ആലപ്പുഴ: കടുത്ത വിഭാഗീയത നിലനിൽക്കുന്ന ആലപ്പുഴയിൽ സിപിഎം ജില്ല സെക്രട്ടേറിയറ്റ് രൂപീകരിച്ചു. ഏറെ ചർച്ചകൾക്കും സമവായങ്ങൾക്കുമൊടുവിൽ രൂപീകരിച്ച ജില്ല സെക്രട്ടേറിയറ്റില്‍ സജി ചെറിയാൻ പക്ഷത്തിനാണ് മുൻതൂക്കം. 12 അംഗ സെക്രട്ടേറിയറ്റിനെയാണ് സംസ്ഥാന സെക്രട്ടറി കോടിയേരി ബാലകൃഷ്‌ണന്‍ കൂടി പങ്കെടുത്ത ജില്ല കമ്മിറ്റി യോഗം രൂപം നൽകിയത്.
സെക്രട്ടേറിയറ്റിൽ എച്ച് സലാം എംഎൽഎയും ജില്ലയിലെ മുതിർന്ന വനിത നേതാവ് ജി രാജമ്മയും പുതുമുഖങ്ങളായി ഉൾപ്പെട്ടപ്പോൾ തരം താഴ്ത്തപെട്ട കെ രാഘവന്‍റെ തിരിച്ചുവരവ് അപ്രതീക്ഷിതമായി. പടനിലം സ്‌കൂള്‍ കോഴ ആരോപണത്തിൽ പാർട്ടി അന്വേഷണ കമ്മിഷന്‍റെ റിപ്പോര്‍ട്ടിനെ തുടർന്നാണ് മുൻപ് രാഘവനെ തരംതാഴ്ത്തിയത്. എന്നാൽ രാഘവന്‍ കുറ്റകാരൻ അല്ലെന്നും മികച്ച പാർട്ടി കേഡറാണെന്നും ബോധ്യപ്പെട്ടതിനെ തുടർന്നാണ് തെരഞ്ഞെടുത്തതെന്ന് ജില്ല സെക്രട്ടറി ആര്‍ നാസര്‍ പറഞ്ഞു.
ഇവരെ കൂടാതെ കയർ കോർപ്പറേഷൻ ചെയർമാൻ ജി വേണുഗോപാൽ, പിന്നാക്ക വികസന കോർപ്പറേഷൻ ചെയർമാർ അഡ്വ. കെ പ്രസാദ്, സിഐടിയു സംസ്ഥാന സെക്രട്ടറി പി.പി ചിത്തരഞ്ജൻ എംഎൽഎ, കായംകുളത്തെ മുതിർന്ന നേതാവ് കെ.എച്ച് ബാബുജാൻ, മുതിർന്ന നേതാക്കളായ ജി ഹരിശങ്കർ, എ മഹേന്ദ്രൻ, എം സത്യപാലൻ, മന്ത്രി സജി ചെറിയാന്‍റെ പ്രൈവറ്റ് സെക്രട്ടറി അഡ്വ. മനു സി പുളിക്കൽ എന്നിവരാണ് സെക്രട്ടേറിയറ്റ് അംഗങ്ങൾ.
അതേസമയം, സംസ്ഥാനത്തെ ഏക ഇടത് ലോക്‌സഭ അംഗമായ അഡ്വ. എ.എം ആരിഫിനെ ഇത്തവണയും ജില്ല സെക്രട്ടേറിയറ്റിൽ ഉൾപ്പെടുത്തിയില്ല എന്നതും ശ്രദ്ധേയമാണ്. എന്നാൽ ഇതേക്കുറിച്ച് പ്രതികരിക്കാൻ സിപിഎം ജില്ല നേതൃത്വം തയ്യാറായില്ല.
