Archana Kavi against Kerala Police: രാത്രി യാത്രയ്‌ക്കിടെ കേരള പൊലീസിന്‍റെ ഭാഗത്ത് നിന്നുണ്ടായ ദുരനുഭവം പങ്കുവച്ച്‌ നടി അര്‍ച്ചന കവി. സുഹൃത്തിനും കുടുംബത്തിനുമൊപ്പം രാത്രി വീട്ടില്‍ നിന്നും വരുന്ന വഴിയിലാണ് അര്‍ച്ചനയ്‌ക്ക് പൊലീസില്‍ നിന്നും മോശം അനുഭവം ഉണ്ടായത്‌. സ്‌ത്രീകള്‍ മാത്രമായി ഓട്ടോയില്‍ യാത്ര ചെയ്‌ത തങ്ങളെ തടഞ്ഞു നിര്‍ത്തി ചോദ്യം ചെയ്യുകയായിരുന്നുവെന്ന് നടി സോഷ്യല്‍ മീഡിയയില്‍ കുറിച്ചു. ഇന്‍സ്‌റ്റഗ്രാം സ്‌റ്റോറിയിലൂടെയായിരുന്നു അര്‍ച്ചന ഇക്കാര്യം പങ്കുവച്ചത്‌.
Archana Kavi Instagram story:'ഈ സമയത്ത് യാത്ര ചെയ്യുന്നത്‌ തെറ്റാണോ? ജെസ്‌നയും ഞാനും അവളുടെ കുടുംബവും മിലാനോയില്‍ നിന്ന് തിരിച്ചുവരികയായിരുന്നു. ചില പൊലീസ് ഉദ്യോഗസ്ഥര്‍ ഞങ്ങളെ നിര്‍ത്തി ചോദ്യം ചെയ്‌തു. ഓട്ടോയില്‍ യാത്ര ചെയ്‌തിരുന്ന ഞങ്ങളെല്ലാം സ്‌ത്രീകളായിരുന്നു. അവര്‍ പരുക്കന്‍ ഭാഷയിലാണ് പെരുമാറിയത്‌.
ഞങ്ങള്‍ക്കത്‌ ഒട്ടും സുരക്ഷിതമായി തോന്നിയില്ല. ഞങ്ങള്‍ വീട്ടില്‍ പോവുകയാണ് എന്ന് പറഞ്ഞപ്പോള്‍, എന്തിനാണ് വീട്ടില്‍ പോകുന്നത്‌ എന്നാണ് അവര്‍ ചോദിച്ചത്‌. ചോദ്യം ചെയ്യുന്നതില്‍ എനിക്ക്‌ പ്രശ്‌നമൊന്നുമില്ല. എന്നാല്‍ അതിന് ഒരു രീതിയുണ്ട്‌. ഇത്‌ വളരെ അധികം അസ്വസ്ഥതപ്പെടുത്തുന്നതായിരുന്നു. ഞങ്ങള്‍ക്ക്‌ ഒരു പ്രശ്‌നമുണ്ടാകുമ്പോള്‍ ഞങ്ങള്‍ അവരുടെ അടുത്തേയ്‌ക്ക്‌ പോരണമെന്ന് അവര്‍ ആഗ്രഹിക്കുന്നു.'- അര്‍ച്ചന കവി കുറിച്ചു.
Also Read:'പെണ്‍മക്കള്‍ അറവുമാടുകള്‍ അല്ല; ഇനിയെങ്കിലും പഠിക്ക്‌, ഒരടിയും നിസാരമല്ല!'
