പാലക്കാട് അമ്മയും കുഞ്ഞും മരിച്ച സംഭവം; പോസ്റ്റ്‌മോർട്ടം നടത്തിയ ഡോക്‌ടറുടെ മൊഴി രേഖപ്പെടുത്തി പൊലീസ്

പ്രസവത്തിനായാണ് ഐശ്വര്യയെ വെസ്‌റ്റ്‌ യാക്കരയിലെ സ്വകാര്യ ആശുപത്രിയിൽ പ്രവേശിപ്പിച്ചത്. തുടർന്ന് ശനിയാഴ്‌ച രാത്രിയാണ് കുഞ്ഞ് മരിച്ചത്. തിങ്കളാഴ്‌ച രാവിലെ അമ്മ ഐശ്വര്യയും മരിച്ചു. ഇതിന് പിന്നാലെയാണ് ഡോക്‌ടര്‍മാര്‍ക്ക് എതിരെ നടപടി എടുക്കണമെന്ന് ആവശ്യപ്പെട്ട് ബന്ധുക്കൾ പ്രതിഷേധവുമായി എത്തിയത്

പാലക്കാട്: പ്രസവത്തിനിടെ കുഞ്ഞും പിന്നാലെ അമ്മയും മരിച്ച സംഭവത്തിൽ പോസ്റ്റ്‌മോർട്ടം നടത്തിയ ഡോക്‌ടറുടെ മൊഴി രേഖപ്പെടുത്തി പൊലീസ്. ഡിവൈഎസ്‌പി പി.സി ഹരിദാസിന്‍റെ നേതൃത്വത്തിൽ തൃശൂർ മെഡിക്കൽ കോളജിലെ ഡോക്‌ടറുടെ മൊഴിയാണ് രേഖപ്പെടുത്തിയത്. വിശദമായ പോസ്റ്റ്‌മോർട്ടം റിപ്പോർട്ട് ലഭിച്ച ശേഷം തുടർനടപടികൾ സ്വീകരിക്കുമെന്ന് പൊലീസ് പറഞ്ഞു.

ഡിഎംഒയുടെ നേതൃത്വത്തിൽ ബുധനാഴ്‌ച മരണവുമായി ബന്ധപ്പെട്ട രേഖകൾ തങ്കം ആശുപത്രിയിൽ നിന്ന് ശേഖരിക്കും. റിപ്പോർട്ട് വന്ന ശേഷം ജില്ല മെഡിക്കൽ സംഘം വിശദ പരിശോധന നടത്തും. തത്തമംഗലം ചെമ്പകശേരി ഐശ്വര്യ (25) തിങ്കളാഴ്‌ച (04.07.2022) രാവിലെയാണ് ആശുപത്രിയിൽ വച്ച് മരിച്ചത്, കുഞ്ഞ് ശനിയാഴ്‌ചയാണ്(02.07.2022) മരിച്ചത്.