ബ്രസല്‍സ്: കൊവിഡ് വ്യാപനത്തെ തുടര്ന്ന് ഒരു വര്‍ഷം മുന്‍പ് സഞ്ചാരികള്‍ക്ക് ഏര്‍പ്പെടുത്തിയ യാത്ര നിയന്ത്രണങ്ങള്‍ നീക്കി യൂറോപ്യന്‍ യൂണിയന്‍. അമേരിക്ക ഉള്‍പ്പെടെ 13 രാജ്യങ്ങളില്‍ നിന്നുള്ള സഞ്ചാരികള്‍ക്ക് ഏര്‍പ്പെടുത്തിയ നിയന്ത്രണമാണ് യൂറോപ്യന്‍ യൂണിയന്‍ നീക്കിയത്. യാത്രയ്ക്ക് 72 മണിക്കൂര്‍ മുന്‍പ് സഞ്ചാരികള്‍ ആര്‍ടി-പിസിആര്‍ പരിശോധന നടത്തണമെന്നും നെഗറ്റീവ് പരിശോധന ഫലം കൈയില്‍ കരുതണമെന്നും യൂണിയന്‍ നിര്‍ദേശം നല്‍കി.
അമേരിക്കയ്ക്ക് പുറമേ ചൈന, ജപ്പാൻ, ദക്ഷിണ കൊറിയ, തായ്‌ലാൻഡ്, സിംഗപ്പൂർ, ഓസ്‌ട്രേലിയ, ന്യൂസിലാന്‍റ്, ഇസ്രായേൽ, അൽബേനിയ, ലെബനന്‍, റിപബ്ലിക്ക് ഓഫ് നോര്‍ത്ത് മസിഡോണിയ, റവാന്‍ഡ എന്നി രാജ്യങ്ങള്‍ക്കാണ് യൂറോപ്യന്‍ യൂണിയന്‍ ഇളവ് അനുവദിച്ചത്. യൂറോപ്യന്‍ യൂണിയന്‍റെ ഭാഗമായിരുന്ന യുകെയ്ക്ക് യാത്ര നിയന്ത്രണത്തില്‍ ഇളവ് നല്‍കിയിട്ടില്ല.
Also read: 'വാക്സിന്‍ എടുക്കണം,കരുതിയിരിക്കണം'; ഡെല്‍റ്റ വകഭേദത്തില്‍ മുന്നറിയിപ്പുമായി ജോ ബൈഡന്‍
ഓരോ രാജ്യങ്ങളിലേയും കൊവിഡ് സാഹചര്യം പരിഗണിച്ചാണ് യൂറോപ്യന്‍ യൂണിയന്‍ യാത്ര നിയന്ത്രണത്തില്‍ ഇളവ് അനുവദിക്കുന്നത്. രണ്ടാഴ്‌ച കൂടുമ്പോള്‍ പട്ടിക പുതുക്കും.
കഴിഞ്ഞ വർഷം ജൂണില്‍ അത്യാവശ്യ കാര്യങ്ങള്‍ക്കല്ലാതെ യൂറോപ്യൻ യൂണിയനിലേയ്ക്ക് യാത്ര ചെയ്യുന്നവര്‍ക്ക് ഏര്‍പ്പെടുത്തിയ നിയന്ത്രണങ്ങൾ ക്രമേണ എടുത്തുകളയുന്നതിനുള്ള ശുപാർശ കൗണ്‍സില്‍ അംഗീകരിച്ചിരുന്നു. തുടര്ന്ന് യാത്ര നിയന്ത്രണങ്ങൾ എടുത്ത് മാറ്റേണ്ട രാജ്യങ്ങളുടെ പ്രാരംഭ പട്ടിക തയ്യാറാക്കി. കഴിഞ്ഞ മെയ് 20 ന്‌ വാക്‌സിനേഷൻ നടത്തിയവര്‍ക്ക് ചില ഇളവുകൾ ഏർപ്പെടുത്തിക്കൊണ്ടും വികസ്വര രാജ്യങ്ങൾക്കുള്ള നിയന്ത്രണങ്ങൾ നീക്കുന്നതിനുള്ള മാനദണ്ഡങ്ങൾ ലഘൂകരിച്ചും കൗണ്‍സില്‍ ശുപാര്‍ശ പുതുക്കിയിരുന്നു.
