ഇറാന്‍റെ ആണവ ചര്‍ച്ച താത്കാലികമായി നിര്‍ത്തി; ഇടവേള നിരാശാജനകമെന്ന് നയതന്ത്രജ്ഞർ

ഡിസംബർ അവസാനത്തോടുകൂടി ചർച്ചകൾ പുനരാരംഭിക്കുമെന്നാണ് പ്രതീക്ഷയെന്ന് പ്രതിനിധികൾ അറിയിച്ചിട്ടുണ്ട്

വിയന്ന: ഇറാന്‍റെ 2015ലെ ആണവ കരാർ പുനഃസ്ഥാപിക്കുന്നതിനായി വിയന്നയിൽ നടന്ന ചർച്ച താത്കാലികമായി നിര്‍ത്തി. ഇറാനിൽ നിന്നെത്തിയ പ്രതിനിധികൾക്ക് ടെഹ്‌റാനിലേക്ക് അടിയന്തമായി മടങ്ങിപ്പോകേണ്ട സാഹചര്യത്തിലാണ് ചർച്ച നിർത്തിവെച്ചത്. അതേസമയം ചർച്ച അവസാനഘട്ടത്തിലേക്ക് എത്തിയ സാഹചര്യത്തിൽ ഈ ഇടവേള ഏറെ നിരാശാജനകമാണെന്ന് യൂറോപ്യൻ നയതന്ത്രജ്ഞർ അഭിപ്രായപ്പെട്ടു.

അതേസമയം കൃത്യമായൊരു തീയതി ഉറപ്പിച്ചിട്ടില്ലെങ്കിലും ഡിസംബർ അവസാനത്തോടുകൂടി ചർച്ച പുനഃരാരംഭിക്കുമെന്ന് ചൈനയുടെ ചീഫ് നെഗോഷ്യേറ്റർ വാൻ ക്യുൻ പറഞ്ഞു. സംയുക്ത സമഗ്ര പദ്ധതി എന്നറിയപ്പെടുന്ന 2015ലെ ആണവ കരാറിൽ ഒപ്പുവച്ച ശേഷിക്കുന്ന രാജ്യങ്ങളുടെ ചർച്ച വിയന്നയിൽ അഞ്ച് മാസത്തിലേറെയായി നടക്കുകയാണ്.

2018ൽ അന്നത്തെ അമേരിക്കൻ പ്രസിഡന്‍റ് ഡൊണാൾഡ് ട്രംപ് കരാറിൽ നിന്ന് അമേരിക്കയെ പിൻവലിക്കുകയും യുഎസ് ഉപരോധം വീണ്ടും ഏർപ്പെടുത്തുകയും ചെയ്തിരുന്നു. ഇത് 2019ൽ ആണവ നിയന്ത്രണങ്ങൾ ലംഘിക്കാൻ ഇറാനെ പ്രേരിപ്പിച്ചു. അതിനാൽ ചർച്ചകളിൽ പരോക്ഷമായാണ് അമേരിക്ക പങ്കെടുത്തത്.

എന്നാൽ കരാറിൽ വീണ്ടും ചേരാൻ ആഗ്രഹിക്കുന്നതായി പ്രസിഡന്‍റ് ജോ ബൈഡൻ സൂചന നൽകിയിട്ടുണ്ട്. ബ്രിട്ടൻ, ഫ്രാൻസ്, ജർമ്മനി, റഷ്യ, ചൈന എന്നീ രാജ്യങ്ങൾ ഇപ്പോഴും കരാറിന്‍റെ ഭാഗമാണ്.

അതേസമയം വിയന്ന ചർച്ച പരാജയപ്പെട്ടാൽ ഇറാനിൽ സൈനിക നടപടി പരിഗണനയിലാണെന്ന് അമേരിക്ക അറിയിച്ചിട്ടുണ്ട്. ഏതൊരു സാഹചര്യവും നേരിടാൻ യു.എസ് സൈനിക കേന്ദ്രങ്ങൾ സജ്ജമാണെന്നും യുഎസ് സെൻട്രൽ കമാൻഡ് മേധാവി അറിയിച്ചുണ്ട്.