കരാറുകാരോട് നേരിട്ട് പരാതി പറയാം ; ഇന്നുമുതൽ റോഡുകളിൽ ഡിഎപി

പരിപാലന കാലാവധിയുള്ള റോഡുകളിൽ കരാറുകാരുടെ പേര്, ഫോണ്‍ നമ്പർ എന്നിവയുൾപ്പടെ മുഴുവൻ വിവരങ്ങളും പ്രസിദ്ധീകരിക്കും

തിരുവനന്തപുരം : സംസ്ഥാനത്തെ പൊതുമരാമത്ത് റോഡുകളുടെ പരിപാലന കാലാവധി റോഡിൽ പ്രദർശിപ്പിക്കുന്ന പദ്ധതിയുടെ സംസ്ഥാനതല ഉദ്ഘാടനം ഇന്ന്. തിരുവനന്തപുരം മസ്‌കറ്റ് ഹോട്ടലിൽ നടക്കുന്ന ചടങ്ങിൽ മന്ത്രി പി എ മുഹമ്മദ് റിയാസ് ഉദ്ഘാടനം ചെയ്യും. നടൻ ജയസൂര്യ ചടങ്ങിൽ പങ്കെടുക്കും.

പരിപാലന കാലാവധിയുള്ള (DLP - Defect Liability Period) റോഡുകളുടെ കരാറുകാരുടെ പേര്, പരിപാലന കാലാവധി, കരാറുകാരൻ്റെ ഫോൺ നമ്പർ, ചുമതലപ്പെട്ട ഉദ്യോഗസ്ഥൻ്റെ ഫോൺ നമ്പർ എന്നിവയാണ് പ്രദർശിപ്പിക്കുക. ഇതുവഴി പൊതുജനങ്ങൾക്കും ജനപ്രതിനിധികൾക്കും നേരിട്ട് കരാറുകാരനെ വിവരമറിയിച്ച് റോഡിൻ്റെ അറ്റകുറ്റപ്പണികൾ വേഗത്തിലാക്കുകയാണ് സർക്കാർ ലക്ഷ്യമിടുന്നത്.

നേരത്തെ റോഡുകളുടെ ഡിഫക്‌ട് ലയബിലിറ്റി പിരീഡ് (DLP) വെബ്സൈറ്റിൽ പ്രസിദ്ധപ്പെടുത്തിയിരുന്നു. വകുപ്പിന് കീഴിലെ എല്ലാ വിഭാഗങ്ങളിലെ പ്രവൃത്തികളുടെയും ഡിഎൽപി വെബ്സൈറ്റിൽ പ്രസിദ്ധീകരിച്ചിരുന്നു.