ലഖ്‌നൗ: ഹിന്ദി ഹൃദയ ഭൂമിയില്‍ തേരോട്ടം തുടര്‍ന്ന് ബിജെപി. നിയമസഭ തെരഞ്ഞെടുപ്പിന്‍റെ വോട്ടെണ്ണെല്‍ പുരോഗമിക്കവെ മികച്ച ഭൂരിപക്ഷം നിലനിര്‍ത്തി ലീഡിലേക്കുയരാന്‍ ബിജെപിക്കായി. 1996ന് ശേഷം ആദ്യമായാണ് ഒരു പാര്‍ട്ടി ഭരണത്തുടര്‍ച്ച നേടുന്നത്. ബിജെപിയുടെ യുപി ഭരണ ചരിത്രത്തില്‍ ഇതാദ്യം. യോഗി വീണ്ടും മുഖ്യമന്ത്രിയാവുമ്പോള്‍ യുപി അടക്കി വാണിരുന്ന ബിഎസ്പിയും കോണ്‍ഗ്രസും ചിത്രത്തിലെങ്ങുമില്ലാത്തതു പോലെ രണ്ടക്കം തികച്ചില്ല.
കര്‍ഷക പ്രക്ഷോഭവും സ്‌ത്രീ സുരക്ഷയുമടക്കമുള്ള പ്രശ്‌നങ്ങള്‍ ബിജെപിക്ക് തിരിച്ചടി നല്‍കുന്നമെന്ന് വിലയിരുത്തപ്പെട്ട പ്രദേശങ്ങളിലെല്ലാം അടിപതറാതെയാണ് കാവി പാര്‍ട്ടിയുടെ കുതിപ്പ്. പ്രക്ഷോഭകരായ കർഷകര്‍ക്കെതിരെ വെടി വയ്പ്പും വധശ്രമങ്ങളുമടക്കമുണ്ടായ ലഖിംപുർ ഖേരി ജില്ലയിലെ എട്ടില്‍ അഞ്ച് മണ്ഡലങ്ങളിലും ബിജെപി മൂന്നിലാണ്. കര്‍ഷക സമരം ശക്തമായിരുന്ന ഫിറോസ്‌ബാദ് ജില്ലയിലെ അഞ്ചില്‍ നാല് മണ്ഡലങ്ങളിലും ബിജെപിക്ക് ലീഡുണ്ട്. സംസ്ഥാനത്തെ സ്‌ത്രീ സുരക്ഷയുമായി ബന്ധപ്പെട്ട് ഏറെ ചര്‍ച്ച ചെയ്യപ്പെട്ട ഹത്രസ്, ഉന്നാവ് ജില്ലകളിലെ എട്ടില്‍ മുഴുന്‍ സീറ്റുകളിലും ബിജെപി മുന്നിട്ട് നില്‍ക്കുകയാണ്.
വികസന പ്രശ്‌നങ്ങളും, ജാതി സമവാക്യങ്ങളിലും മങ്ങളേല്‍ക്കുമെന്ന് കണക്ക് കൂട്ടപ്പെട്ട കിഴക്കന്‍ യുപിയിലെ അയോധ്യ, അമേഠി, ചിത്രകൂട്, റായ്ബറേലി, ശ്രാവസ്തി തുടങ്ങിയ സ്ഥലങ്ങളിലും ബിജെപി മുന്നേറുകയാണ്. രജപുത്ര സമുദായത്തെ പ്രോത്സാഹിപ്പിക്കുന്ന യോഗിയുടെ നടപടി, മുന്നോക്ക സംവരണം തുടങ്ങിയവ പ്രദേശത്ത് ഭൂരിപക്ഷമുള്ള ഒബിസി, പട്ടിക വിഭാഗക്കാര്‍ക്കിടയില്‍ നിന്നും ബിജെപിയെ അകറ്റിയെന്നായിരുന്നു വിലയിരുത്തപ്പെട്ടിരുന്നത്.
ആദിത്യനാഥിന്‍റെ മണ്ഡലമായ ഗോരഖ്പൂരിൽ പാർട്ടി സ്ഥാപിച്ച പോസ്റ്ററുകളിലും ബാനറുകളിലും അദ്ദേഹത്തിന്‍റെ ഫോട്ടോകള്‍ പതിക്കാന്‍ പോലും ബിജെപി ഭയപ്പെട്ടിരുന്നു. എന്നാല്‍ തിരിച്ചടികളില്ലാതെ മിക്കയിടങ്ങളിലും മുന്നേറ്റം നടത്താന്‍ ബിജെപിക്കായിട്ടുണ്ട്. അമേഠിയിലെ മൂന്ന് സിറ്റുകളില്‍ മൂന്നാം സ്ഥാനത്താണെന്നത് കോണ്‍ഗ്രസിന് കനത്ത നാണക്കേടുകൂടിയാവും.
നിലവില്‍ 298 സീറ്റുകളിലാണ് ബിജെപി മുന്നേറ്റം നടത്തുന്നത്. 105 സീറ്റുമായി സമാജ്‌വാദി പാര്‍ട്ടി രണ്ടാം സ്ഥാനത്തുണ്ട്. ബിഎസ്‌പി രണ്ട് സീറ്റിലും കോണ്‍ഗ്രസ് നാല് സീറ്റിലും ലീഡ് ചെയ്യുന്നു.
