ബിജെപി മരംമുറി ഏറ്റുപിടിക്കുന്നത് കുഴല്‍പ്പണത്തില്‍ ക്ഷതമേറ്റതിനാലെന്ന് വിജയരാഘവൻ

നിയമവിരുദ്ധ പ്രവർത്തനം നടത്തിയവർക്കെതിരെ സർക്കാർ കർശന നടപടി സ്വീകരിക്കുമെന്ന് എ വിജയരാഘവൻ.

തിരുവനന്തപുരം : മുട്ടിൽ മരംമുറി കേസ് സംബന്ധിച്ച് പ്രതികരണവുമായെത്തിയ ബിജെപിക്കെതിരെ സിപിഎം സംസ്ഥാന സെക്രട്ടറി എ. വിജയരാഘവൻ. കൊടകര കുഴൽപ്പണ കേസിൽ ക്ഷതമേറ്റതുകൊണ്ടാണ് ബിജെപി മരംമുറി വിഷയത്തില്‍ രംഗത്തെത്തിയിരിക്കുന്നതെന്ന് അദ്ദേഹം ആരോപിച്ചു.

കുഴൽപ്പണ കേസ് ജനങ്ങളോട് വിശദീകരിക്കാൻ ബിജെപിക്കായില്ല. ആ പാര്‍ട്ടിയുടെ വിശ്വാസ്യത തകർന്നു. ജനങ്ങളെ അഭിമുഖീകരിക്കാൻ പോലും കഴിയാതായി. സംസ്ഥാന പ്രസിഡന്‍റ് ഉൾപ്പെടെയുള്ളവർക്ക് നേരെയാണ് അന്വേഷണത്തിന്‍റെ മുന നീങ്ങുന്നത്.

കുഴൽപ്പണക്കേസിൽ ഒന്നും പറയാനില്ലാത്തത് കൊണ്ട് ബിജെപി വേറെ ചിലത് പറയുകയാണ്. നിയമവിരുദ്ധ പ്രവർത്തനം നടത്തിയവർക്കെതിരെ സർക്കാർ കർശന നടപടി സ്വീകരിക്കുമെന്നും എ വിജയരാഘവൻ പറഞ്ഞു.