ന്യൂഡല്‍ഹി: രാജ്യതലസ്ഥാനത്ത് മൂന്നാം ഘട്ട് കൊവിഡ് വ്യാപനം നിയന്ത്രണത്തിലായെന്ന് മുഖ്യമന്ത്രി അരവിന്ദ് കെജ്‌രിവാള്‍. ശനിയാഴ്ച 1133 കേസുകളാണ് സംസ്ഥാനത്ത് റിപ്പോര്‍ട്ട് ചെയ്തത്. ടെസ്റ്റ് പോസിറ്റിവിറ്റി നിരക്ക് 1.55 ശതമാനം മാത്രമാണെന്നും അദ്ദേഹം കൂട്ടിച്ചേര്‍ത്തു.
ജൂണ്‍മാസത്തിലാണ് സംസ്ഥാനത്ത് ആദ്യ ഘട്ട കൊവിഡ് വ്യാപനമുണ്ടായത്. ഇതോടെ സംസ്ഥാനത്ത് രോഗികളുടെ എണ്ണവും മരണ നിരക്കും ഉയര്‍ന്നിരുന്നു. ഓഗസ്റ്റ് സെപ്തംബര്‍ മാസത്തിലാണ് രണ്ടാാം വ്യാപനം നടന്നത്. ഒക്ടോബര്‍ മുതല്‍ മൂന്നാം ഘട്ട വ്യാപനമുണ്ടായി. എന്നാല്‍ ഇന്ന് തങ്ങള്‍ കൊവിഡുമായുള്ള യുദ്ധത്തില്‍ വിജയിച്ചു. ഇപ്പോള്‍ രോഗം നിയന്ത്രണത്തിലായെന്നും കെജ്‌രിവാള്‍ അറിയിച്ചു. ന്യൂയോര്‍ക്ക് പോലുള്ള നഗരങ്ങളില്‍ ആളുകള്‍ ചികിത്സ ലഭിക്കാതെ ബുദ്ധിമുട്ടിയിരുന്നു. എന്നാല്‍ രോഗം ഏറ്റവും ശക്തമായ സമയത്തും ഡല്‍ഹിയില്‍ 7000 ബെഡുകള്‍ ഒഴിഞ്ഞ് കിടക്കുകയായിരുന്നു.
മികച്ച മാനേജ്മെന്‍റ് സംവിധാനമാണ് ഇതിന് കാരണമെന്നും അദ്ദേഹം പറഞ്ഞു. മറ്റ് സംസ്ഥാനങ്ങളെ അപേക്ഷിച്ച് ജനപെരുപ്പവും രോഗികളുടെ എണ്ണവും സംസ്ഥാനത്ത് കൂടുതലായിരുന്നു എന്നും അദ്ദേഹം പറഞ്ഞു. ഹോം ഐസൊലേഷന്‍ പ്ലാസ്മ തെറാപ്പി പോലുള്ള സംവിധാനങ്ങള്‍ ഉപയോഗിച്ചാണ് തങ്ങള്‍ രോഗത്തെ നേരിട്ടതെന്നും അദ്ദേഹം കൂട്ടിച്ചേര്‍ത്തു. കൊവിഡ് പ്രതിരോധ പ്രവര്‍ത്തനങ്ങളില്‍ പങ്കെടുക്കുന്നവര്‍ മരണപ്പെട്ടാല്‍ കുടുംബത്തിന് ഒരു കോടി രൂപ നല്‍കുമെന്ന് പ്രഖ്യാപിച്ച ആദ്യ സംസ്ഥാനം ഡല്‍ഹിയാണെന്നും എഎപി വക്താവ് പ്രതികരിച്ചു.
നവംബറിൽ സജീവമായ കേസുകളുടെ എണ്ണം 45,000 ആയി ഉയർന്നുവെന്നും നഗരത്തിൽ ഇപ്പോൾ 12,000 സജീവ കേസുകളുണ്ടെന്നും കെജ്‌രിവാള്‍ അറിയിച്ചു. ഡൽഹിയിൽ 96.5 ശതമാനമാണ് രോഗമുക്തി നിരക്ക്. നവംബർ 19ന് 131 മരണമാണ് റിപ്പോര്‍ട്ട് ചെയ്തത്. എന്നാലത് 37 ആയി കുറഞ്ഞതായും അദ്ദേഹം കൂട്ടിച്ചേര്‍ത്തു.
