കോഴിക്കോട് : തിരുവമ്പാടിയില്‍ അയൽവാസികൾ തമ്മിലുണ്ടായ സംഘർഷത്തിൽ ഒരാൾ കൊല്ലപ്പെട്ടു. ചാലിൽതൊടികയിൽ മോഹൻദാസാണ് മരിച്ചത്. 58 വയസായിരുന്നു.
വഴിത്തര്‍ക്കമാണ് കൊലപാതകത്തിലേക്ക് നയിച്ചതെന്നാണ് പ്രാഥമിക സൂചന. കേസിലെ പ്രതിയെന്ന് സംശയിക്കുന്ന രജീഷ് ഒളിവിലാണ്. ഇയാൾക്കായി തിരുവമ്പാടി പൊലീസ് അന്വേഷണം ആരംഭിച്ചു.
ALSO READ: നടൻ വിവേകിന്‍റെ മരണത്തിൽ അന്വേഷണം പ്രഖ്യാപിച്ച് ദേശീയ മനുഷ്യാവകാശ കമ്മിഷന്‍
ഉച്ചയ്ക്ക് മൂന്നുമണിയോടെയാണ് സംഭവം. മോഹൻദാസിന്‍റെ വീട്ടുമുറ്റത്തുവച്ചാണ് കൊലപാതകം നടന്നത്. കല്ലുകൊണ്ടേറ്റ മർദനമാണ് മരണ കാരണമെന്നാണ് പ്രാഥമിക നിഗമനം.
മൃതദേഹം പോസ്റ്റുമോർട്ടത്തിനായി കോഴിക്കോട് മെഡിക്കൽ കോളജിലേക്ക് മാറ്റി. താമരശ്ശേരി ഡി.വൈ.എസ്.പി അഷറഫ്, തിരുവമ്പാടി ഇൻസ്‌പെക്ടർ സുമിത് എന്നിവരുടെ നേതൃത്വത്തിലാണ് അന്വേഷണം.
