എറണാകുളം: ടോക്കിയോ ഒളിമ്പിക്‌സ് ഹോക്കിയിൽ വെങ്കല മെഡൽ നേടി രാജ്യത്തിന്‍റെ അഭിമാനമായ പി.ആർ ശ്രീജേഷിന് കൊച്ചിയിൽ ഉജ്ജ്വല വരവേൽപ്പ്. വൈകിട്ട് അഞ്ചര മണിയോടെ നെടുമ്പാശ്ശേരി എയർപോർട്ടിൽ വിമാനമിറങ്ങിയ ശ്രീജേഷിന് സംസ്ഥാന സര്‍ക്കാര്‍ ഔദ്യോഗിക സ്വീകരണം നൽകി. കായിക വകുപ്പ് മന്ത്രി വി അബ്‌ദുറഹ്മാന്‍റെ നേതൃത്വത്തിലായിരുന്നു സ്വീകരണം.
എയർപോർട്ടിൽ ശ്രീജേഷിനെ സ്വീകരിക്കാൻ വൻ ജനാവലിയാണ് എത്തിയത്. ശ്രീജേഷ് വിമാനത്താവളത്തിൽ നിന്നും പുറത്തിറങ്ങിയതോടെ കായിക പ്രേമികളുടെ ആവേശം അണപൊട്ടിയൊഴുകി. ആർപ്പുവിളിയും ശ്രീജേഷിന് ജയ് വിളികളുമായി മുഖരിതമായിരുന്നു വിമാനത്താവള പരിസരം. ഏറെ സന്തോഷമുണ്ടെന്നും എല്ലാവർക്കും നന്ദി പറയുന്നതായും ശ്രീജേഷ് പറഞ്ഞു.
വിമാനത്താവളത്തിൽ നിന്നും കാലടി പെരുമ്പാവൂർ പോഞ്ഞാശ്ശേരി വഴി അദ്ദേഹത്തിന്‍റെ ജന്മനാടായ പള്ളിക്കര വരെ ശ്രീജേഷിനെ തുറന്ന വാഹനത്തിൽ ആനയിച്ചു. ജനങ്ങൾ വഴി നീളെ റോഡരികിൽ അണിനിരന്ന് അഭിവാദ്യമർപ്പിച്ചു. കടന്ന് പോകുന്ന ഓരോ പഞ്ചായത്ത് കേന്ദ്രങ്ങളിലും ആവേശകരമായ സ്വീകരണം നൽകി. കായികപ്രേമികളും ജനപ്രതിനിധികളും അടങ്ങുന്ന വാഹനവ്യൂഹം റോഡ് ഷോയിൽ പങ്കെടുത്തു.
Also read: 'പി.ആര്‍ ശ്രീജേഷിന് ഉചിതമായ അംഗീകാരം നല്‍കും': നിയമസഭയില്‍ വിദ്യാഭ്യാസമന്ത്രിയുടെ ഉറപ്പ്
