തിരുവനന്തപുരം : രാജ്യാന്തര ഡോക്യുമെന്‍ററി ഹ്രസ്വചലച്ചിത്രമേളയുടെ അഞ്ചാം ദിനത്തിൽ കയ്യടി നേടി ലൂയി ക്ലോസ്റ്റർ സംവിധാനം ചെയ്‌ത 'സ്ട്രേഞ്ചർ ദാൻ റോട്ടർഡാം വിത്ത് സാറാ ഡ്രൈവർ' എന്ന ആനിമേഷൻ ചിത്രം. 2022 ലെ സൺഡാൻസ് ഫിലിം ഫെസ്റ്റിവലിൽ സ്പെഷ്യൽ ജൂറി അവാർഡ് നേടിയ ഹ്രസ്വ ചിത്രമാണിത്.
സംവിധായികയും നിർമാതാവും ജിം ജാർമുഷിന്‍റെ ഭാര്യയുമായ സാറാ ഡ്രൈവർ ഏറെ വിവാദം സൃഷ്‌ടിച്ച കോക്ക്‌സക്കർ ബ്ലൂസ് എന്ന ഡോക്യുമെന്‍ററിയുടെ അവശേഷിക്കുന്ന ഏക പകർപ്പ് റോട്ടർഡാം ഫെസ്റ്റിവലിലേയ്ക്ക് കടത്തിക്കൊണ്ടുപോയിരുന്നു. ഇതിന്‍റെ രസകരമായ കഥ അനിമേഷനിലൂടെ പ്രക്ഷകരിലേക്ക് എത്തിക്കുകയാണ് സംവിധായകൻ ലൂയി ക്ലോസ്റ്റർ.
1993-1994 വർഷങ്ങളിൽ കിഴക്കൻ ചൈനയിൽ നിന്നും പടിഞ്ഞാറൻ ചൈനയിൽ നിന്നും ഒപ്പിയെടുത്ത ദൃശ്യങ്ങളിലൂടെ ചൈനീസ് നാഗരികതയുടെ ഉത്ഭവത്തിന്‍റെ വേരുകൾ തേടുന്ന ചിത്രം 'വാട്ട് എബൗട്ട് ചൈന'യാണ് മേളയിലെ മറ്റൊരു പ്രധാന ആകർഷണം. ട്രിൻഹ് ടി മിൻഹ് ഹാ ആണ് ചിത്രത്തിന്‍റെ സംവിധാനം. സർഗാത്മക ആവിഷ്‌കരണങ്ങളിലൂടെ ഐക്യം നിലനിർത്തിപ്പോരുന്ന ചൈനയെ ദൃശ്യവത്കരിക്കുകയാണ് ചിത്രത്തിൽ.
അദേല കോംസി സംവിധാനം ചെയ്‌ത 'ഇന്‍റൻസീവ് ലൈഫ് യൂണിറ്റ്' എന്ന ചിത്രം സാങ്കേതിക മികവും കഥാവിശേഷവും കൊണ്ട് ശ്രദ്ധേയമായി. മൂന്ന് വർഷം കൊണ്ട് പ്രാഗിലെ ചാൾസ് സ്ക്വയറിലുള്ള ജനറൽ യൂണിവേഴ്‌സിറ്റി ആശുപത്രിയിലെ പാലിയേറ്റീവ് കെയറിലെ ജീവിതം ഒപ്പിയെടുക്കുകയാണ് സംവിധായിക. ചിത്രത്തിന് മികച്ച പ്രേക്ഷക പ്രതികരണമാണ് ലഭിച്ചത്.
അനസ്‌താഷ്യ വെബർ സംവിധാനം ചെയ്‌ത 'ട്രാപ്പ്' എന്ന റഷ്യൻ ചിത്രവും അഞ്ചാം ദിനം പ്രേക്ഷകരെ ഹരം കൊള്ളിച്ചു. ചിത്രത്തിലെ കഥാപാത്രമായ സാഷ തന്‍റെ സഹോദരിയെ അമിതമായി സ്നേഹിക്കുകയും അതേസമയം വെറുക്കുകയും ചെയ്യുന്നു. ഒളിമ്പിക് റിസർവ് സ്‌കൂളിലെ തന്‍റെ സഹപാഠിയിൽ നിന്ന് താൻ സ്നേഹിക്കുന്ന പെൺകുട്ടിയുടെ സ്നേഹം പിടിച്ചെടുക്കാൻ അവർ ശ്രമിക്കുന്നതും സാഹചര്യം സങ്കീർണമാകുന്നതുമാണ് ചിത്രത്തിന്‍റെ കഥാപശ്ചാത്തലം.
ബെസ്റ്റ് ഓഫ് ദി വേൾഡ് വിഭാഗത്തിൽ പ്രദർശിപ്പിച്ച ചിത്രങ്ങൾക്കും പ്രേക്ഷകർ മികച്ച അഭിപ്രായമാണ് രേഖപ്പെടുത്തിയത്.
