കണ്ണൂര്‍ : മൃഗസംരക്ഷണ വകുപ്പിന് കീഴില്‍ ജില്ലയിലെ ഏറ്റവും വലിയ കോഴിവളർത്തൽ സ്ഥാപനമായ മുണ്ടയാട് മേഖല കേന്ദ്രം പ്രതിസന്ധിയുടെ നടുവില്‍. പ്രതിമാസം 50,000 കോഴിക്കുഞ്ഞുങ്ങളെ ഉത്പാദിപ്പിക്കുന്ന ഫാമിന്‍റെ അഞ്ചരയേക്കറോളം സ്ഥലമാണ് ദേശീയ പാതക്കായി വിട്ടുനൽകേണ്ടിവരുന്നത്.
75 വർഷം പൂർത്തിയാക്കുന്ന ഫാം നിലവിൽ പത്തേക്കര്‍ സ്ഥലത്താണ് പ്രവര്‍ത്തിക്കുന്നത്. എന്നാൽ ഫാമിന്‍റെ നടുവിലൂടെയാണ് ദേശീയപാതക്കായി സ്ഥലം ഏറ്റെടുത്തിരിക്കുന്നത്. അതിനാൽ ഫാമിന്‍റെ അഞ്ചേക്കര്‍ സ്ഥലവും ദേശീയ പാതക്കായി വിട്ട് നല്‍കേണ്ടി വരും. കൂടാതെ ഫാമിലുള്ള 12 ഷെഡ്ഡുകളിലെ ഭൂരിഭാഗവും നിലനില്‍ക്കുന്നത് ദേശീയപാത കടന്നുപോകുന്ന ഭാഗത്തുമാണ്.
നിലവിൽ ഒൻപത് ഷെഡ്ഡുകള്‍ മാറ്റി സ്ഥാപിച്ചുകഴിഞ്ഞു. മൂന്നെണ്ണം മാറ്റി സ്ഥാപിക്കേണ്ടതായുണ്ട്. ഒരു ലക്ഷം കോഴിക്കുഞ്ഞുങ്ങൾ എന്ന ലക്ഷ്യത്തിലേക്ക് എത്താൻ ഇനിയും 15 ഷെഡ്ഡുകള്‍ കൂടി ആവശ്യമാണ്. എന്നാൽ ഇതിന് സ്ഥലം കണ്ടെത്താൻ ഇതുവരെ കഴിഞ്ഞിട്ടില്ല.
ദേശീയ പാതയുടെ വരവോടെ മുട്ടകള്‍ വിരിയിച്ചെടുക്കുന്ന കേന്ദ്രം അപ്പുറത്തും, ഫാമും ഷെഡ്ഡും ഇപ്പുറത്തുമാവും. ഇതോടെ കോഴികള്‍ക്ക് തീറ്റ കൊടുക്കുന്നത് വരെ ബുദ്ധിമുട്ടിലാകുകയും ചെയ്യും.
ALSO READ: തലശേരിയില്‍ ബി‌ജെപി പ്രവര്‍ത്തകന് വെട്ടേറ്റു ; പിന്നില്‍ സിപിഎമ്മെന്ന് ആരോപണം
28 ഏക്കര്‍ സ്ഥലത്ത് നിന്നും 10 ഏക്കറായി ചുരുങ്ങിയ ഫാമിൽ നിന്നാണ് അഞ്ചേക്കർ കൂടി പോകുന്നത്. മുണ്ടയാട് ഇന്‍ഡോര്‍ സ്‌റ്റേഡിയത്തിനായി ഫാമിന്‍റെ 16 ഏക്കര്‍ സ്ഥലം ഏറ്റെടുത്തിരുന്നു. ഇതിന് പകരമായി 15.75 നല്‍കുമെന്ന് കരാറുമുണ്ടായിരുന്നു.
പരിയാരത്ത് സ്ഥലം അനുവദിക്കാമെന്നായിരുന്നു ധാരണ. എന്നാല്‍ ഇപ്പോഴും അത് പൂര്‍ണമായിട്ടില്ല. നിലവിലെ പ്രതിസന്ധിക്ക് ഉടന്‍ പരിഹാരം കാണണമെന്നും അനുവദിക്കാമെന്ന് ഉറപ്പുനല്‍കിയ സ്ഥലം ലഭ്യമാക്കണമെന്നും അധികൃതര്‍ ആവശ്യപ്പെടുന്നു.
