മുംബൈ: മഹാരാഷ്ട്ര മുംബൈയില്‍ ശ്രദ്ധ മോഡല്‍ കൊലപാതകം. മുംബൈയില്‍ യുവതിയെ ക്രൂരമായി കൊലപ്പെടുത്തിയ പങ്കാളി പൊലീസ് പിടിയിലായി. 32കാരിയായ സരസ്വതി വൈദ്യ എന്ന യുവതിയെ കൊലപ്പെടുത്തുകയും മൃതദേഹം കഷണങ്ങളാക്കി വെട്ടിനുറുക്കുകയും ചെയ്‌ത സംഭവത്തില്‍ മനോജ് സഹാനി എന്ന 56 കാരനാണ് പൊലീസ് പിടിയിലായത്.
ഇയാളെ ബുധനാഴ്‌ച വൈകുന്നേരം കസ്റ്റഡിയിലെടുത്തതായി പൊലീസ് ഉദ്യോഗസ്ഥർ അറിയിച്ചു. മീര ഭയന്ദർ ഫ്ലൈ ഓവറിന് തൊട്ടടുത്തുള്ള മീര റോഡ് ഏരിയയിലെ ആകാശഗംഗ കെട്ടിടത്തിലെ വാടക ഫ്ലാറ്റിൽ, ഫ്ലാറ്റ് നമ്പർ 704 ലാണ് ക്രൂരമായ സംഭവം നടന്നത്. സരസ്വതി വൈദ്യയോടൊപ്പം കഴിഞ്ഞ മൂന്ന് വർഷമായി ഈ ഫ്ലാറ്റിൽ താമസിച്ചു വരികയായിരുന്നു മനോജ് സഹാനി. പ്രാഥമികാന്വേഷണത്തിൽ യുവതി ക്രൂരമായി കൊലചെയ്യപ്പെട്ടതാണെന്ന് വ്യക്തമായതായി പൊലീസ് അറിയിച്ചു.
ഫ്ലാറ്റിൽ നിന്ന് ദുർഗന്ധം വമിച്ചതിന് പിന്നാലെ പൊലീസ് എത്തി നടത്തിയ പരിശോധയിലാണ് ക്രൂര കൃത്യം പുറത്തറിഞ്ഞത്. ഫ്ലാറ്റിൽ നിന്ന് ദുർഗന്ധം വമിക്കുന്നതായി ശ്രദ്ധയില്‍പ്പെട്ട കെട്ടിടത്തിലെ താമസക്കാരിൽ ഒരാളാണ് നയാനഗർ പൊലീസ് സ്റ്റേഷനില്‍ ബുധനാഴ്‌ച വിവരമറിയിച്ചത്.
മീര റോഡ് പ്രദേശത്തെ കെട്ടിടത്തില്‍ നിന്ന് കഷണങ്ങളാക്കിയ നിലയില്‍ സ്‌ത്രീയുടെ മൃതദേഹം കണ്ടെത്തിയതായി മുംബൈ ഡെപ്യൂട്ടി പൊലീസ് കമ്മിഷണർ (ഡിസിപി) ജയന്ത് ബജ്ബലെ സ്ഥിരീകരിച്ചിട്ടുണ്ട്. മനോജ് സഹാനിയും സരസ്വതി വൈദ്യയും ലിവ്-ഇൻ റിലേഷൻഷിപ്പിൽ ആയിരുന്നെന്നും പ്രാഥമിക അന്വേഷണത്തിൽ യുവതിയെ വെട്ടിക്കൊലപ്പെടുത്തിയതായി കണ്ടെത്തിയതായും ഡിസിപി അറിയിച്ചു. സംഭവത്തില്‍ വിശദമായ അന്വേഷണം പുരോഗമിക്കുകയാണെന്നും അദ്ദേഹം അറിയിച്ചു.
അതേസമയം പൊലീസ് എത്തിയ വേളയില്‍ പ്രതി ഫ്ലാറ്റില്‍ ഉണ്ടായിരുന്നില്ല. പിന്നീട് ചില ആവശ്യങ്ങൾക്കായി വീട്ടിൽ തിരിച്ചെത്തിയ ഇയാളെ പൊലീസ് തടഞ്ഞുവയ്ക്കു‌കയും കസ്റ്റഡിയില്‍ എടുക്കുകയുമായിരുന്നു. ഞായറാഴ്‌ച (ജൂൺ 4) അർധരാത്രിയിലാണ് മഹാരാഷ്‌ട്രയെ ഒന്നടങ്കം നടുക്കിയ കൊലപാതകം നടന്നത്.
മനോജിനെ സംശയിച്ച സരസ്വതി ഇയാളുമായി വഴക്കിട്ടിരുന്നു. പിന്നാലെ മനോജ് സരസ്വതിയെ ക്രൂരമായി കൊലപ്പെടുത്തുകയായിരുന്നെന്ന് പൊലീസ് പറയുന്നു. കൊലപാതകത്തിന് ശേഷം കഴിഞ്ഞ മൂന്ന് ദിവസമായി ഇയാൾ മൃതദേഹം വീട്ടിൽ സൂക്ഷിച്ചിരിക്കുകയായിരുന്നു.
മൃതദേഹം മൂന്ന് കഷണങ്ങളാക്കിയെന്നും ഇതിൽ ശരീരത്തിന്‍റെ ചില ഭാഗങ്ങൾ വേവിച്ചതായുമുള്ള ഞെട്ടിക്കുന്ന വിവരങ്ങളാണ് ഇപ്പോൾ പുറത്തുവരുന്നത്. അതേസമയം മൃതദേഹത്തിന്‍റെ ചില അവശിഷ്‌ടങ്ങൾ കണ്ടെത്താനായിട്ടില്ല. കാണാതായ ശരീര ഭാഗങ്ങൾക്കായി പൊലീസ് തെരച്ചിൽ ഊർജിതമാക്കി.
നിലവില്‍ സരസ്വതിയുടെ മൃതദേഹം പണ്ഡിറ്റ് ഭീംസെൻ ജോഷി ആശുപത്രിയിൽ സൂക്ഷിച്ചിരിക്കുകയാണ്. പ്രതി മനോജ് സഹാനിയെ പൊലീസ് അറസ്റ്റ് ചെയ്‌തിട്ടുണ്ടെങ്കിലും മൃതദേഹത്തിന്‍റെ കാണാതായ ഭാഗങ്ങൾ കണ്ടെത്തുക പൊലീസിന് വെല്ലുവിളിയാകും.
ഡല്‍ഹിയിലെ ശ്രദ്ധ വാക്കർ കൊലപാതകത്തിന്‍റെ നടുക്കം മാറുന്നതിന് മുൻപാണ് സമാനമായ രീതിയില്‍ മറ്റൊരു കൊലപാതകം രാജ്യത്ത് അരങ്ങേറിയിരിക്കുന്നത്. 2022 മെയ് 18 നാണ് ഡൽഹിയിലെ ഛത്തർപൂർ പ്രദേശത്ത് വച്ച് അഫ്‌താബ് പൂനവാല തന്‍റെ ലിവ് ഇൻ പങ്കാളിയായ ശ്രദ്ധ വാക്കറെ കൊലപ്പെടുത്തി മൃതദേഹം 35 കഷണങ്ങളാക്കിയത്. ശേഷം ശരീരഭാഗങ്ങൾ നഗരത്തിന്‍റെ പല ഭാഗങ്ങളിൽ ഉപേക്ഷിക്കുകയായിരുന്നു.
