മലപ്പുറം: മന്ത്രി മുഹമ്മദ് റിയാസിനെതിരെ രൂക്ഷ വിമർശനവുമായി പി.കെ.ബഷീർ എം.എൽ.എ. തന്‍റെ മണ്ഡലത്തിൽ ഉൾപ്പെട്ട മതിൽമുല റോഡുമായി ബന്ധപ്പെട്ട വിഷയത്തിലാണ് പൊതുമരാമത്ത് മന്ത്രി പി.എ.മുഹമ്മദ് റിയാസിനെതിരെ വിമർശനം നടത്തിയത്. എടവണ്ണയിലെ എം.എൽ എ ഓഫിസിൽ നടത്തിയ വാർത്ത സമ്മേളനത്തിലാണ് മന്ത്രിയുടെ നിലപാടിൽ പ്രതിഷേധം അറിയിച്ചത്.
ആറാം ക്ലാസ് വിദ്യാർഥിനിയുടെ കത്തിൽ 5 കോടി രൂപ മതിൽ മൂല റോഡിന് അനുവദിച്ചതായുള്ള മന്ത്രിയുടെ ഫോൺ സന്ദേശത്തിനെതിരെയാണ് എം.എൽ.എ രംഗത്ത് വന്നത്. സിപിഎം പ്രാദേശികനേതൃത്വത്തിന്‍റെ തറ രാഷ്ട്രീയത്തിന് മന്ത്രി നിന്നു കൊടുത്തത് ശരിയല്ലെന്നും എംഎല്‍എ പറഞ്ഞു.
എംഎല്‍എയുടെ ആരോപണം
കഴിഞ്ഞ ജനുവരിയിലെ ബജറ്റിൽ 5 കോടി രൂപ അനുവദിക്കുകയും, തുകയുടെ 20 ശതമാനം ബജറ്റിൽ മാറ്റിവച്ചതുമാണ്. നിയമസഭാ തെരഞ്ഞെടുപ്പുമായി ബന്ധപ്പെട്ട് പെരുമാറ്റ ചട്ടം നിലവിൽ വന്നതുകൊണ്ടാണ് തുടർ നടപടികൾ വൈകിയത്.
കഴിഞ്ഞ മെയ് മാസം എസ്റ്റിമേറ്റായ പദ്ധതിയാണിത്. ജൂൺ 30 ന് എക്സിക്യൂട്ടിവ് എഞ്ചിനീയർ സൂപ്രണ്ട് എഞ്ചിനീയർക്ക് അയച്ചു. ജൂലൈ ഒന്നിന് ഇദ്ദേഹം ചീഫ് എഞ്ചിനീയർക്കും അയച്ചിട്ടുണ്ടെന്നും എം.എൽ.എ പറഞ്ഞു.
ജൂലൈ പത്തിന് ചീഫ് എഞ്ചിനീയർ ഭരണാനുമതി തേടി. പന്ത്രണ്ടാം തീയതിയാണ് ഫോൺ നാടകമെന്നും എം.എൽ.എ പറഞ്ഞു. മന്ത്രിയെ ഫോണിൽ വിളിച്ച് പ്രതിഷേധം അറിയിച്ചിട്ടുണ്ടെന്നും ചൊവ്വാഴ്ച്ച ഈ വിഷയം നിയമസഭയുടെ ശ്രദ്ധയിൽ കൊണ്ടുവരുമെന്നും പി.കെ.ബഷീർ എം.എൽ.എ പറഞ്ഞു.
also read: മലപ്പുറം ജില്ലയെ ടൂറിസം കേന്ദ്രമാക്കുമെന്ന് മന്ത്രി പി.എ മുഹമ്മദ് റിയാസ്
