Hridayam remake: പ്രണവ്‌ മോഹന്‍ലാലിനെ നായകനാക്കി വിനീത്‌ ശ്രീനിവാസന്‍ ഒരുക്കിയ ജനപ്രിയ സൂപ്പര്‍ഹിറ്റ്‌ ചിത്രമാണ് 'ഹൃദയം'. 2021ലെ മികച്ച കലാമൂല്യമുള്ള ജനപ്രിയ ചിത്രത്തിനുള്ള കേരള സംസ്ഥാന ചലച്ചിത്ര പുരസ്‌കാരവും 'ഹൃദയ'ത്തിന് ലഭിച്ചിരുന്നു. മലയാളത്തില്‍ വന്‍ വിജയം നേടിയതോടെ ചിത്രം മറ്റ് ഭാഷകളിലേയ്‌ക്കും റീമേക്കിനൊരുങ്ങുകയാണ്. തമിഴ്‌, തെലുങ്ക്‌, ഹിന്ദി എന്നീ ഭാഷകളിലായാണ് 'ഹൃദയം' റീമേക്കിനൊരുങ്ങുന്നത്‌.
Karan Johar to remake Hridayam movie: റീമേക്ക് പ്രഖ്യാപനം മുതല്‍ തന്നെ 'ഹൃദയം' ഹിന്ദി റീമേക്ക് കൂടുതല്‍ ശ്രദ്ധ നേടിയിരുന്നു. കരണ്‍ ജോഹറിന്‍റെ ധര്‍മ പ്രൊഡക്ഷന്‍സും ഫോക്‌സ്‌ സ്‌റ്റാര്‍ സ്‌റ്റുഡിയോസും ചേര്‍ന്നാണ് 'ഹൃദയ'ത്തിന്‍റെ റീമേക്ക് അവകാശങ്ങള്‍ സ്വന്തമാക്കിയിരിക്കുന്നത്. ഹിന്ദി റീമേക്കില്‍ പ്രണവിന് പകരക്കാരനായെത്തുന്നത്‌ ആരെന്ന്‌ ആകാംക്ഷയോടെ ഉറ്റുനോക്കുകയായിരുന്നു നാളിതുവരെയും ആരാധകര്‍. ഇപ്പോള്‍ ഇതുസംബന്ധിച്ച്‌ സ്ഥിരീകരിക്കാത്ത റിപ്പോര്‍ട്ടുകളാണ് പുറത്തുവരുന്നത്‌.
Saif Ali Khan son in Hridayam hindi remake: ബോളിവുഡ്‌ സൂപ്പര്‍താരം സെയ്‌ഫ്‌ അലിഖാന്‍റെ മകന്‍ ഇബ്രാഹിം അലിഖാനെയാണ് ഹിന്ദി റീമേക്കില്‍ നായക സ്ഥാനത്തേയ്‌ക്ക്‌ പരിഗണിക്കുന്നത്‌ എന്നാണ് റിപ്പോര്‍ട്ടുകള്‍. കുറച്ചുനാളായി ഇബ്രാഹിമിന്‍റെ ബോളിവുഡ്‌ അരങ്ങേറ്റത്തെ കുറിച്ച് അഭ്യൂഹങ്ങള്‍ പ്രചരിക്കുകയാണ്. ഇതിനിടെയാണ് 'പ്രണയം' ഹിന്ദി റീമിലേയ്‌ക്ക്‌ ഇബ്രാഹിമിന്‍റെ പേര് പരിഗണിക്കപ്പെട്ടതായുള്ള റിപ്പോര്‍ട്ടുകള്‍ പുറത്തുവരുന്നത്‌. നിലവില്‍ കരണ്‍ ജോഹറിന്‍റെ 'റോക്കി ഓര്‍ റാണി കീ പ്രേം കഹാനി' എന്ന സിനിമയുടെ അസോസിയേറ്റ്‌ ആണ് ഇബ്രാഹിം.
Also Read: 'ഹൃദയം കണ്ടിട്ട്‌ കരണ്‍ ജോഹര്‍ എങ്ങാനും റീമേക്കിന് ചോദിച്ചാലോ?'
Sara Ali Khan bollywood debut: അഞ്ച്‌ വര്‍ഷങ്ങള്‍ക്ക് ശേഷം കരണ്‍ ജോഹര്‍ സംവിധാനം ചെയ്യുന്ന ചിത്രമാണ് 'റോക്കി ഓര്‍ റാണി കീ പ്രേം കഹാനി'. ചിത്രത്തില്‍ രണ്‍വീര്‍ സിങ്‌, ആലിയ ഭട്ട്‌, ധര്‍മ്മേന്ദ്ര, ശബാന ആസ്‌മി, ജയ ബച്ചന്‍ എന്നിവര്‍ അണിനിരക്കുന്നു. ഇബ്രാഹിമിന്‍റെ സഹോദരി സാറ അലിഖാന്‍ നേരത്തെ തന്നെ സിനിമയില്‍ അരങ്ങേറ്റം കുറിച്ചിരുന്നു. 'കേദാര്‍നാഥ്‌' എന്ന ചിത്രത്തിലൂടെയാണ് സാറ സിനിമയിലെത്തുന്നത്‌.
വിനീത്‌ ശ്രീനിവാസന്‍റെ സംവിധാനത്തില്‍ പിറന്ന 'ഹൃദയ'ത്തില്‍ രണ്ട്‌ നായികമാരാണ്. ദര്‍ശന രാജേന്ദ്രനും, കല്യാണി പ്രിയദര്‍ശനും. മെറിലാന്‍ഡ്‌ സ്‌റ്റുഡിയോസിന്‍റെ ബാനറില്‍ വിശാഖ്‌ സുബ്രഹ്‌മണ്യമാണ് നിര്‍മാണം നിര്‍വഹിച്ചത്‌. പ്രണവ്‌ നായകനായെത്തിയ മൂന്നാമത്തെ ചിത്രം കൂടിയാണിത്‌. പ്രണവിന്‍റെ അഭിനയ മികവിനെയും വിനീതിന്‍റെ സംവിധാനത്തെയും അഭിനന്ദിച്ച്‌ ഇതിനോടകം തന്നെ നിരവധി പേര് രംഗത്തെത്തിയിരുന്നു.
Hridayam OTT streaming: ജനുവരി 21ന്‌ തിയേറ്ററുകളിലെത്തിയ ചിത്രം ഒടിടിയിലും റിലീസിനെത്തിയിരുന്നു. ഡിസ്‌നി പ്ലസ്‌ ഹോട്ട്‌സ്‌റ്റാറിലൂടെ ഫെബ്രുവരി 18നാണ് 'ഹൃദയം' സ്‌ട്രീമിംഗ്‌ ആരംഭിച്ചത്‌. പൃഥ്വിരാജ്‌-മോഹന്‍ലാല്‍ ചിത്രം 'ബ്രോ ഡാഡി'ക്ക്‌ ശേഷം ഡിസ്‌നി പ്ലസ്‌ ഹോട്ട്‌ സ്‌റ്റാറില്‍ സ്‌ട്രീമിങ്‌ ആരംഭിച്ച മലയാള ചിത്രമാണ് 'ഹൃദയം'.
