തിരുവനന്തപുരം: അഞ്ച് പേര്‍ക്ക് ഒമിക്രോണ്‍ സ്ഥിരീകരിച്ചതോടെ അതീവജാഗ്രതയില്‍ സംസ്ഥാനം. ഒമിക്രോണ്‍ സ്ഥിരീകരിച്ചവരുമായി സമ്പര്‍ക്കത്തില്‍ വന്നവര്‍ക്ക് ഇന്ന് പരിശോധന നടത്തും. രോഗബാധിതരുമായി നേരിട്ട് സമ്പര്‍ക്കത്തില്‍ വന്നവരില്‍ ലക്ഷണങ്ങളുള്ളവര്‍ക്കാണ് പരിശോധന.
ആദ്യം കൊവിഡ് പരിശോധനയാണ് നടത്തുക. കൊവിഡ് പോസിറ്റീവാകുകയാണെങ്കില്‍ സാമ്പിള്‍ ജനിതക ശ്രണീകരണത്തിനയയ്ക്കും. വിപുലമായ സമ്പര്‍ക്കപട്ടിക തയാറാക്കി പരിശോധന നടത്താനാണ് ആരോഗ്യവകുപ്പിന്‍റെ ശ്രമം. ഒമിക്രോണിന്‍റെ അതിതീവ്രവ്യാപന ശേഷി കണക്കിലെടുത്താണ് വിപുലമായ സമ്പര്‍ക്കപട്ടിക തയാറാക്കുന്നത്.
ആദ്യം സ്ഥിരീകരിച്ചത് ബ്രിട്ടണിൽ നിന്നെത്തിയ ആൾക്ക്
സംസ്ഥാനത്ത് ആദ്യം ബ്രിട്ടണില്‍ നിന്നെത്തിയ എറണാകുളം സ്വദേശിക്കാണ് ഒമിക്രോണ്‍ സ്ഥിരീകരിച്ചത്. ഇയാളുമായി സമ്പര്‍ക്കത്തില്‍ വന്ന ഭാര്യയ്ക്കും ഭാര്യമാതാവിനും ഇന്നലെ ഒമിക്രോണ്‍ സ്ഥിരീകരിച്ചു. ബ്രിട്ടനില്‍ നിന്ന് അബുദബി വഴി കൊച്ചിയിലെത്തിയ ഇയാൾക്ക് ഞായറാഴ്‌ചയാണ് ഒമിക്രോണ്‍ സ്ഥിരീകരിച്ചത്. ഇദ്ദേഹവും ഭാര്യയും ഒരുമിച്ചാണ് വിദേശത്തുനിന്നെത്തിയത്.
വിമാനത്താവളത്തിലെ റാപ്പിഡ് ആര്‍ടിപിസിആര്‍ പരിശോധനയില്‍ പോസിറ്റീവായിരുന്നില്ല. വീട്ടിലെത്തിയതിനു ശേഷം ലക്ഷണങ്ങളുണ്ടായതിനെ തുടര്‍ന്നു നടത്തിയ പരിശോധനയിലാണു ഭര്‍ത്താവ് കൊവിഡ് പോസിറ്റീവായത്. പിന്നീട് സാംപിള്‍ ജനിതക ശ്രേണീകരണത്തിനായി അയക്കുകയായിരുന്നു.
ആകെ രോഗബാധിതർ അഞ്ച്
കോംഗോയില്‍ നിന്നെത്തിയ എറണാകുളം സ്വദേശിയും യുകെയില്‍ നിന്നെത്തിയ തിരുവനന്തപുരം സ്വദേശിനിയുമാണ് ഒമിക്രോണ്‍ ബാധിച്ച മറ്റുള്ളവര്‍. കോംഗോയില്‍ നിന്ന് കൊച്ചിയിലെത്തിയ ആളെ ഹൈ റിസ്‌ക് രാജ്യത്തില്‍ നിന്ന് അല്ലാത്തതിനാല്‍ വിമാനത്താവളത്തില്‍ പരിശോധിച്ചിരുന്നില്ല. വീട്ടില്‍ ക്വാറന്‍റൈനിലിരിക്കെ ലക്ഷണങ്ങളെ തുടര്‍ന്നു പരിശോധിച്ചു. ഇന്നലെ ഒമിക്രോണ്‍ സ്ഥിരീകരിച്ചതോടെ അമ്പലമുകളിലെ കൊവിഡ് ചികിത്സ കേന്ദ്രത്തിലേക്കു മാറ്റി.
ബ്രിട്ടനില്‍ നിന്ന് കഴിഞ്ഞ ദിവസം തിരുവനന്തപുരം വിമാനത്താവളത്തിലെത്തിയ ഉള്ളൂര്‍ പോങ്ങുംമൂട് സ്വദേശിയായ യുവതി ഇപ്പോള്‍ തിരുവനന്തപുരം ജനറല്‍ ആശുപത്രിയിലാണ് ചികിത്സയിലുള്ളത്. ഇവരുടെയെല്ലാം ആരോഗ്യം തൃപ്‌തികരമാണെന്ന് ആരോഗ്യ വകുപ്പ് അറിയിച്ചു.
ALSO READ: OMICRONE: കേരളത്തില്‍ നാല് പേർക്ക് കൂടി ഒമിക്രോൺ, ആകെ രോഗബാധിതർ അഞ്ച്
കേരളത്തിലെ കൊവിഡ് മരണങ്ങള്‍ പരിശോധിക്കാന്‍ ഡല്‍ഹിയില്‍ നിന്നെത്തിയ കേന്ദ്ര സംഘം ഇന്ന് ആരോഗ്യ വകുപ്പ് ഡയറക്‌ടര്‍ ഉള്‍പ്പെടെ ഉന്നത ഉദ്യോഗസ്ഥരുമായി കൂടിക്കാഴ്‌ച നടത്തും. കൊവിഡ് മരണങ്ങള്‍ സംബന്ധിച്ച കേസ് ഷീറ്റുകള്‍ കഴിഞ്ഞ ദിവസം സംഘം പരിശോധിച്ചിരുന്നു. ഇതില്‍ വ്യക്തത വരുത്താനാണ് ഇന്നത്തെ കൂടിക്കാഴ്‌ച.
