ആരാധകര്‍ നാളേറെയായി അക്ഷമയോടെ കാത്തിരിക്കുന്ന ദുല്‍ഖര്‍ സല്‍മാന്‍ ചിത്രമാണ് കുറുപ്പ്. പിടികിട്ടാപ്പുള്ളി സുകുമാര കുറുപ്പിന്‍റെ ജീവിത കഥ പറയുന്ന ചിത്രത്തിന്‍റെ ട്രെയ്‌ലര്‍ പുറത്തിറങ്ങി. ദുല്‍ഖര്‍ സല്‍മാന്‍ തന്‍റെ ഔദ്യോഗിക ഫേസ്‌ബുക്ക് പേജിലൂടെയാണ് ട്രെയ്‌ലര്‍ പുറത്തുവിട്ടത്.
മികച്ച സ്വീകാര്യതയാണ് ട്രെയ്‌ലറിന് ലഭിച്ചിരിക്കുന്നത്. പുറത്തിറങ്ങി ഒരു മണിക്കൂര്‍ പിന്നിടുമ്പോള്‍ 76,000 പേരാണ് ട്രെയ്‌ലര്‍ കണ്ടിരിക്കുന്നത്. ഒരു ലക്ഷം ലൈക്കുകളും 1,300 ഡിസ്‌ലൈക്കുകളും ട്രെയ്‌ലറിന് ലഭിച്ചിട്ടുണ്ട്. 2.08 മിനിറ്റ് ദൈര്‍ഘ്യമുള്ള ട്രെയ്‌ലറില്‍ ദുല്‍ഖര്‍ തന്നെയാണ് ഹൈലൈറ്റ്.
പഞ്ച് നിറച്ച് ഡയലോഗുകൾ
ദുല്‍ഖറിനെ കൂടാതെ ശോഭിത ധൂലിപാല, ഇന്ദ്രജിത്ത്, ഷൈം ടോം ചാക്കോ തുടങ്ങിയവരും ട്രെയ്‌ലറില്‍ മിന്നിമറയുന്നുണ്ട്. ട്രെയ്‌ലറില്‍ ദുല്‍ഖറിന്‍റെ പഞ്ച് ഡയലോഗുകളും ശ്രദ്ധേയമാണ്. 'ഇന്നല്ലെങ്കില്‍ നാളെ ഞാന്‍ ആരെങ്കിലും ഒക്കെ ആകും...', 'എന്തായാലും ഒരു കാര്യം ഉറപ്പാണ്.. ഇനി എന്നെ ആര് കാണണമെന്ന് ഞാന്‍ തീരുമാനിക്കും. അത് കാക്കി ആണെങ്കിലും ശരി ഖദര്‍ ആണെങ്കിലും ശരി', 'നീ ജയിലില്‍ പോയാലും ഞാന്‍ ജയിലില്‍ പോകില്ല' തുടങ്ങീ കുറുപ്പിന്‍റെ ഡയലോഗുകളും പ്രേക്ഷകര്‍ ഏറ്റെടുത്തിരിക്കുകയാണ്.
വീഡിയോ ഗാനത്തിനും ഗംഭീര സ്വീകരണം
രണ്ട് ദിവസം മുമ്പ് ചിത്രത്തിലെ ആദ്യ വീഡിയോ ഗാനവും പുറത്തിറങ്ങിയിരുന്നു. 'പകലിരവുകള്‍' എന്ന ഗാനം പ്രേക്ഷകര്‍ ഇരുകരങ്ങളും നീട്ടി സ്വീകരിച്ചിരുന്നു. പുറത്തിറങ്ങി ഒരു ദിവസം തികയും മുമ്പേ ഒരു മില്യണിലധികം പേരാണ് ഗാനം കണ്ടത്. ഇതിന് പിന്നാലെയാണ് ട്രെയ്‌ലറും പുറത്തിറങ്ങിയിരിക്കുന്നത്. ഗാനം സ്വീകരിച്ച പ്രേക്ഷകര്‍ ട്രെയ്‌ലറും ഏറ്റെടുത്തിരിക്കുകയാണ്.
- " class="align-text-top noRightClick twitterSection" data="">
കൊവിഡ് സാഹചര്യത്തില്‍ റിലീസ് നീണ്ടു പോയ ചിത്രം നവംബര്‍ 12നാണ് പ്രേക്ഷകര്‍ക്ക് മുമ്പിലെത്തുക. ഒടിടി റിലീസ് വേണ്ടെന്ന് വെച്ച് തിയേറ്റര്‍ റിലീസിന് തിരഞ്ഞെടുത്ത ചിത്രത്തിന് മികച്ച വരവേല്‍പ്പ് നല്‍കാന്‍ കാത്തിരിക്കുകയാണ് ആരാധകരും തിയേറ്റര്‍ ഉടമകളും. കേരളത്തില്‍ മാത്രം 400 ലേറെ തിയേറ്ററുകളിലാണ് കുറുപ്പ് പ്രദര്‍ശനത്തിനെത്തുക.
വൻ താരനിരയുമായി അഞ്ച് ഭാഷകളിലെ കുറുപ്പ്
മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ എന്നീ ഭാഷകളിലും ചിത്രം ഒരുങ്ങുന്നുണ്ട്. കേരളം, മുംബൈ, അഹമ്മദാബാദ്. ദുബായ് എന്നിവിടങ്ങളിലായി ആറ് മാസമായിരുന്നു ചിത്രീകരണം.
നിവിന്‍ പോളി ചിത്രം മൂത്തോനിലൂടെ മലയാളത്തില്‍ അരങ്ങേറ്റം കുറിച്ച ശോഭിത ധൂലിപാലയാണ് ചിത്രത്തില്‍ ദുല്‍ഖറിന്‍റെ നായികയായെത്തുന്നത്. ദുല്‍ഖര്‍, ശോഭിത എന്നിവരെ കൂടാതെ ഇന്ദ്രജിത് സുകുമാരന്‍, ഷൈന്‍ ടോം ചാക്കോ, സണ്ണി വെയ്‌ന്‍, പി ബാലചന്ദ്രന്‍, വിജയരാഘവന്‍, സുരഭി ലക്ഷ്മി തുടങ്ങിയവരും ചിത്രത്തില്‍ അണിനിരക്കും.
35 കോടി രൂപ മുതല്‍മുടക്കിലൊരുങ്ങുന്ന കുറുപ്പ് ദുല്‍ഖറിന്‍റെ കരിയറിലെ തന്നെ ഏറ്റവും വലിയ ബഡ്ജറ്റ് ചിത്രമാണ്. ദുല്‍ഖറിന്‍റെ അരങ്ങേറ്റ ചിത്രം 'സെക്കന്‍റ് ഷോ' യുടെ സംവിധായകന്‍ ശ്രീനാഥ് രാജേന്ദ്രനാണ് കുറുപ്പിന്‍റെയും സംവിധായകന്‍.
ദുല്‍ഖറിന്‍റെ തന്നെ ഉടമസ്ഥതയിലുള്ള വേ ഫാറര്‍ ഫിലിംസും എം സ്‌റ്റാര്‍ എന്‍റര്‍ടെയിന്‍മെന്‍റ്സും ചേര്‍ന്ന് നിര്‍മ്മിക്കുന്ന ചിത്രത്തിന്‍റെ തിരക്കഥ ജിതിന്‍ കെ.ജോസാണ്. ഡാനിയേല്‍ സായൂജ് നായര്‍, കെ.എസ് അരവിന്ദ് എന്നിവര്‍ ചേര്‍ന്നാണ് തിരക്കഥ ഒരുക്കിയിരിക്കുന്നത്. നിമിഷ് രവി ഛായാഗ്രഹണവും വിവേക് ഹര്‍ഷന്‍ എഡിറ്റിംഗും സുഷിന്‍ ശ്യാം സംഗീത സംവിധാനവും നിര്‍വ്വഹിക്കും.
