കൊച്ചി: പ്രശസ്‌ത സിനിമ, സീരിയൽ അഭിനേതാവായ കൈലാസ് നാഥ് അന്തരിച്ചു. 65 വയസായിരുന്നു. തമിഴ്, മലയാളം, കന്നഡ ഭാഷകളിൽ ഏകദേശം 180 സിനിമകളിലും വിവിധ ഭാഷകളിലായി 400ലേറെ സീരിയലുകളിലും അഭിനയിച്ചിട്ടുണ്ട്.
കരൾ രോഗ ബാധിതനായി എറണാകുളത്തെ സ്വകാര്യ ആശുപത്രിയിൽ ചികിത്സയിൽ കഴിയുകയായിരുന്നു. രോഗം മൂർച്ഛിച്ചതോടെ ഇന്ന് വൈകിട്ട് മൂന്നരയോടെയാണ് അന്ത്യം. ആദ്യ കാലത്ത് സിനിമയിലും പിന്നീട് മലയാള സീരിയൽ രംഗത്തും ശ്രദ്ധേയമായ അനവധി കഥാപാത്രങ്ങൾ അവതരിപ്പിച്ച താരമായിരുന്നു കൈലാസ് നാഥ്. അഭിനയ രംഗത്ത് സജീവമായി തുടരുന്നതിനിടെയാണ് കരൾ രോഗം ബാധിക്കുന്നത്.
നേരത്തെ ചികിത്സയ്‌ക്ക് പണം ആവശ്യമായി വന്നതോടെ സുമനസുകളുടെ ധനസഹായം അഭ്യർഥിച്ചിരുന്നു. എന്നാൽ, രോഗം ചികിത്സിച്ച് ഭേദമാക്കാൻ കഴിയും മുൻപ് തന്നെ അദ്ദേഹം രംഗമൊഴിഞ്ഞു. മാന്നാർ ആണ് ജന്മദേശം. മദ്രാസ് ക്രിസ്ത്യൻ കോളജിൽ അഭിനയ വിഭാഗത്തിൽ ലക്‌ചറർ ആയി സേവനം അനുഷ്‌ഠിച്ചിട്ടുണ്ട്. 'വിടരുന്ന മൊട്ടുകൾ' എന്ന ചിത്രത്തിലൂടെ ബാലതാരമായി ആണ് അദ്ദേഹത്തിന്‍റെ സിനിമ പ്രവേശം. 'ഇത് നല്ല തമാശ' എന്ന പേരിൽ 1985ൽ ഒരു ചലച്ചിത്രവും സംവിധാനം ചെയ്‌തിട്ടുണ്ട്. ശ്രീകുമാരൻ തമ്പിയുടെ അസോസിയേറ്റ് ആയും ദീർഘകാലം പ്രവർത്തിച്ചു.
സിനിമതാരം എന്നതിലുപരി സീരിയലിലൂടെയാണ് കൈലാസ് നാഥ് കൂടുതൽ പ്രേക്ഷക ശ്രദ്ധയാർജിക്കുന്നത്. മിന്നുകെട്ട്, എന്‍റെ മാനസപുത്രി, പ്രണയം, മനസറിയാതെ തുടങ്ങി നിരവധി സീരിയലുകളിൽ അദ്ദേഹം വേഷമിട്ടു. 1977ൽ പുറത്തിറങ്ങിയ 'സംഗമം' എന്ന ചിത്രത്തിലൂടെ ശ്രദ്ധിക്കപ്പെട്ട അദ്ദേഹം ചിരഞ്ജീവി, ശങ്കർ, ശ്രീനാഥ്, നാസർ എന്നിവർക്കൊപ്പമാണ് ഫിലിം ഇൻസ്റ്റിറ്റ്യൂട്ടിൽ പഠനം പൂർത്തിയാക്കിയത്.
ഒരുകാലത്ത് തമിഴിലും ഏറെ ആരാധകരുള്ള താരമായിരുന്നു കൈലാസ് നാഥ്. 'ഒരു തലൈ രാഗം' എന്ന തമിഴ് ചിത്രമാണ് ഇദ്ദേഹത്തെ തമിഴ് സിനിമ ലോകത്ത് ശ്രദ്ധേയനാക്കിയത്. ബമ്പർ ഹിറ്റായി മാറിയ ഈ സിനിമയ്‌ക്ക് പിന്നാലെ കൈലാസ് നാഥനെ തേടി നിരവധി ചിത്രങ്ങളും എത്തി. തമിഴിൽ ഇദ്ദേഹം വേഷമിട്ട 'പാലവനൈ ചോല' എന്ന ചിത്രത്തിലെ കഥാപാത്രവും ഏറെ ശ്രദ്ധിക്കപ്പെട്ടിരുന്നു. തമിഴിൽ തൊണ്ണൂറിലധികം ചിത്രങ്ങളിൽ വേഷമിട്ടിട്ടുണ്ട്.
മലയാളത്തിലും നിരവധി ചിത്രങ്ങളിലെ ശ്രദ്ധേയ പ്രകടനം ഇദ്ദേഹത്തിന് കൈയ്യടി നേടിക്കൊടുത്തു. സേതുരാമയ്യർ സിബിഐയിലെ സ്വാമിയും സ്വന്തമെന്ന പദത്തിലെ കൊച്ചു കുട്ടനും ഇരട്ടി മധുരത്തിലെ സുമനുമെല്ലാം മലയാളിക്ക് എന്നും ഓർമയില്‍ തങ്ങി നിൽക്കുന്ന കഥാപാത്രങ്ങളാണ്. ശ്രീനാരായണ ഗുരുവിലെ ചട്ടമ്പി സ്വാമികളായും ശരവർഷത്തിലെ അയ്യരായും ഒക്കെ നിരവധി മലയാള ചിത്രങ്ങളിൽ അദ്ദേഹം അഭിനയിച്ചു.
നടി സീമ ജി നായര്‍ അടക്കമുള്ള സഹപ്രവര്‍ത്തകര്‍ നടന്‍റെ വിയോഗത്തില്‍ അനുശോചനം അറിയിച്ച് രംഗത്തു വന്നു. അജിത കൈലാസ് പത്നിയാണ്. മകൾ ധന്യ കൈലാസ്. കൈലാസ് നാഥന്‍റെ സംസ്‌കാര ചടങ്ങുകൾ നാളെ (വെള്ളിയാഴ്‌ച) നടക്കും.
READ ALSO: നടന്‍ കൊല്ലം സുധി വാഹനാപകടത്തിൽ മരിച്ചു; അപകടം പരിപാടി കഴിഞ്ഞ് മടങ്ങവെ
