ന്യൂഡല്‍ഹി : ഒരേസമയം രണ്ട് മുഴുവന്‍ സമയ കോഴ്‌സുകള്‍ പിന്തുടരാന്‍ വിദ്യാര്‍ഥികളെ അനുവദിക്കുമെന്ന് യുജിസി. രാജ്യത്തുടനീളം ലഭ്യമായ എല്ലാ പ്രോഗ്രാമുകൾക്കും പുതിയ മാർഗനിർദേശങ്ങൾ ബാധകമായിരിക്കും. ഏപ്രിൽ 13-ന് യുജിസിയുടെ ഔദ്യോഗിക വെബ്‌സൈറ്റിൽ ഇത് സംബന്ധിച്ച മാർഗ നിർദേശങ്ങൾ പ്രസിദ്ധീകരിക്കും.
ഇതോടെ വിദ്യാർഥികള്‍ക്ക് ഒരേസമയം രണ്ട് ബിരുദങ്ങളോ അക്കാദമിക് പ്രോഗ്രാമുകളോ പിന്തുടരാം. (ഡിപ്ലോമ -ബിരുദ കോമ്പിനേഷന്‍, രണ്ട് മാസ്റ്റർ പ്രോഗ്രാമുകള്‍ അല്ലെങ്കിൽ രണ്ട് ബാച്ചിലേഴ്‌സ് പ്രോഗ്രാമുകള്‍). ഒരു വിദ്യാർഥിക്ക് പിജിയോടൊപ്പം യുജി കോഴ്‌സ് ചെയ്യാനും സാധിക്കും. എന്നാല്‍ രണ്ട് പ്രോഗ്രാമുകളുടെയും ക്ലാസ് സമയം ക്രമീകരിക്കേണ്ടതുണ്ട്.
പുതിയ മാർഗ്ഗനിർദേശത്തിന്‍റെ അടിസ്ഥാനത്തില്‍ വിദ്യാര്‍ഥികള്‍ക്ക് സയൻസ്, സോഷ്യൽ സയൻസ്, ആര്‍ട്‌സ്‌, ഹ്യൂമാനിറ്റീസ് തുടങ്ങിയ വൈവിധ്യമാർന്ന വിഷയങ്ങളില്‍ രണ്ട് ഡിഗ്രി പ്രോഗ്രാമുകൾ പിന്തുടരാൻ കഴിയും.
എന്നാല്‍ ഈ മാർഗ നിർദേശങ്ങൾ സ്വീകരിക്കുന്നത് സർവകലാശാലകൾക്ക് ഐച്ഛികമാണ്. ഓരോ പ്രോഗ്രാമുകൾക്കുമുള്ള യോഗ്യതാ മാനദണ്ഡങ്ങൾ മാറ്റമില്ലാതെ തുടരും, നിലവിലുള്ള യുജിസി, യൂണിവേഴ്‌സിറ്റി മാനദണ്ഡങ്ങൾ അടിസ്ഥാനമാക്കിയാവും വ്യത്യസ്‌ത പ്രോഗ്രാമുകളില്‍ പ്രവേശനം നല്‍കുക.
പുതിയ ദേശീയ വിദ്യാഭ്യാസ നയത്തിന് അനുസൃതമായാണ് ഒരേസമയം രണ്ട് കോഴ്‌സുകള്‍ പിന്തുടരാൻ വിദ്യാർഥികളെ പ്രാപ്തരാക്കുന്ന മാർഗനിർദേശങ്ങൾ പുറപ്പെടുവിക്കാൻ തീരുമാനിച്ചതെന്ന് യുജിസി ചെയര്‍മാന്‍ എം. ജഗദേഷ് കുമാര്‍ പറഞ്ഞു. മാർച്ച് 31ന് നടന്ന അവസാന കമ്മിഷൻ യോഗത്തിലാണ് ഇത് സംബന്ധിച്ച തീരുമാനമെടുത്തത്.
ഫിസിക്കൽ മോഡലിന്‍റെയും ഓൺലൈൻ ഫോമിന്‍റെയും സംയോജനം വിദ്യാർഥികൾക്ക് ഒന്നിലധികം കഴിവുകൾ നേടുന്നതിന് കൂടുതൽ സ്വാതന്ത്ര്യം നൽകുന്നതിന് ഉപയോഗിക്കണമെന്നും അദ്ദേഹം പറഞ്ഞു.
