ലൂസിഫറിലൂടെ പൃഥ്വിരാജ് ബോളിവുഡ് നടൻ വിവേക് ഒബ്റോയ്‌യെ മലയാളത്തിലെത്തിച്ചിരുന്നു. നടനും ഡാൻസറുമായ വിനീതിന്‍റെ ശബ്ദത്തിനൊപ്പം ബോബി എന്ന പ്രതിനായകന്‍റെ കഥാപാത്രത്തെ വിവേക് ഒബ്റോയ് ഗംഭീരമാക്കുകയും ചെയ്തു. ലൂസിഫറിലെ അരങ്ങേറ്റത്തിന് ശേഷം പൃഥ്വിക്കൊപ്പം പുതിയ ചിത്രത്തിലും കൈകോർക്കുകയാണ് വിവേക് ഒബ്റോയ്.
ഷാജി കൈലാസ് സംവിധാനം ചെയ്യുന്ന പൃഥ്വിരാജ് ചിത്രം കടുവയിൽ വിവേക് ഒബ്റോയ് മുഖ്യകഥാപാത്രത്തെ അവതരിപ്പിക്കുമെന്നാണ് സൂചന. കടുവാക്കുന്നേൽ കുറുവച്ചനായി പൃഥ്വി എത്തുന്ന ചിത്രത്തിലെ മറ്റ് പ്രധാന താരങ്ങൾ സായ് കുമാർ, സിദ്ദീഖ്, സംയുക്തമേനോൻ, സീമ, ജനാർദ്ദനൻ, വിജയരാഘവൻ, പ്രിയങ്ക, അജു വർഗീസ്, ഹരിശ്രീ അശോകൻ, രാഹുൽമാധവ്, കൊച്ചുപ്രേമൻ എന്നിവരാണ്.
എട്ട് വർഷത്തിന്‍റെ ഇടവേളക്ക് ശേഷമാണ് ഷാജി കൈലാസ് സംവിധാനം ചെയ്യുന്ന പുതിയ ചിത്രം വരുന്നത്. സിംഹാസനം എന്ന മലയാളചിത്രത്തിലാണ് ഇതിന് മുമ്പ് പൃഥ്വിയും ഷാജി കൈലാസും ഒന്നിച്ചിട്ടുള്ളത്. അഭിനന്ദൻ രാമാനുജൻ ഛായാഗ്രഹകനാകുന്ന മാസ് ആക്ഷൻ ചിത്രത്തിന്‍റെ എഡിറ്റിങ് നിർവഹിക്കുന്നത് ഷമീർ മുഹമ്മദാണ്.
More Read: ഇതാണ് കടുവാക്കുന്നേൽ കുറുവച്ചൻ
കടുവയുടെ ഷൂട്ടിങ് പുരോഗമിക്കുകയാണ്. വിവേക് ഒബ്റോയിയുടെ മലയാളത്തിലേക്കുള്ള രണ്ടാം വരവിൽ ആരാധകരും വലിയ പ്രതീക്ഷയിലാണ്.
