വയനാട്: സുൽത്താൻ ബത്തേരിക്കടുത്ത് മാഞ്ഞാടിയിലെ മാംസ സംസ്കരണ ഫാക്ടറിയുമായി ബന്ധപ്പെട്ട പരാതിയിൽ സബ് കലക്ടർ പരിശോധന നടത്തി. ഫാക്ടറിയിൽ നിന്നുള്ള വായു മലിനീകരണത്തിനെതിരെ നാട്ടുകാർ ജില്ലാ കലക്ടർക്ക് പരാതി നൽകിയിരുന്നു. ആറ് വർഷം മുമ്പാണ് ബ്രഹ്മഗിരി ഡെവലപ്മെന്‍റ് സൊസൈറ്റി മാഞ്ഞാടിയിൽ മാംസ സംസ്കരണ ഫാക്ടറി തുടങ്ങിയത്. ഒരു വർഷം മുമ്പ് മുതലാണ് ഫാക്ടറിയിൽ നിന്നുള്ള ദുർഗന്ധം അസഹനീയമായത് എന്ന് നാട്ടുകാർ പറയുന്നു.
കടുത്ത ദുർഗന്ധം കാരണം ഒരാഴ്ച മുൻപ് രാത്രി നാട്ടുകാർ ഫാക്ടറി മുന്നിൽ പ്രതിഷേധം നടത്തുകയും പൊലീസ് ലാത്തി വീശുകയും ചെയ്തിരുന്നു. നാൽപതോളം വീടുകൾ ഫാക്ടറിക്ക് സമീപമുണ്ട്. ഡിഎംഒ ഉൾപ്പെടെയുള്ള ആരോഗ്യ വകുപ്പ് ഉദ്യോഗസ്ഥരും മലിനീകരണ നിയന്ത്രണ ബോർഡ് ഉദ്യോഗസ്ഥരും സബ് കലക്‌ടർക്കൊപ്പം ഫാക്ടറിയിൽ പരിശോധനക്കെത്തി. സബ് കലക്ടർ 10 ദിവസത്തിനകം കലക്ടർക്ക് റിപ്പോർട്ട് സമർപ്പിക്കും.
