ബൊഗോട്ട: കൊളംബിയയിൽ പൊലീസും പ്രതിഷേധക്കാരും തമ്മിലുണ്ടായ ഏറ്റുമുട്ടലിൽ രണ്ട് പേർ മരിച്ചു. 10 പേർക്ക് പരിക്കേറ്റു. കൊളംബിയയിലെ പടിഞ്ഞാറൻ മുനിസിപ്പാലിറ്റിയായ യംബോയിലാണ് ഏറ്റുമുട്ടൽ നടന്നത്. മൊബൈൽ ആന്‍റി-ഡിസ്റ്റബൻസ് സ്ക്വാഡ്രൺ (ഇഎസ്എംഎഡി) സേനയുമായി ചൊവ്വാഴ്ച രാവിലെ പ്രതിഷേധക്കാർ ഏറ്റുമുട്ടുകയായിരുന്നു.
നിരവധി ചെറിപ്പക്കാർക്കാണ് സംഭവത്തിൽ പരിക്കേറ്റിരിക്കുന്നതെന്ന് മാധ്യമങ്ങൾ റിപ്പോട്ട് ചെയ്തു. സംഭവത്തിൽ നിരവധി പേരെ അറസ്റ്റ് ചെയ്തതായും പൊലീസ് പറഞ്ഞു. അതേസമയം പ്രതിഷേധത്തിൽ ഒരാളാണ് മരിച്ചതെന്ന് പ്രാദേശിക പൊലീസ് പറഞ്ഞു. തിങ്കളാഴ്ച പ്രതിഷേധക്കാർ സ്ഫോടകവസ്തുക്കൾ ഉപയോഗിച്ച് പൊലീസിനെ ആക്രമിക്കുകയായിരുന്നു. സംഭവത്തിൽ നിരവധി പൊലീസ് ഉദ്യോഗസ്ഥർക്ക് പരിക്കേറ്റെന്നും ഉദ്യോഗസ്ഥ വൃത്തങ്ങൾ അറിയിച്ചു. യംബോ മേയർ ജോൺ ജോൺ ജെയ്‌റോ സാന്‍റാമരിയയുടെ വീടിന് നേരെയും പ്രതിഷേധക്കാർ കല്ലെറിഞ്ഞു.
Also Read: ബിൽ ഗേറ്റ്‌സിന്‍റെ രാജിക്ക് പിന്നിൽ ജീവനക്കാരിയുമായുള്ള ലൈംഗിക ബന്ധമെന്ന് റിപ്പോർട്ട്
സോളിഡാരിറ്റി നിയമങ്ങൾക്കെതിരെയും നികുതി പരിഷ്കരണ ബില്ലിനെതിരെയും ഒരു മാസമായി കൊളംബിയയിൽ പ്രതിഷേധം നടന്നു വരികയാണ്. കൊളംബിയൻ ജനതയും പൊലീസും തമ്മിലുള്ള ആക്രമണത്തിൽ ഇതുവരെ 50 ഓളം പേർ മരിച്ചതായും 600 ഓളം പേർക്ക് പരിക്കേറ്റതായുമാണ് റിപ്പോർട്ടുകൾ. നൂറുകണക്കിന് ആളുകളെ കസ്റ്റഡിയിലെടുത്തു.
തിങ്കളാഴ്ച സർക്കാരുമായി നടത്തിയ ചർച്ചയിൽ ഫലം കണ്ടില്ലെന്ന് ദേശീയ തൊഴിലില്ലായ്മ കമ്മിറ്റി (സിഎൻപി) അംഗവും ജനറൽ കോൺഫെഡറേഷൻ ഓഫ് ലേബർ (സിജിടി) പ്രസിഡന്‍റുമായ പെർസി ഒയോല പറഞ്ഞു. സിഎൻപി ബുധനാഴ്ച കൊളംബിയയിൽ രാജ്യവ്യാപകമായി പ്രതിഷേധം നടത്തുമെന്നും അദ്ദേഹം കൂട്ടിച്ചേർത്തു. കൊളംബിയ സെൻട്രൽ യൂണിയൻ ഓഫ് വർക്കേഴ്സ് (സി.യു.ടി) പണിമുടക്കും ജനകീയ സമ്മേളനങ്ങളും തുടരണമെന്ന് നേരത്തെ ആവശ്യപ്പെട്ടിരുന്നു.
