കോഴിക്കോട്: വാക്കിൽ മാത്രമല്ല പ്രവർത്തനമേഖലയിലും പെൺകരുത്ത് തെളിയിക്കുകയാണ് സിപിഎം. പാർട്ടി കോൺഗ്രസിന് മുന്നോടിയായി നടക്കുന്ന ബ്രാഞ്ച് സമ്മേളനങ്ങൾ പൂർത്തിയായി കൊണ്ടിരിക്കുമ്പോഴാണ് പാർട്ടിയിലെ പെൺ കരുത്ത് വർധിക്കുന്നത്. കോഴിക്കോട് ജില്ലയിലെ 4192 ബ്രാഞ്ചുകളിൽ സമ്മേളനം പൂർത്തിയായപ്പോൾ 345 ബ്രാഞ്ചുകളും നയിക്കുന്നത് വനിതകള്‍.
കഴിഞ്ഞ തവണ 3857 ബ്രാഞ്ചുകളുള്ളപ്പോൾ 111 വനിതകളായിരുന്നു സെക്രട്ടറിമാർ. എന്നാൽ നാല്‌ വർഷത്തിനിടെ ബ്രാഞ്ചുകൾ 4192 ആയി ഉയർന്നപ്പോൾ 234 വനിതകൾ കൂടി കൂടുതൽ സെക്രട്ടറിമാരായി. ജില്ലയിൽ ഏറ്റവുമധികം വനിതകൾ ബ്രാഞ്ച് സെക്രട്ടറിമാരായിട്ടുള്ളത്‌ 47 പേരുള്ള ഫറോക്ക്‌ ഏരിയയിലാണ്‌
നാദാപുരം 13, ഒഞ്ചിയം 13, വടകര 22, പയ്യോളി 18, ബാലുശേരി 23, കക്കോടി 25, താമരശേരി 20, കുന്നുമ്മൽ 24, തിരുവമ്പാടി 21, കുന്നമംഗലം 11, കോഴിക്കോട് സൗത്ത്‌ 27, കോഴിക്കോട് ടൗൺ 14, കോഴിക്കോട് നോർത്ത്‌ 10, കൊയിലാണ്ടി 24, പേരാമ്പ്ര 33 എന്നിങ്ങനെയാണ്‌ ഏരിയ തിരിച്ചുള്ള വനിതാ ബ്രാഞ്ച് സെക്രട്ടറിമാരുടെ എണ്ണം.
സെൻട്രൽ കണ്ണങ്കോടിൽ കുഞ്ഞനന്തന്‍റെ മകൾ
കാസർകോട് ജില്ലയിലെ 1875 ബ്രാഞ്ചുകളിൽ 121 ബ്രാഞ്ചുകളിൽ വനിതകളാണ് സെക്രട്ടറിമാർ. കണ്ണൂരിൽ 3838 ബ്രാഞ്ചുകളിൽ 163 ഇടത്ത് വനിതകളാണ് സെക്രട്ടറിമാർ. ടി.പി ചന്ദ്രശേഖരൻ വധക്കേസിൽ തടവുശിക്ഷ അനുഭവിക്കുന്നതിനിടെ മരിച്ച സിപിഎം പാനൂർ ഏരിയ കമ്മിറ്റി അംഗം പി.കെ കുഞ്ഞനന്തന്‍റെ മകള്‍ പി.കെ ഷബ്‌നയാണ് സെൻട്രൽ കണ്ണങ്കോട് ബ്രാഞ്ചിനെ നയിക്കുക.
വയനാട് ആകെ 724 ബ്രാഞ്ചുകളാണുള്ളത്. ഇതിൽ 44 വനിത സെക്രട്ടറിമാരും. മലപ്പുറത്ത് 2315 ബ്രാഞ്ചുകളിൽ 68 ബ്രാഞ്ചുകളിൽ വനിതകളാണ് സെക്രട്ടറിമാർ. പാലക്കാട് ജില്ലയിൽ ആകെയുള്ള 3063 ബ്രാഞ്ചുകളിൽ 2962 സമ്മേളനങ്ങളാണ് പൂർത്തിയായത്. അതിൽ 137 ഇടത്ത് വനിത നേതൃത്വമാണ്.
ആലപ്പുഴ, കൊല്ലം ജില്ലകളിൽ വനിത സെക്രട്ടറിമാർ 200 ലധികം
തൃശൂരിലെ 2614 ബ്രാഞ്ചിൽ സ്ത്രീ നേതൃനിര 138ൽ എത്തി. എറണാകുളത്തെ 2999 ബ്രാഞ്ച് സമ്മേളനങ്ങളും പൂർത്തിയായെങ്കിലും സെക്രട്ടറിമാരുടെ എണ്ണവും കണക്കും ഇതുവരെ തിട്ടപ്പെട്ടുത്തിയില്ലെന്നാണ് ജില്ല സെക്രട്ടറി അറിയിച്ചത്. ആലപ്പുയിൽ ബ്രാഞ്ച് സമ്മേളനങ്ങൾ പൂർത്തിയായില്ലെങ്കിലും വനിത സെക്രട്ടറിമാരുടെ എണ്ണം 200 കടന്നു. 2727 ബ്രാഞ്ചുകളാണ് ജില്ലയിൽ ആകെയുള്ളത്.
കോട്ടയത്ത് 1579 ബ്രാഞ്ചുകളിൽ 62 ഇടത്ത് സ്ത്രീകളാണ് നേതൃനിരയിൽ. പത്തനംതിട്ട ജില്ലയിൽ 1555 ബ്രാഞ്ചുകളിൽ 116 ആണ് വനിതകൾ സെക്രട്ടറിമാരായ ബ്രാഞ്ചുകൾ. കൊല്ലം ജില്ലയിൽ 3147 ബ്രാഞ്ചുകളിൽ വനിത സെക്രട്ടറിമാരുടെ എണ്ണം 230ൽ എത്തി.
തലസ്ഥാന ജില്ലയിൽ 2507 ബ്രാഞ്ചുകളിൽ 149 ഇടങ്ങളിൽ സ്ത്രീകളാണ് നേതൃനിരയിൽ. പ്രകൃതിക്ഷോഭത്തെ തുടർന്ന് സമ്മേളനങ്ങൾ നിർത്തി വച്ച ഇടുക്കിയിലും സ്ത്രീ പ്രാതിനിധ്യം വർധിക്കാനാണ് സാധ്യത.
ALSO READ : 75ാമത് പുന്നപ്ര വയലാർ രക്തസാക്ഷി വാരാചരണത്തിന് ആരംഭം
പ്രവർത്തകർക്കിടയിൽ വനിത സാന്നിധ്യം വർധിച്ചതിൻ്റെ നേർക്കാഴ്‌ചയാണ് നേതൃനിരയിലെ ഈ മുന്നേറ്റം. തെരഞ്ഞെടുപ്പുകളിൽ സ്ത്രീ സംവരണം വർധിപ്പിച്ചതോടെയാണ് പ്രവർത്തന മണ്ഡലങ്ങളിലും ഇത് പ്രകടമായത്. ഇത് വലിയ പരിധി വരെ അനുകൂലമാക്കിയെടുക്കാൻ സിപിഎമ്മിന് സാധിച്ചു എന്നതാണ് യഥാർഥ്യം.
