കോട്ടയം: ലോകത്തെയാകെ ഭീതിയിലാഴ്‌ത്തിയ കൊറോണ വൈറസ്‌ ഇന്ന് എല്ലാവരുടെയും പേടി സ്വപ്‌നമാണ്. തനിക്ക് ആ രോഗം വരരുതെ എന്നാണ് എല്ലാവരും പ്രാര്‍ഥിക്കുന്നത്. എന്നാല്‍ കഴിഞ്ഞ 10 വര്‍ഷമായി കൊറോണയ്‌ക്കൊപ്പം ജീവിക്കുന്ന ഒരാളുണ്ട് കോട്ടയം മള്ളുശേരിയില്‍. മത്സ്യത്തൊഴിലാളിയായ ഷൈൻ തോമസ്.
എന്നാല്‍ ഈ കൊറോണ ഉപദ്രവകാരിയല്ല. കാരണം അത് ഒരാളുടെ പേരാണ് ഷൈൻ തോമസിന്‍റെ സ്‌നേഹനിധിയായ ഭാര്യയുടെ പേര്. നാട്ടില്‍ കൊറോണയെ പേടിയില്ലാത്ത ഒരേ ഒരാളാണ് ഷൈൻ. നാട്ടുകാരെല്ലാം ഈ പേര് ഇന്ന് ആഘോഷമാക്കുകയാണ്. എല്ലാ പ്രതികരണനും തമാശയാണെന്ന് മനസിലാക്കി ചെറുചിരി ചുണ്ടില്‍ വിരിയിക്കുകയാണ് ഷൈൻ തോമസിന്‍റെ സ്വന്തം കൊറോണ. എന്നാല്‍ വിഷമമുള്ളത് സ്വന്തം വീടിന്‍റെ കാര്യത്തിലാണ്. ശക്തമായ മഴ പെയ്‌താല്‍ വീടിന്‍റെ മേല്‍ക്കൂര വരെ വെള്ളത്തിനടിയിലാകും. മക്കളോടൊപ്പം സുരക്ഷിത ഭവനത്തിൽ താമസിക്കുയെന്ന സ്വപ്നവുമായാണ് കൊറോണയും കുടുംബവും ജീവിക്കുന്നത്.
