കാസര്‍കോട്: പ്രവാസിയെ തട്ടിക്കൊണ്ടുപോയി കൊലപ്പെടുത്തിയ സംഭവത്തിലെ പ്രതികള്‍ പൈവളിഗെയിലെ ക്വട്ടേഷന്‍ സംഘമെന്ന് പൊലീസ് നിഗമനം. കൊച്ചി ബ്യൂട്ടിപാര്‍ലര്‍ വെടി വയ്പ്പ് കേസിലെ പ്രതി സിയയുടെ സംഘമാണിതെന്നാണ് പ്രാഥമിക നിഗമനം. ബ്യൂട്ടി പാര്‍ലര്‍ വെടി വയ്പ്പ് കേസില്‍ അറസ്റ്റിലായ സിയ വിയ്യൂർ സെൻട്രൽ ജയിലിൽ റിമാൻഡില്‍ കഴിയുകയാണ്.
കാസർകോട്‌, മംഗളൂരു എന്നിവിടങ്ങളിൽ കൊല, തട്ടികൊണ്ടുപോകൽ, കൊലപാതക ശ്രമം, കൊള്ള തുടങ്ങിയ നിരവധി കേസുകളിൽ പ്രതിയാണ്‌ സിയ. സംഘത്തിലെ മൂന്ന് പേര്‍ക്ക് സിദ്ധിക്കിന്‍റെ കൊലപാതകത്തില്‍ നേരിട്ട് പങ്കെുണ്ടെന്നാണ് പൊലീസിന് ലഭിച്ച വിവരം. കൊലപാതകത്തിന് ശേഷം ഗുണ്ട സംഘം കണ്ണൂർ, കോഴിക്കോട്, കർണാടക ഭാഗത്തേക്ക് കടന്നു.
40 ലക്ഷം രൂപയുടെ വിദേശ കറന്‍സി, സ്വര്‍ണക്കടത്ത് എന്നിവയുമായി ബന്ധപ്പെട്ട കാര്യങ്ങളാണ് സിദ്ധിഖിന്‍റെ കൊലപാതകത്തിന് പിന്നില്ലെന്ന് പൊലീസ് പറഞ്ഞു. മര്‍ദനത്തില്‍ തലക്കേറ്റ ക്ഷതമാണ് മരണകാരണമെന്നാണ് പ്രാഥമിക റിപ്പോര്‍ട്ടില്‍ പറയുന്നത്. കൊല്ലപ്പെട്ട സിദ്ധിഖ് വിദേശത്തേക്ക് പണം കടത്തുന്നതിനായുള്ള ഇടനിലക്കാരനായിരുന്നുവെന്ന് പൊലീസ് കണ്ടെത്തിയിട്ടുണ്ട്.
ഇതേ തുടർന്നുണ്ടായ തർക്കമാണ് കൊലപാതകത്തിൽ കലാശിച്ചത്. ക്വട്ടേഷൻ നൽകിയത് ഉപ്പള സ്വദേശിയാണെന്ന സൂചനയാണ് ലഭിക്കുന്നതെന്നും പൊലീസ് പറഞ്ഞു. കഴിഞ്ഞ ദിവസമാണ് പ്രവാസിയായ പുത്തിഗെ മുഗു സ്വദേശി അബൂബക്കർ സിദ്ധിഖിനെ നാട്ടിലേക്ക് വിളിച്ച് വരുത്തി തട്ടിക്കൊണ്ട് പോയി കൊലപ്പെടുത്തിയത്.
കൊലപാതകത്തിന് ശേഷം സിദ്ധിഖിനെ ആശുപത്രിയില്‍ ഉപേക്ഷിച്ചാണ് സംഘം കടന്ന് കളഞ്ഞത്. സിദ്ധിക്കിനൊപ്പം സഹോദരന്‍ അന്‍വറിനെയും സുഹൃത്ത് അന്‍സാറിനെയും ബന്ദികളാക്കി സംഘം മര്‍ദിച്ചിട്ടുണ്ടെന്നാണ് വിവരം. പൈവളിഗെയിലെ സിയയുടെ പഴയ വീട്ടിലാണ് മൂവരെയും ബന്ദികളാക്കിയെന്നാണ് വിവരം.
ജില്ല പൊലീസ് മേധാവി വൈഭവ് സക്സേനയുടെ നേതൃത്വത്തിലുള്ള പതിനാലാംഗ പ്രത്യേക സംഘമാണ് കേസ് അന്വേഷിക്കുന്നത്.
also read:പൊലീസ് ക്വാട്ടേഴ്‌സിലെ കൂട്ടമരണം : റെനീസിന്‍റെ പെൺസുഹൃത്ത് റിമാന്‍ഡില്‍
