ഗതാഗതം തടസപ്പെടുത്തിയവര്‍ക്കെതിരെ പ്രതികരിച്ചതിനെ തുടര്‍ന്നുണ്ടായ സംഘര്‍ഷവും വിവാദങ്ങളുമാണ് ജോജു ജോര്‍ജ് സോഷ്യല്‍ മീഡിയ അക്കൗണ്ടുകള്‍ നീക്കം ചെയ്യാന്‍ കാരണമെന്ന് അദ്ദേഹത്തോട് അടുത്തവൃത്തങ്ങള്‍.
ജോജുവിന്‍റെ അക്കൗണ്ടുകള്‍ ഹാക്ക് ചെയ്യപ്പെട്ടതായി വാര്‍ത്തകള്‍ പ്രചരിച്ചിരുന്നു. എന്നാല്‍ അക്കൗണ്ടുകള്‍ നടന്‍ സ്വന്തം ഇഷ്‌ട്രപ്രകാരം നീക്കം ചെയ്‌തതാണെന്ന് നടനോടടുത്ത വൃത്തങ്ങള്‍ വ്യക്തമാക്കി. സോഷ്യല്‍ മീഡിയ അക്കൗണ്ടുകള്‍ തത്ക്കാലം വേണ്ട എന്നാണ് ജോജുവിന്‍റെ നിലപാട്.
Also Read: ഫേസ്ബുക്ക് പേജ് നീക്കം ചെയ്ത് ജോജു ജോര്‍ജ്?
ഫേസ്ബുക്ക്, ഇന്‍സ്‌റ്റഗ്രാം അക്കൗണ്ടുകളില്‍ നിന്നാണ് നടന്‍ പിന്‍വാങ്ങിയത്. ഫേസ്ബുക്കിലും ഇന്‍സ്‌റ്റയിലും വളരെ സജീവമായിരുന്നു നടന്‍. പ്രേക്ഷക മനസ്സില്‍ തനിക്ക് സ്ഥാനമുണ്ടെന്നാണ് ഇതേക്കുറിച്ച് ജോജു പ്രതികരിച്ചതെന്നാണ് വിവരം.
രണ്ട് ദിവസമായി സോഷ്യല്‍ മീഡിയയിലടക്കം ജോജു ആണ് വാര്‍ത്താത്തലക്കെട്ടുകളില്‍ നിറഞ്ഞുനില്‍ക്കുന്നത്. ജനങ്ങളെ ബുദ്ധിമുട്ടിച്ചുള്ള കോണ്‍ഗ്രസ് സമരത്തോട് പ്രതികരിച്ച ജോജുവിന്‍റെ സോഷ്യല്‍ മീഡിയ പേജുകളില്‍ കഴിഞ്ഞ ദിവസം സമരാനുകൂലികളും വിരുദ്ധരും തമ്മില്‍ വാക്‌പോര് നടന്നിരുന്നു.
