ദുബായ് : തമിഴ്‌നാട്ടിൽ നിക്ഷേപത്തിനൊരുങ്ങി ലുലു ഗ്രൂപ്പ്. ഷോപ്പിംഗ് മാളുകൾ, ഹൈപ്പർമാർക്കറ്റുകൾ, ഭക്ഷ്യ സംസ്‌കരണ, ലോജിസ്റ്റിക് സെന്‍റർ എന്നിവ സ്ഥാപിക്കുന്നതിനായി 3500 കോടി രൂപ സംസ്ഥാനത്ത് നിക്ഷേപിക്കുമെന്ന് ലുലു ഗ്രൂപ്പ് പ്രഖ്യാപിച്ചു. ഇതിനായി തമിഴ്‌നാട് ഇൻഡസ്ട്രിയൽ ഗൈഡൻസ് ആൻഡ് എക്‌സ്‌പോർട്ട് പ്രമോഷൻ ബ്യൂറോയുടെ മാനേജിങ് ഡയറക്‌ടറും സിഇഒയുമായ പൂജ കുൽക്കർണിയും ലുലു ഗ്രൂപ്പിന്‍റെ എക്‌സിക്യുട്ടീവ് ഡയറക്‌ടർ അഷ്‌റഫ് അലി എംഎയും തമ്മിൽ അബുദബിയിൽ ധാരണാപത്രം ഒപ്പുവച്ചു.
ഇതുപ്രകാരം 2024ഓടെ ചെന്നൈയിൽ ഷോപ്പിങ് മാൾ ആരംഭിക്കും. സംസ്ഥാനത്തെ ലുലു ഗ്രൂപ്പിന്‍റെ ആദ്യത്തെ ഷോപ്പിങ് മാൾ ആണിത്. കോയമ്പത്തൂരിലെ ലക്ഷ്‌മി മിൽസ് കോമ്പൗണ്ടിൽ ഈ വർഷാവസാനത്തോടെ ആദ്യത്തെ ഹൈപ്പർ മാർക്കറ്റ് തുറക്കുമെന്ന് പ്രതീക്ഷിക്കുന്നു. നിലവിൽ യുഎഇ സന്ദർശനം നടത്തുന്ന മുഖ്യമന്ത്രി എംകെ സ്റ്റാലിന്‍റെ സാന്നിധ്യത്തിലാണ് ധാരണാപത്രം ഒപ്പുവച്ചത്.
മിഡിൽ ഈസ്റ്റേൺ രാജ്യങ്ങളിലേക്കുള്ള കയറ്റുമതിക്കായി കാർഷികോത്പന്നങ്ങള്‍ സംഭരിക്കുന്നതിനും സംസ്‌കരിക്കുന്നതിനുമായി ലുലു ഗ്രൂപ്പ് ഭക്ഷ്യ സംസ്‌കരണ, ലോജിസ്റ്റിക്‌സ് കേന്ദ്രങ്ങൾ സ്ഥാപിക്കുമെന്ന് ധാരണാപത്രത്തിൽ പറയുന്നു. അബുദബി ചേംബർ ഓഫ് കൊമേഴ്‌സിൽ നടന്ന ചടങ്ങിൽ വ്യവസായ മന്ത്രി തങ്കം തേനരസു, ലുലു ഗ്രൂപ്പ് ചെയർമാൻ എം.എ യൂസഫലി, മറ്റ് ഉദ്യോഗസ്ഥർ എന്നിവരും പങ്കെടുത്തു.
തമിഴ്‌നാടിന്‍റെ മികച്ച അടിസ്ഥാന സൗകര്യങ്ങളും നിക്ഷേപകർക്കുള്ള പിന്തുണയും പ്രശംസിച്ച യൂസഫലി ചെന്നൈയിൽ മാത്രമല്ല കോയമ്പത്തൂർ, സേലം, മധുരൈ, തിരുച്ചിറപ്പള്ളി തുടങ്ങിയ രണ്ടാംനിര നഗരങ്ങളിലും നിക്ഷേപ സാധ്യതകൾ അന്വേഷിക്കുകയാണെന്ന് അറിയിച്ചു. സ്ഥലങ്ങളും അനുബന്ധ നടപടിക്രമങ്ങളും അന്തിമമാക്കുന്നതിനായി ലുലുവിൽ നിന്നുള്ള ഉന്നതതല സംഘം ഉടൻ സംസ്ഥാനം സന്ദർശിക്കും.
അടുത്ത മൂന്ന് വർഷത്തിനുള്ളിൽ തമിഴ് യുവജനങ്ങൾക്ക് നേരിട്ടും അല്ലാതെയും 15,000 തൊഴിലവസരങ്ങൾ സൃഷ്‌ടിക്കുകയാണ് ലക്ഷ്യമെന്ന് യൂസഫലി. നിലവിൽ രാജ്യത്ത് കൊച്ചിയിലും തിരുവനന്തപുരത്തും ബെംഗളൂരുവിലുമായി മൂന്ന് മാളുകളാണ് ഗ്രൂപ്പിനുള്ളത്. നാലാമത്തെ ഷോപ്പിങ് മാൾ മെയ്‌ അവസാനത്തോടെ ലഖ്‌നൗവിൽ തുറക്കുമെന്ന് പ്രതീക്ഷിക്കുന്നു.
മിഡിൽ ഈസ്റ്റ്, ഈജിപ്‌ത്, ഇന്തോനേഷ്യ, മലേഷ്യ, ഇന്ത്യ എന്നിവിടങ്ങളിലായി നിലവിൽ ലുലു ഗ്രൂപ്പിന് 225ലധികം ഹൈപ്പർമാർക്കറ്റുകളും ഷോപ്പിങ് മാളുകളുമാണുള്ളത്. ഇവിടങ്ങളിൽ ആഗോളതലത്തിൽ 57,000-ത്തിലധികം ആളുകൾക്ക് ജോലി ചെയ്യുന്നു.
