ദുബായ് : ഏഷ്യ കപ്പ് ക്രിക്കറ്റ് ടൂര്‍ണമെന്‍റില്‍ പാകിസ്ഥാനെതിരായ മത്സരത്തില്‍ ഇന്ത്യന്‍ താരം വിരാട് കോലി തന്‍റെ കഴിവിന്‍റെ 200 ശതമാനം നൽകുമെന്ന് അഫ്ഗാനിസ്ഥാൻ മുന്‍ ക്യാപ്റ്റന്‍ അസ്‌ഗർ അഫ്‌ഗാൻ. ചിരവൈരികളുടെ പോരാട്ടത്തിന് മുന്നോടിയായി ഒരു സ്‌പോര്‍ട്‌സ് മാധ്യമത്തോടാണ് അഫ്‌ഗാന്‍റെ പ്രതികരണം. ഇന്ന് രാത്രി ഏഴരയ്‌ക്ക് ദുബായിലാണ് ഇന്ത്യ-പാക് മത്സരം.
'കോലി പാകിസ്ഥാനെതിരെ മികച്ച പ്രകടനം നടത്തും. വലിയ മത്സരങ്ങളിൽ അദ്ദേഹം എപ്പോഴും തിളങ്ങാറുണ്ട്. പല കാര്യങ്ങളും ഭാഗ്യത്തെ ആശ്രയിച്ചിരിക്കുന്നുവെങ്കിലും, അദ്ദേഹത്തിന് റൺസിനായി അടങ്ങാത്ത ദാഹവും വിശപ്പുമുണ്ട്. പാകിസ്ഥാനെതിരെ തന്‍റെ കഴിവിന്‍റെ 200 ശതമാനവും അദ്ദേഹം നല്‍കും'- അഫ്‌ഗാൻ പറഞ്ഞു.
മത്സരത്തില്‍ ഇന്ത്യയ്‌ക്ക് മുൻതൂക്കമുണ്ടെന്നും അഫ്‌ഗാന്‍ അഭിപ്രായപ്പെട്ടു. ടി20 ലോകകപ്പില്‍ പാകിസ്ഥാന്‍ ഇന്ത്യയെ തോല്‍പ്പിച്ചുവെന്നത് യാഥാര്‍ഥ്യമാണ്. എന്നാല്‍ ഷഹീൻ ഷാ അഫ്രീദിയുടെ അഭാവം പാകിസ്ഥാനെ സംബന്ധിച്ച് ദൗർഭാഗ്യകരമാണെന്നും അഫ്‌ഗാന്‍ പറഞ്ഞു.
ഇന്ത്യൻ ടീം കൂടുതൽ സന്തുലിതാവസ്ഥയിലാണെന്നും അഫ്‌ഗാന്‍ കൂട്ടിച്ചേര്‍ത്തു.'ഇന്ത്യയുടെ ബാറ്റിങ് കോമ്പിനേഷൻ നോക്കിയാൽ അവർക്ക് മികച്ച ബാറ്റിങ് ലൈനപ്പുണ്ട്. പാകിസ്ഥാന്‍റെ ടോപ്പ് ഓർഡർ ബാറ്റർമാർ, പ്രത്യേകിച്ച് ഓപ്പണർമാർ, ക്ലിക്കുചെയ്താൽ, അത് ടീമിന് നല്ലതാണ്.
also read: 'എന്തൊരു അത്ഭുതകരമായ നേട്ടം' ; കോലിക്ക് ആശംസയുമായി എബി ഡിവില്ലിയേഴ്‌സ്
ഇല്ലെങ്കിൽ, അവരുടെ മധ്യനിര ഇന്ത്യയുടേത് പോലെ ശക്തമല്ല. സത്യസന്ധമായി, ഇന്ത്യൻ ടീം എനിക്ക് കൂടുതൽ സന്തുലിതമായി തോന്നുന്നു. ഇന്ത്യ കളി ജയിക്കുമെന്ന് ഞാൻ കരുതുന്നു'. അഫ്‌ഗാന്‍ പറഞ്ഞുനിര്‍ത്തി.
കഴിഞ്ഞ വര്‍ഷം ഒക്‌ടോബറിന് ശേഷം ആദ്യമായാണ് ഇരു സംഘവും നേര്‍ക്കുനേരെത്തുന്നത്. ഏഷ്യ കപ്പിലെ മുന്‍ പോരാട്ടങ്ങളില്‍ ഇന്ത്യയ്‌ക്ക് ആധിപത്യമുണ്ട്. ടൂര്‍ണമെന്‍റില്‍ നേരത്തെ 14 തവണ നേര്‍ക്കുനേര്‍ വന്നപ്പോള്‍ എട്ട് തവണയും ജയം ഇന്ത്യക്കൊപ്പമായിരുന്നു.
