ന്യൂഡല്‍ഹി: അറ്റോര്‍ണി ജനറല്‍ കെ കെ വേണുഗോപാല്‍ രാജിക്ക് ഒരുങ്ങുന്നുവെന്ന് സൂചന. സ്വകാര്യ വാര്‍ത്ത ഏജന്‍സിയായ 'ദി വയര്‍ ' ആണ് വാര്‍ത്ത പുറത്തുവിട്ടത്. ചീഫ് ജസ്റ്റിസ് രഞ്ജന്‍ ഗൊഗോയ്ക്കെതിരെ ഉയര്‍ന്നു വന്ന ലൈംഗികാരോപണകേസില്‍ കേന്ദ്ര സര്‍ക്കാരും അറ്റോര്‍ണി ജനറലും തമ്മിലുണ്ടായ അഭിപ്രായ ഭിന്നതയെ തുടര്‍ന്നാണ് രാജിക്ക് ഒരുങ്ങുന്നതെന്നാണ് സൂചന.
ഗൊഗോയ്ക്കെതിരെയുള്ള പരാതി അന്വേഷിക്കുന്ന ആഭ്യന്തരസമിതിയിലേക്ക് പുറത്തു നിന്നുള്ള അംഗങ്ങളെയും ഉള്‍പ്പെടുത്തണമെന്നാവശ്യപ്പെട്ടു കൊണ്ട് എ ജി കഴിഞ്ഞയാഴ്ച സുപ്രീം കോടതിയിലെ ജഡ്ജിമാര്‍ക്ക് കത്ത് അയച്ചിരുന്നു. എന്നാല്‍ എ ജി യുടെ ഇടപെടലില്‍ വിയോജിപ്പ് പ്രകടിപ്പിച്ച സര്‍ക്കാര്‍, അദ്ദേഹത്തിന്‍റെ വ്യക്തിപരമായ അഭിപ്രായമാണ് കത്തിലുള്ളതെന്ന് കോടതിയെ അറിയിക്കാന്‍ എ ജി യെ നിര്‍ബന്ധിപ്പിക്കുകയായിരുന്നു. ഇതിനെ തുടര്‍ന്ന് അദ്ദേഹം വീണ്ടുമൊരു കത്ത് ജഡ്ജിമാര്‍ക്ക് എഴുതുകയും ഈ കത്തില്‍ തന്‍റെ അഭിപ്രായം വ്യക്തിപരമാണെന്നും ഇതിന് സര്‍ക്കാരുമായി ബന്ധമില്ലെന്നും വ്യക്തമാക്കുകയും ചെയ്തു.
ഗൗരവതരമായ കേസില്‍ എ ജി യും കേന്ദ്ര സര്‍ക്കാരും തമ്മിലുണ്ടായ അഭിപ്രായ ഭിന്നതയാണ് എ ജി യെ രാജിക്ക് പ്രേരിപ്പിക്കുന്നതെന്ന് ഏജന്‍സി റിപ്പോര്‍ട്ട് ചെയ്യുന്നു.
