ജീത്തു ജോസഫും മോഹൻലാലും ഒരിക്കൽ കൂടി ഒന്നിക്കുന്ന ചിത്രം 'നേര്' ക്രിസ്‌മസ് റിലീസായി പ്രേക്ഷകരിലേക്ക്. ഡിസംബർ 21ന് 'നേര്' തിയേറ്ററുകളിലെത്തുമെന്ന് അറിയിച്ചിരിക്കുകയാണ് അണിയറക്കാർ (Mohanlal Jeethu Joseph Neru Movie releases on December 21). 'എലോണി'ന് ശേഷം തിയേറ്ററുകളിൽ റിലീസിനെത്തുന്ന മോഹൻലാൽ ചിത്രത്തെ വരവേൽക്കാൻ കോപ്പുകൂട്ടുകയാണ് ആരാധകർ.
ജീത്തു ജോസഫിനൊപ്പം ഇത് നാലാം തവണയാണ് മലയാളത്തിന്‍റെ ഇതിഹാസതാരം ഒന്നിക്കുന്നത്. 'ദൃശ്യം' ഉൾപ്പടെ കഴിഞ്ഞ മൂന്ന് സിനിമകളും മികച്ച വിജയം കരസ്ഥമാക്കിയതിനാൽ തന്നെ പ്രേക്ഷകരുടെ പ്രതീക്ഷകളും വാനോളമാണ്. മുൻ സിനിമകളെ പോലെ 'നേരും' മികച്ച ദൃശ്യാനുഭവം സമ്മാനിക്കുമെന്ന പ്രതീക്ഷയിലാണ് ആരാധകരും സിനിമാസ്വാദകരും.
'നേരി'ൽ വക്കീല്‍ വേഷത്തിലാണ് മോഹൻലാൽ പ്രത്യക്ഷപ്പെടുക. 'അധിപൻ', 'ഹരികൃഷ്‌ണൻസ്' എന്നീ ചിത്രങ്ങൾക്ക് ശേഷമാണ് മോഹൻലാൽ ഒരു വക്കീൽ വേഷത്തിൽ എത്തുന്നത് എന്നതും ശ്രദ്ധേയമാണ്. ലീഗൽ ത്രില്ലർ ഡ്രാമയായി അണിയിച്ചൊരുക്കിയ ചിത്രം കോടതിയും വ്യവഹാരവും നിയമ യുദ്ധവുമൊക്കെ തികച്ചും റിയലിസ്റ്റിക്കായാകും പ്രേക്ഷകർക്ക് മുന്നിൽ എത്തിക്കുക. കാഴ്‌ചക്കാരെ ഉദ്വേഗത്തിന്‍റെ മുൾമുനയിൽ നിർത്തുന്നതോടൊപ്പം കുടുംബ ബന്ധങ്ങളുടെ ആഴവും 'നേര്' തിരശീലയിലേക്ക് പകർത്തുമെന്നാണ് വിവരം.
READ ALSO: Mohanlal Joined The Set Of Neru 'നേര്' സെറ്റിലെത്തി മോഹന്‍ലാല്‍; വൈറലായി ലുക്ക്
ആശിർവാദ് സിനിമാസിന്‍റെ ബാനറിൽ ആന്‍റണി പെരുമ്പാവൂർ നിർമിക്കുന്ന ചിത്രത്തിൽ പ്രിയാമണിയാണ് നായിക. സിദ്ദിഖ്, നന്ദു, ദിനേശ് പ്രഭാകർ, ശങ്കർ ഇന്ദുചൂഡൻ, മാത്യു വർഗീസ്, കലേഷ്, രമാദേവി, കലാഭവൻ ജിന്‍റോ, രശ്‌മി അനിൽ, ഡോ. പ്രശാന്ത് എന്നിവരും ഈ ചിത്രത്തിൽ പ്രധാന വേഷങ്ങളിൽ അണിനിരക്കുന്നു. ജീത്തു ജോസഫിനൊപ്പം ശാന്തി മായാദേവിയും ചേർന്നാണ് 'നേരി'ന്‍റെ തിരക്കഥ രചിച്ചിരിക്കുന്നത്.
സതീഷ് കുറുപ്പ് ഛായാഗ്രഹണവും വി എസ് വിനായക് എഡിറ്റിംഗും നിർവഹിച്ചിരിക്കുന്നു. വിനായക് ശശികുമാറിന്‍റെ വരികൾക്ക് ഈണം പകർന്നിരിക്കുന്നത് വിഷ്‌ണു ശ്യാമാണ്. ബോബൻ കലാസംവിധാനം നിർവഹിച്ച ചിത്രത്തിന്‍റെ പ്രൊഡക്ഷൻ കൺട്രോളർ സിദ്ദു പനയ്‌ക്കൽ ആണ്.
READ ALSO: മോഹൻലാൽ - ജീത്തു ജോസഫ് കോംബോ വീണ്ടും; പുതിയ ചിത്രത്തിന്‍റെ ടൈറ്റിൽ പുറത്ത്
കോസ്റ്റ്യൂം ഡിസൈൻ - ലിന്‍റാ ജീത്തു, മേക്കപ്പ് - അമൽ ചന്ദ്ര, ചീഫ് അസോസിയേറ്റ് ഡയറക്‌ടർ - സുധീഷ് രാമചന്ദ്രൻ, അസോസിയേറ്റ് ഡയറക്‌ടർമാർ - സോണി ജി സോളമൻ, എസ് എ ഭാസ്‌കരൻ, അമരേഷ് കുമാർ, സംവിധാന സഹായികൾ - മാർട്ടിൻ ജോസഫ്, ഗൗതം കെ നായർ, അശ്വിൻ സിദ്ധാർഥ്, സൂരജ് സെബാസ്റ്റ്യൻ, രോഹൻ, സെബാസ്റ്റ്യൻ ജോസ്, ആതിര, ജയ് സർവേഷ്യാ, ഫിനാൻസ് കൺട്രോളർ - മനോഹരൻ കെ പയ്യന്നൂർ, പ്രൊഡക്ഷൻ മാനേജേഴ്സ് - ശശിധരൻ കണ്ടാണിശ്ശേരിൽ, പാപ്പച്ചൻ ധനുവച്ചപുരം, പ്രൊഡക്ഷൻ എക്‌സിക്യുട്ടീവ്‌ പ്രണവ് മോഹൻ എന്നിവരാണ് നേരിന്‍റെ മറ്റ് അണിയറ പ്രവർത്തകർ.
