ചെന്നൈ: വിജയ് സേതുപതി ജാതീയാധിക്ഷേപം നടത്തിയെന്ന് ആരോപിച്ച് കോടതിയിൽ കേസ് ഫയൽ ചെയ്‌ത് സെയ്‌താപേട്ട് സ്വദേശി മഹാഗാന്ധി. ചികിത്സക്കായി പോകുമ്പോൾ ബെംഗളൂരു വിമാനത്താവളത്തിൽ വച്ചാണ് സംഭവം നടന്നതെന്ന് ഹർജിക്കാരൻ പറയുന്നു. വിമാനത്താവളത്തിൽ വച്ച് വിജയ് സേതുപതിയെ താൻ കണ്ടിരുന്നു.
സിനിമ മേഖലയിലെ അദ്ദേഹത്തിന്‍റെ നേട്ടങ്ങളെ അഭിനന്ദിച്ചുവെങ്കിലും അഭിനന്ദനം നിരസിക്കുകയാണുണ്ടായത്. തുടർന്ന് ജാതീയധിക്ഷേപം നടത്തുകയും താരത്തിന്‍റെ മാനേജർ ജോൺസൺ തന്നെ ആക്രമിക്കുകയും ചെയ്‌തുവെന്നും മഹാ ഗാന്ധി നൽകിയ ഹർജിയിൽ പറയുന്നു.
ആക്രമണത്തിൽ കേൾവി ശക്തിക്ക് തകരാർ സംഭവിച്ചു. എന്നാൽ അടുത്ത ദിവസം താരം ആക്രമിക്കപ്പെട്ടുവെന്ന് വ്യാജ വാർത്ത പ്രചരിപ്പിക്കുകയാണുണ്ടായതെന്നും ഹർജിക്കാരൻ വ്യക്തമാക്കി.
കഴിഞ്ഞ മാസം ബെംഗളുരു വിമാനത്താവളത്തിലെത്തിയ വിജയ് സേതുപതിയും സംഘവും ആക്രമിക്കപ്പെട്ടിരുന്നു. ആക്രമണത്തിന്‍റെ വീഡിയോ സമൂഹ മാധ്യമങ്ങളിൽ വൈറലായിരുന്നു.
