ടൊറന്‍റോ : ഓരോ സിഗരറ്റിലും ആരോഗ്യ മുന്നറിയിപ്പ് അച്ചടിക്കണമെന്ന് ആവശ്യപ്പെടുന്ന ലോകത്തെ ആദ്യ രാജ്യമായി കാനഡ. പുകയില ഉത്പന്നങ്ങളുടെ പായ്ക്കുകളിലെ ഗ്രാഫിക് ഫോട്ടോ മുന്നറിയിപ്പുകളുടെ സ്വാധീനം നഷ്‌ടപ്പെട്ടെന്ന ആശങ്കയാണ് ഇത്തരം ഒരു നീക്കത്തിലേക്ക് നയിച്ചതെന്ന് മാനസികാരോഗ്യ മന്ത്രി കരോലിൻ ബെന്നറ്റ് പറഞ്ഞു.
പായ്ക്കറ്റുകളിലെ സന്ദേശങ്ങൾക്ക് അവയുടെ പുതുമയും സ്വാധീനവും നഷ്‌ടമാകുന്നുവെന്ന ആശങ്ക പരിഹരിക്കേണ്ടതുണ്ട്. ഓരോ പുകയില ഉത്പന്നങ്ങളിലും ആരോഗ്യ മുന്നറിയിപ്പുകൾ ചേർക്കുന്നത്, വളരെ പ്രാധാന്യം അര്‍ഹിക്കുന്ന സന്ദേശങ്ങള്‍ ജനങ്ങളിലേക്ക് എത്തിക്കുമെന്നും കരോലിൻ ബെന്നറ്റ് പറഞ്ഞു.
മുന്നറിയിപ്പ് പട്ടിക വിപുലീകരിക്കും : സിഗരറ്റില്‍ അച്ചടിക്കുന്ന സന്ദേശങ്ങള്‍ മാറാമെങ്കിലും ' ഓരോ വലിയിലും വിഷം' എന്നതാണ് നിലവിലെ നിര്‍ദേശമെന്നും മന്ത്രി കൂട്ടിച്ചേര്‍ത്തു. പുകവലി മൂലം വയറ്റിലെ കാൻസർ, വൻകുടൽ കാൻസർ, പ്രമേഹം, പെരിഫറൽ വാസ്കുലർ രോഗം എന്നിവയുൾപ്പടെ നിരവധി ആരോഗ്യപ്രശ്നങ്ങള്‍ ഉണ്ടാകുമെന്ന വിപുലമായ മുന്നറിയിപ്പുകള്‍ പായ്ക്കറ്റില് ഉള്‍പ്പെടുത്തുമെന്നും മന്ത്രി വ്യക്തമാക്കി.
രണ്ടായിരത്തിന്‍റെ തുടക്കം മുതല്‍ സിഗരറ്റ് പായ്ക്കറ്റുകളില്‍ ഫോട്ടോ പതിച്ചുള്ള മുന്നറിയിപ്പ് നല്‍കണമെന്ന കാനഡയുടെ നിര്‍ദേശമാണ് തുടര്‍ന്ന് ലോകത്ത് വന്‍ സ്വീകാര്യത നേടിയത്. എന്നാല്‍ രണ്ട് പതിറ്റാണ്ടിലേറെയായിട്ടും ഈ ഫോട്ടോ നവീകരിച്ചിട്ടില്ല.
ലോകമാതൃക സ്ഥാപിക്കും : പായ്ക്കറ്റുകളിലെ മുന്നറിയിപ്പുകൾ പോലെ തന്നെ സിഗരറ്റുകളിൽ നേരിട്ട് അച്ചടിച്ച മുന്നറിയിപ്പുകൾ അന്താരാഷ്ട്ര തലത്തിൽ ജനപ്രിയമാകുമെന്ന് പ്രതീക്ഷിക്കുന്നതായി കനേഡിയൻ കാൻസർ സൊസൈറ്റിയിലെ സീനിയർ പോളിസി അനലിസ്റ്റ് റോബ് കണ്ണിങ്ഹാം പറഞ്ഞു.
മറ്റൊരു രാജ്യവും ഇത്തരമൊരു നിയന്ത്രണങ്ങൾ നടപ്പാക്കിയിട്ടില്ല. ഇതൊരു ലോകമാതൃക സ്ഥാപിക്കാൻ പോകുകയാണ്. ഇത്തരം മുന്നറിയിപ്പിലൂടെ ഒരു യഥാർഥ മാറ്റമുണ്ടാക്കുമെന്ന് പ്രതീക്ഷിക്കുന്നാതായും റോബ് കണ്ണിങ്ഹാം കൂട്ടിച്ചേര്‍ത്തു.
2023ന്‍റെ അവസാന പകുതിയിൽ മാറ്റങ്ങൾ പ്രാബല്യത്തിൽ വരുമെന്നാണ് സർക്കാർ പ്രതീക്ഷിക്കുന്നത്. അതേസമയം വർഷങ്ങളായി രാജ്യത്തെ പുകവലിക്കാരുടെ നിരക്ക് ക്രമാനുഗതമായി കുറയുന്നതായാണ് റിപ്പോര്‍ട്ട്.
കഴിഞ്ഞ മാസം പുറത്തിറങ്ങിയ സ്റ്റാറ്റിസ്റ്റിക്സ് കാനഡയിൽ നിന്നുള്ള വിവരപ്രകാരം 10% കനേഡിയരാണ് സ്ഥിരമായി പുകവലിക്കുന്നത്. 2035 ഓടെ ഈ നിരക്ക് പകുതിയായി കുറയ്ക്കാനാണ് സർക്കാർ ശ്രമിക്കുന്നത്.
