മധുര (തമിഴ്‌നാട്) : സിനിമ താരങ്ങളായ പ്രകാശ് രാജ്, ബോബി സിംഹ എന്നിവര്‍ക്കെതിരായ പൊതുതാത്‌പര്യ ഹര്‍ജിയില്‍ ഹൈക്കോടതിയില്‍ വിശദീകരണം നല്‍കി സര്‍ക്കാര്‍. കൊടൈക്കനാലിലെ താരങ്ങളുടെ ആഢംബര ബംഗ്ലാവുകളുടെ നിര്‍മാണവുമായി ബന്ധപ്പെട്ട ഹര്‍ജിയിലാണ് തമിഴ്‌നാട് സര്‍ക്കാര്‍ വിശദീകരണം നല്‍കിയത് (luxury bungalows construction case against Prakash Raj and Bobby Simha). ബംഗ്ലാവുകളുടെ നിര്‍മാണ പ്രവര്‍ത്തനം നിര്‍ത്തിവച്ചതായും താരങ്ങള്‍ക്കെതിരെ നിയമ നടപടി ആരംഭിച്ചതായും സര്‍ക്കാര്‍ വ്യക്തമാക്കി.
ദിണ്ടിഗല്‍ സ്വദേശിയായ മുഹമ്മദ് ജുനൈദ് ആണ് നടന്‍മാര്‍ക്കെതിരെ കോടതിയെ സമീപിച്ചത്. കൊടൈക്കനാല്‍ വില്‍പട്ടിയില്‍ പ്രകാശ് രാജും ബോബി സിംഹയും ചേര്‍ന്ന് ആഢംബര ബംഗ്ലാവുകള്‍ പണിതത് ശരിയായ അനുമതി ഇല്ലാതെയാണ് എന്ന് ഹര്‍ജിക്കാരന്‍ പറഞ്ഞു (case against actors Prakash Raj and Bobby Simha). അനധികൃതമായ നിര്‍മാണം പ്രദേശത്ത് മണ്ണിടിച്ചിലിന് കാരണമാകുമെന്നും സമീപത്തെ വീടുകള്‍ക്ക് ഭീഷണി ആകുമെന്നും ജുനൈദ് ഹര്‍ജിയില്‍ ആരോപിക്കുന്നു. കൊടൈക്കനാല്‍ മുനിസിപ്പാലിറ്റിയില്‍ നിന്ന് ആവശ്യമായ അനുമതി താരങ്ങള്‍ കൈപ്പറ്റാതെയാണ് ബംഗ്ലാവുകളുടെ നിര്‍മാണം നടത്തിയതെന്നും ആരോപണം ഉണ്ട്.
കൂടാതെ പരിസ്ഥിതി നിയമങ്ങള്‍ ലംഘിച്ച്, യന്ത്രങ്ങള്‍ ഉപയോഗിച്ച് മലയില്‍ നിന്ന് പാറകള്‍ നീക്കം ചെയ്‌തതായും പറയപ്പെടുന്നു. മധുര ഹൈക്കോടയില്‍ ജസ്റ്റിസുമാരായ കൃഷ്‌ണ കുമാര്‍, വിജയ കുമാര്‍ എന്നിവര്‍ അടങ്ങിയ ബെഞ്ചാണ് ഹര്‍ജി പരിഗണിച്ചത്. ബംഗ്ലാവുകളുടെ നിര്‍മാണം നിര്‍ത്തിവച്ചത് രേഖപ്പെടുത്തിയ ജഡ്‌ജി, പ്രകാശ് രാജ്, ബോബി സിംഹ എന്നിവര്‍ക്കെതിരെ സ്വീകരിച്ച നിയമ നടപടി സംബന്ധിച്ച് റിപ്പോര്‍ട്ട് സമര്‍പ്പിക്കാന്‍ നിര്‍ദേശം നല്‍കി. കേസ് വീണ്ടും പരിഗണിക്കുന്നതിനായി ജനുവരി ഒന്‍പതിലേക്ക് മാറ്റി.
ആരോപിക്കപ്പെട്ടിരിക്കുന്ന കാര്യങ്ങള്‍ ഗൗരവം ഉള്ളതാണെന്നും, പരിസ്ഥിതി ലോല പ്രദേശമായ കൊടൈക്കനാലില്‍ നിര്‍മാണ ചട്ടങ്ങള്‍ ലംഘിച്ചു എന്ന ആരോപണം കണക്കിലെടുത്ത് അന്വേഷണം നടത്തി വിശദമായ റിപ്പോര്‍ട്ട് സമര്‍പ്പിക്കണമെന്നും കോടതി നിര്‍ദേശം നല്‍കിയിട്ടുണ്ട്. പരിസ്ഥിതിയെ സംരക്ഷിക്കുന്നതിനും പ്രദേശത്തെ ജനങ്ങള്‍ക്ക് ഉണ്ടാകാനിടയുള്ള അപകട സാധ്യതകള്‍ കണക്കിലെടുത്ത് സ്ഥാപിതമായ നിയമങ്ങള്‍ പാലിക്കപ്പെടേണ്ടതാണെന്നും കോടതി നിരീക്ഷിച്ചു.
Also Read: പ്രകാശ് രാജിനും ഇഡിയുടെ കുരുക്ക്; ജ്വല്ലറി നിക്ഷേപ തട്ടിപ്പ് കേസിൽ സമൻസ്
പ്രണവ് ജ്വല്ലറി നിക്ഷേപ തട്ടിപ്പ് കേസില്‍ ഇക്കഴിഞ്ഞ നവംബറില്‍ പ്രകാശ് രാജ് ഇഡി നടപടി നേരിട്ടിരുന്നു. ഇഡിയുടെ ചെന്നൈ ഓഫിസിൽ നേരിട്ട് ഹാജരാകണമെന്ന് കാണിച്ചായിരുന്നു ഏജന്‍സി നടന് നോട്ടിസ് നല്‍കിയത്. തിരുച്ചിറപ്പള്ളി ആസ്ഥാനമാക്കിയുള്ള പ്രണവ് ജ്വല്ലറിയുടെ ബ്രാൻഡ് അംബാസിഡർ ആയിരുന്നു പ്രകാശ് രാജ്.
നൂറ് കോടിയുടെ നിക്ഷേപ തട്ടിപ്പ് കേസാണ് ജ്വല്ലറി ഗ്രൂപ്പിനെതിരെയുള്ളത്. സ്വർണ നിക്ഷേപ സ്‌കീം (പോൺസി) എന്ന പേരിൽ വലിയ തുക തിരിച്ച് നൽകുമെന്ന് വാഗ്‌ദാനം ചെയ്‌ത് ജനങ്ങളിൽ നിന്ന് നൂറ് കോടിയോളം രൂപ തട്ടിയെന്നാണ് കേസ്. നിക്ഷേപകർക്ക് ഇവർ നിക്ഷേപിച്ച തുക തിരികെ നൽകിയിട്ടില്ലെന്ന് ഇഡി പ്രസ്‌താവനയിൽ വ്യക്തമാക്കി.
