓഫ് ദി ടൂർണമെന്‍റും നേടിയ മറ്റാരെങ്കിലുമുണ്ടോ?, അദ്ദേഹം എല്ലാ ഫോർമാറ്റുകളിലുമായി 70 സെഞ്ചുറികൾ നേടിയിട്ടുണ്ട്. എല്ലാ ഫോർമാറ്റുകളിലും അദ്ദേഹത്തിന്‍റെ ശരാശരി മാത്രം നോക്കിയാല്‍ മതി,

നമ്മള്‍ സെഞ്ചുറികളെക്കുറിച്ച് മാത്രം ചിന്തിക്കുന്നതാണ് പ്രശ്നം. നമ്മള്‍ അദ്ദേഹത്തിന്‍റെ വിലയേറിയ സംഭാവനകളായ 60-70 റണ്‍സുകളെക്കുറിച്ച് സംസാരിക്കുന്നില്ല. അതിന്‍റെ കാരണം അദ്ദേഹം നിശ്ചയിച്ചിട്ടുള്ള മാനദണ്ഡങ്ങളാവാം" ചാഹല്‍ പറഞ്ഞു.

കോലിക്കെതിരെ ലോകത്തെ ഒരു ബോളറും പന്തെറിയാന്‍ ആഗ്രഹിക്കുന്നില്ലെന്നും ചാഹല്‍ പറഞ്ഞു. “ടീം 15-20 റൺസ് പിന്നിലാണെങ്കിലും, അവൻ ക്രീസിലുണ്ടെങ്കിൽ ഒരു ബോളറും എതിരെപന്തെറിയാൻ ആഗ്രഹിക്കുന്നില്ല” ചാഹല്‍ വ്യക്തമാക്കി.

എല്ലാവര്‍ക്കു കീഴിലും റോള്‍ ഒന്ന്: രോഹിത്തിന്‍റെയും കോലിയുടേയും ക്യാപ്റ്റന്‍സിക്ക് കീഴില്‍ തന്‍റെ റോള്‍ ഒന്നായിരുന്നുവെന്നും ചാഹല്‍ കൂട്ടിച്ചേര്‍ത്തു. "വ്യത്യസ്‌ത ക്യാപ്റ്റൻമാരുടെ കീഴിലും എന്‍റെ റോൾ എല്ലായ്‌പ്പോഴും ഒരുപോലെയാണ്, അവർ എന്നെ ഒരു വിക്കറ്റ് വീഴ്ത്തുന്ന ബൗളറായി എപ്പോഴും ഉപയോഗിക്കുന്നു. എന്നെ സംബന്ധിച്ചിടത്തോളം അവരെല്ലാം ഒരുപോലെയാണ്. ഒരു ബൗളർ എന്ന നിലയിൽ എനിക്ക് സ്വാതന്ത്ര്യം ലഭിച്ചു. ഞാന്‍ ചെയ്യാന്‍ ആഗ്രഹിക്കുന്നതിനെ അവര്‍ പിന്തുണച്ചു". ചാഹൽ പറഞ്ഞു.

ഇന്ത്യയുടെ റണ്‍ മെഷീനായി വിലയിരുത്തപ്പെട്ട കോലിയുടെ അവസാന അന്താരാഷ്‌ട്ര സെഞ്ചുറി പിറന്നത് 2019ലാണ്. ഇതിന് ശേഷം 78 ഇന്നിങ്‌സുകള്‍ കളിച്ച താരത്തിന് മൂന്നക്കം തൊടാനായിട്ടില്ല. അടുത്തിടെ സമാപിച്ച ഇംഗ്ലണ്ട് പര്യടനത്തിലെ ആറ് ഇന്നിങ്‌സുകളില്‍ വെറും 76 റണ്‍സ് മാത്രമാണ് കോലിക്ക് നേടാനായത്.

ഇതിന് പിന്നാലെ വിശ്രമം അനുവദിച്ച താരം നിലവില്‍ ഏഷ്യ കപ്പിന്‍റെ ഒരുക്കത്തിലാണ്. ഓഗസ്റ്റ് 27ന് യുഎഇയിലാണ് ഏഷ്യ കപ്പ് ആരംഭിക്കുന്നത്. 28ന് ചിരവൈരികളായ പാകിസ്ഥാനെതിരെയാണ് ഇന്ത്യ ആദ്യ മത്സരത്തിനിറങ്ങുക. ഇത്തവണ ഒന്നിലേറെ തവണ ഇന്ത്യ-പാക് പോരാട്ടമുണ്ടാവുന്ന രീതിയിലാണ് ടൂര്‍ണമെന്‍റ് ഷെഡ്യൂള്‍ ചെയ്‌തിരിക്കുന്നത്.

ഗാംഗുലിയുടെ പിന്തുണ: കോലിക്ക് പിന്തുണയുമായി കഴിഞ്ഞ ദിവസം ബിസിസിഐ അധ്യക്ഷന്‍ സൗരവ് ഗാംഗുലി രംഗത്തെത്തിയിരുന്നു. ഏഷ്യ കപ്പിലൂടെ വിരാട് കോലി ഫോമിലേക്ക് മടങ്ങിയെത്തുമെന്നാണ് ഇന്ത്യയുടെ മുന്‍ നായകന്‍ കൂടിയായ ഗാംഗുലി പറഞ്ഞത്.

"നന്നായി പരിശീലനം നടത്താനും മത്സരങ്ങള്‍ കളിക്കാനും കോലിയെ അനുവദിക്കുകയാണ് വേണ്ടത്. ഇന്ത്യയുടെ ഏറ്റവും വലിയ താരങ്ങളിലൊരാളാണ് അവന്‍. ടീമിനായി ധാരാളം റൺസ് നേടിയിട്ടുണ്ട്. അവന്‍ ഒരു തിരിച്ചുവരവ് നടത്തുമെന്ന് ഞാൻ പ്രതീക്ഷിക്കുന്നു. സെഞ്ചുറി നേടുന്നതിലുപരിയായി ഏഷ്യ കപ്പിൽ അവന്‍ ഫോമിലേക്ക് മടങ്ങിയെത്തുമെന്ന് ഞാൻ വിശ്വസിക്കുന്നു" ഗാംഗുലി പറഞ്ഞു.