വലിയ പബ്ലിസിറ്റിയോ കെട്ടുമാറാപ്പുകളോ ഇല്ലാതെ 2016ല്‍ തീയേറ്ററുകളിലെത്തി വന്‍വിജയമായ റിയലിസ്റ്റിക് ചിത്രമായിരുന്നു എബ്രിഡ് ഷൈന്‍ സംവിധാനം ചെയ്ത ആക്ഷന്‍ ഹീറോ ബിജു. ടൈറ്റില്‍ കഥാപാത്രത്തെ അവതരിപ്പിച്ചത് നടന്‍ നിവിന്‍ പോളിയായിരുന്നു. ഒരു പൊലീസ് സ്റ്റേഷനും അവിടുത്തെ സബ് ഇന്‍സ്പെക്ടറെയും കേന്ദ്രീകരിച്ച് ചിത്രീകരിച്ച സിനിമ നിരവധി സാമകാലിക വിഷയങ്ങളും ചര്‍ച്ച ചെയ്തു. ഇപ്പോള്‍ ചിത്രത്തിന്‍റെ രണ്ടാംഭാഗം ഉടന്‍ സംഭവിക്കുമെന്ന തരത്തിലാണ് സിനിമാലോകത്ത് നിന്നുള്ള വാര്‍ത്തകള്‍.
രാജീവ് രവി സംവിധാനം ചെയ്യുന്ന തുറമുഖത്തിലാണ് നിവിന്‍ പോളി ഇപ്പോള്‍ അഭിനയിച്ചുകൊണ്ടിരിക്കുന്നത്. തുറമുഖത്തിന് ശേഷം സണ്ണിവെയ്ന്‍ നിര്‍മിക്കുന്ന പടവെട്ടില്‍ താരം അഭിനയിക്കും. അതിനുശേഷം ആക്ഷന്‍ ഹീറോ ബിജുവിന്‍റെ രണ്ടാംഭാഗം ഉണ്ടായേക്കുമെന്നാണ് റിപ്പോര്‍ട്ടുകള്‍. നിരവധി പുതുമുഖങ്ങളും ആക്ഷന്‍ ഹീറോ ബിജുവിന്‍റെ ഭാഗമായിരുന്നു. സ്ക്രീനിലെത്തിയ എല്ലാ കഥാപാത്രങ്ങളും ഒരുപോലെ ശ്രദ്ധിക്കപ്പെട്ടുവെന്നതായിരുന്നു ആക്ഷന്‍ ഹീറോ ബിജുവിന്‍റെ മറ്റൊരു പ്രത്യേകത.
സുരാജ് വെഞ്ഞാറമൂട് എന്ന നടന്‍റെ സാധാരണ ശൈലിയില്‍ നിന്നും വ്യത്യസ്തമായൊരു പ്രകടനം പ്രേക്ഷകര്‍ക്ക് കാണിച്ചുതന്ന സിനിമ കൂടിയായിരുന്നു ആക്ഷന്‍ ഹീറോ ബിജു. സിനിമയിലെ 'മുത്തേ പൊന്നേ പിണങ്ങല്ലേ' എന്ന ഗാനത്തിന് വലിയ പ്രേക്ഷക സ്വീകാര്യതയാണ് ലഭിച്ചത്. 1983 ആണ് എബ്രിഡ് ഷൈനും-നിവിന്‍ പോളിയും ആദ്യമായി ഒന്നിച്ച ചിത്രം. പിന്നീടാണ് ആക്ഷന്‍ ഹീറോ ബിജു സംഭവിച്ചത്. പൂമരം, ദി കുങ്ഫു മാസ്റ്റര്‍ എന്നിങ്ങനെ മറ്റ് രണ്ട് ചിത്രങ്ങള്‍ കൂടി എബ്രിഡ് ഷൈനിന്‍റെ സംവിധാനത്തില്‍ പുറത്തിറങ്ങിയിട്ടുണ്ട്.
