കണ്ണൂർ: സി.ഒ.ടി നസീര്‍ വധശ്രമ കേസില്‍ കുറ്റം സമ്മതിച്ച് പൊട്ടിയന്‍ സന്തോഷ് പൊലീസിന് മൊഴി നല്‍കി. ബുധനാഴ്ച കോടതി പൊലീസ് കസ്റ്റഡിയില്‍ വിട്ട് നല്‍കിയ പ്രതിയെ ചോദ്യം ചെയ്തപ്പോഴാണ് പ്രതി കുറ്റസമ്മതം നടത്തിയത്. അക്രമികളെ സംഘടിപ്പിച്ചതും നസീറിനെ അക്രമിച്ചതും തന്റെ നിർദ്ദേശപ്രകാരമാണെന്ന് അന്വേഷണ സംഘത്തോട് സന്തോഷ് പറഞ്ഞു. എന്നാല്‍ തനിക്ക് പിന്നിലാരെന്ന് വെളിപ്പെടുത്താന്‍ സന്തോഷ് തയ്യാറായില്ല. ബി.ജെ.പി തലശ്ശേരി മണ്ഡലം പ്രസിഡണ്ട് എം.പി സുമേഷിനെ വധിക്കാന്‍ ശ്രമിച്ച കേസില്‍ പത്ത് വര്‍ഷത്തെ തടവിന് ശിക്ഷിക്കപ്പെട്ട സന്തോഷിനെ ആറ് ദിവസത്തേക്കാണ് കോടതി പൊലീസ് കസ്റ്റഡിയില്‍ വിട്ട് നല്‍കിയിരിക്കുന്നത്. വ്യാഴാഴ്ച പോലീസ് സ്‌റ്റേഷനില്‍ വെച്ച് തന്നെയാണ് പ്രതിയെ അന്വേഷണ ഉദ്യോഗസ്ഥനായ സി.ഐ വി.കെ വിശ്വംഭരന്റെ നേതൃത്വത്തിലുള്ള സംഘം ചോദ്യം ചെയ്തത്.
സി.ഒ.ടി നസീര്‍ വധശ്രമ കേസില്‍ കുറ്റം സമ്മതിച്ച് പൊട്ടിയന്‍ സന്തോഷ് പൊലീസിന് മൊഴി നല്‍കി നസീര്‍ വധശ്രമ കേസുമായി ബന്ധപ്പെട്ട് പിടിയിലായ ആറ് പേരുൾപ്പടെ 11 പേരാണ് പൊലീസ് കോടതിയില്‍ നല്‍കിയ പ്രതിപട്ടികയിലുളളത്. മറ്റ് പ്രതികള്‍ക്കായുള്ള തെരച്ചില്‍ നടക്കുകയാണ്. പൊലീസിന് പിടികൊടുക്കാതെ കോടതിയില്‍ നേരിട്ട് ഹാജരാകാനാണ് ഇവരുടെ ലക്ഷ്യമെന്നാണ് സൂചന. തലശ്ശേരി ഡിവൈഎസ്പിയായി ചുമതലയേറ്റ കെ.വി വേണുഗോപാലിന്റെ നേതൃത്വത്തിലാണ് അന്വേഷണം പുരോഗമിക്കുന്നത്. വരും ദിവസങ്ങളിൽ ഗുഢാലോചന കേസിലെ മറ്റ് പ്രതികളെ കണ്ടെത്താന്‍ സാധിക്കുമെന്ന വിശ്വാസത്തിലാണ് പൊലീസ്.മെയ് 18ന് രാത്രിയാണ് തലശ്ശേരി കായ്യത്ത് റോഡിലെ കനക് റസിഡന്‍സിക്ക് മുന്‍ വശം വെച്ച് വടകര ലോകസഭാ മണ്ഡലത്തിലെ സ്വതന്ത്ര സ്ഥാനാര്‍ത്ഥിയും സി.പി.എം വിമതനുമായ സി.ഒ.ടി നസീര്‍ അക്രമിക്കപ്പെട്ടത്. സംഭവത്തിന് പിന്നില്‍ എ.എന്‍ ഷംസീര്‍ എംഎല്‍എയാണെന്ന് അക്രമത്തിന് ഇരയായ നസീര്‍ പൊലീസിന് രണ്ടു തവണ മൊഴി നല്‍കിയിരുന്നു. തലശ്ശേരി സ്‌റ്റേഡിയത്തിന്റെ പുനഃനിര്‍മ്മാണവുമായ് ബന്ധപ്പെട്ട അഴിമതി ചോദ്യം ചെയ്തതുള്‍പ്പെടെയുള്ള വിരോധമാണ് ഷംസീറിനെന്നും ഇതേ തുടര്‍ന്നാണ് തനിക്ക് നേരെ അക്രമം നടത്തിയതെന്നും നസീര്‍ വ്യക്തമാക്കിയിരുന്നു.
