നെറ്റ്ഫ്ലിക്‌സിന്‍റെ നടപടിക്കെതിരെ പ്രതിഷേധവുമായി പ്രഭാസ് ആരാധകര്‍. രാജ്യമെമ്പാടുമുള്ള ആരാധകര്‍ തങ്ങളുടെ ഫോണില്‍ നിന്നും നെറ്റ്ഫ്ലിക്സ് ഒഴിവാക്കിയാണ് ആരാധകര്‍ പ്രതിഷേധം അറിയിച്ചിരിക്കുന്നത്. പ്രഭാസിന്‍റെ 'സാഹോ' എന്ന ചിത്രത്തില്‍ നിന്നും അണിയറപ്രവര്‍ത്തകര്‍ ഒഴിവാക്കിയ രംഗം നെറ്റ്ഫ്ലിക്സ് ഇന്തോനേഷ്യ ഉള്‍പ്പെടുത്തിയതാണ് നെറ്റ്‌ഫ്ലിക്‌സിന് തിരിച്ചടിയായത്.
ഇതിനോടകം തന്നെ നിരവധി പ്രഭാസ് ആരാധകര്‍ നെറ്റ്ഫ്ലിക്സ് അണ്‍ സബ്‌സ്‌ക്രൈബ് ചെയ്‌തു. അണ്‍ സബ്‌സ്‌ക്രൈബ് നെറ്റ്ഫ്ലിക്സ് ഹാഷ്‌ടാഗുകള്‍ ട്വിറ്ററില്‍ ട്രെന്‍ഡായും മാറിയിട്ടുണ്ട്. തങ്ങളുടെ ഫോണുകളില്‍ നിന്നും നെറ്റ്ഫ്ലിക്സ് ആപ്പ് അണ്‍ ഇന്‍സ്‌റ്റോള്‍ ചെയ്‌തതിന്‍റെ ഫോട്ടോയും സോഷ്യല്‍ മീഡിയയില്‍ പ്രചരിക്കുന്നുണ്ട്. ഇതോടെ തങ്ങള്‍ സമ്മര്‍ദ്ദത്തിലായിരിക്കുകയാണെന്ന് കമ്പനി അധികൃതര്‍ അറിയിച്ചിട്ടുണ്ട്.
ഒരേ സമയം തെലുഗുവിലും ഹിന്ദിയിലും റിലീസിനെത്തിയ ചിത്രമാണ് 'സാഹോ'. 2019ലായിരുന്നു റിലീസ്. പൊലിസ് ഉദ്യോഗസ്ഥനായാണ് ചിത്രത്തില്‍ പ്രഭാസ് പ്രത്യക്ഷപ്പെട്ടത്. സുജീത് സംവിധാനം ചെയ്‌ത ചിത്രത്തില്‍ പ്രഭാസിനെ കൂടാതെ ശ്രദ്ധ കപൂര്‍, നീല്‍ നിതിന്‍ മുകേഷ്, ജാക്കി ഷറോഫ്, ചങ്കി പാണ്ഡേ, മഹേഷ് മഞ്ജരേക്കര്‍ എന്നിവരും വേഷമിട്ടിരുന്നു.
ഓം റൗട്ട് സംവിധാനം ചെയ്യുന്ന 'ആദിപുരുഷ്' ആണ് പ്രഭാസിന്‍റേതായി റിലീസിനൊരുങ്ങുന്ന ഏറ്റവും പുതിയ ചിത്രം. ജൂണില്‍ ചിത്രം തിയേറ്ററുകളിലെത്തും.
Also Read: പ്രഭാസുമായുള്ള പ്രണയ വാര്‍ത്തകളില്‍ പ്രതികരിച്ച് കൃതി സനോണ്‍
