ശിൽപ ഷെട്ടി നായികയായി പുതിയ ചിത്രം വരുന്നു. സൊണാൽ ജോഷി ആദ്യമായി സംവിധാനം ചെയ്യുന്ന 'സുഖീ' എന്ന ചിത്രത്തിലാണ് ബോളിവുഡിന്‍റെ പ്രിയതാരം മുഖ്യ വേഷത്തിലെത്തുന്നത് (Sonal Joshi directorial debut Sukhee). ചിത്രത്തിന്‍റെ ട്രെയിലർ പുറത്തുവന്നു (Shilpa Shetty's Sukhee Official Trailer).
സ്വയം കണ്ടെത്തലിന്‍റെയും പ്രതിരോധത്തിന്‍റെയും ഹൃദയസ്‌പർശിയും ആപേക്ഷികവുമായ കഥയാണ് 'സുഖീ' പറയുന്നതെന്ന സൂചനയുമായാണ് ട്രെയിലർ എത്തിയിരിക്കുന്നത്. പ്രായഭേദമന്യെ എല്ലാവർക്കും ആസ്വദിക്കാനാകുന്ന നിലയിലാണ് ചിത്രത്തിന്‍റെ അവതരണമെന്നും ട്രെയിലറില്‍ നിന്നും വ്യക്തമാണ്. നർമ്മവും ഗൃഹാതുരത്വം ഉണർത്തുന്ന രംഗങ്ങളും പ്രേക്ഷകർക്ക് പ്രതീക്ഷിക്കാം.
- " class="align-text-top noRightClick twitterSection" data="">
പഞ്ചാബി വീട്ടമ്മ, 38 കാരിയായ 'സുഖ്പ്രീത് സുഖീ കൽറ'യെ ചുറ്റിപ്പറ്റിയുള്ളതാണ് 'സുഖീ'യുടെ കഥ. രണ്ട് പതിറ്റാണ്ടുകൾക്ക് ശേഷം സ്‌കൂൾ റീയൂണിയനിൽ പങ്കെടുക്കാനായി സുഖിയും അവളുടെ സുഹൃത്തുക്കളും ഡൽഹിയിലേക്ക് യാത്ര തിരിക്കുന്നതോടെയാണ് കഥയ്‌ക്ക് നിർണായകമായ വഴിത്തിരിവുണ്ടാകുന്നത്. ഈ യാത്രയ്‌ക്കിടെ സുഖീ 17 വയസുകാരിയായി വീണ്ടും മാറുന്നു.
ഭാര്യയുടെയും അമ്മയുടെയും മേൽവിലാസത്തില്‍ നിന്നും ഒരു സ്‌ത്രീയെന്ന നിലയിലുള്ള ഐഡന്‍റിറ്റി അവൾ കണ്ടെത്തുകയാണ്. പിന്നീട് തന്‍റെ ജീവിതത്തിലെ ഏറ്റവും വെല്ലുവിളി നിറഞ്ഞ പരിവർത്തനവുമായി സുഖീ പോരാടുന്നതും ചിത്രം വരച്ചു കാട്ടുന്നു. ശിൽപ ഷെട്ടി ടൈറ്റിൽ വേഷത്തില്‍ എത്തുന്ന ഈ ചിത്രം ഭൂഷൺ കുമാർ, കൃഷൻ കുമാർ, വിക്രം മൽഹോത്ര, ശിഖ ശർമ എന്നിവരടങ്ങുന്ന ഒരു പ്രൊഡക്ഷൻ ടീമാണ് നിർമിക്കുന്നത്.
കുഷാ കപില, ദിൽനാസ് ഇറാനി, പാവ്‌ലീൻ ഗുജ്‌റാൾ, ചൈതന്യ ചൗധരി, അമിത് സാധ് എന്നിവരുൾപ്പെടെയുള്ള അഭിനേതാക്കളും ചിത്രത്തില്‍ അണിനിരക്കുന്നു. ഇതുവരെ കാണാത്ത വേറിട്ട രൂപത്തിലും ഭാവത്തിലുമാണ് ശിൽപ ഷെട്ടി ഈ ചിത്രത്തില്‍ എത്തുന്നത്. 'സുഖീ' ആയുള്ള ശിൽപയുടെ വേറിട്ട അഭിനയ മുഹൂർത്തം ആസ്വദിക്കാനുള്ള കാത്തിരിപ്പിലാണ് ആരാധകർ. ചിത്രം സെപ്‌റ്റംബർ 22ന് തിയേറ്ററുകളിൽ എത്തും.
'സുഖീ'യ്‌ക്ക് പുറമെ നിരവധി ചിത്രങ്ങളാണ് ശിൽപ ഷെട്ടിയുടേതായി അണിയറയിൽ ഒരുങ്ങുന്നത്. രോഹിത് ഷെട്ടിയുടെ വരാനിരിക്കുന്ന ഒടിടി അരങ്ങേറ്റ ചിത്രം, 'ഇന്ത്യൻ പൊലീസ് ഫോഴ്‌സി'ൽ താരം പ്രത്യക്ഷപ്പെടും (Rohit Shetty's upcoming OTT debut Indian Police Force). സിദ്ധാർഥ് മൽഹോത്ര (Sidharth Malhotra), വിവേക് ഒബ്‌റോയ് (Vivek Oberoi) എന്നിവരോടൊപ്പമാണ് ശിൽപ പ്രത്യക്ഷപ്പെടുക. ആമസോൺ പ്രൈം പ്ലാറ്റ്‌ഫോമിൽ സീരീസ് ഉടൻ ലഭ്യമാകും.
വി രവിചന്ദ്രൻ, സഞ്ജയ് ദത്ത് എന്നിവരോടൊപ്പം 'കെഡി-ദി ഡെവിൾ' എന്ന ചിത്രത്തിലും ശിൽപ അഭിനയിക്കുന്നുണ്ട് (Shilpa Shetty in KD-The Devil). തമിഴ്, കന്നഡ, തെലുഗു, മലയാളം, ഹിന്ദി എന്നീ ഭാഷകളിലാണ് ഈ പാൻ-ഇന്ത്യൻ ബഹുഭാഷ ചിത്രം റിലീസ് ചെയ്യാൻ ഒരുങ്ങുന്നത്.
