അഹമ്മദാബാദ് (ഗുജറാത്ത്) : നരേന്ദ്ര മോദി ക്രിക്കറ്റ് സ്റ്റേഡിയത്തിനുനേരെ ആക്രമണം നടത്തുമെന്ന് ഭീഷണി സന്ദേശം അയച്ചയാളെ ക്രൈംബ്രാഞ്ച് അറസ്റ്റ് ചെയ്‌തു (Threat To Narendra Modi Stadium). മധ്യപ്രദേശ് സ്വദേശിയായ ഇയാളെ രാജ്‌കോട്ടില്‍ നിന്നാണ് ക്രൈംബ്രാഞ്ച് പിടികൂടിയത്. ഇന്ത്യയില്‍ നടക്കുന്ന ക്രിക്കറ്റ് ലോകകപ്പിന്‍റെ വേദികളില്‍ ഒന്നാണ് അഹമ്മദാബാദിലെ നരേന്ദ്ര മോദി സ്റ്റേഡിയം (Man arrested for threatening to attack Narendra Modi Stadium).
ഒക്‌ടോബര്‍ 14ന് ഇന്ത്യ-പാക് മത്സരം നടക്കാനിരിക്കെയാണ് സ്റ്റേഡിയത്തിന് നേരെ ആക്രമണം നടത്തുമെന്ന് അറിയിച്ച് കൊണ്ടുള്ള ഇ മെയില്‍ ലഭിച്ചത് (Narendra Modi Stadium in Ahmedabad). സ്റ്റേഡിയത്തില്‍ സ്‌ഫോടനം നടത്തും എന്നായിരുന്നു സന്ദേശം. ഇ മെയിലില്‍ അയച്ച വ്യക്തിയുടെ പേരുണ്ടെന്നും എന്നാല്‍ അയാള്‍ക്ക് ക്രിമിനല്‍ പശ്ചാത്തലം ഇല്ലെന്നും പൊലീസ് പറഞ്ഞു. നിലവില്‍ രാജ്‌കോട്ട് മേഖലയില്‍ താമസിച്ച് വരികയാണ് ഇയാള്‍.
ഭീഷണി ലഭിച്ചത് കണക്കിലെടുത്ത് ഒക്‌ടോബര്‍ 14ന് നടക്കുന്ന ഇന്ത്യ-പാക് മത്സരത്തിന് മുന്നോടിയായി നരേന്ദ്ര മോദി സ്റ്റേഡിയത്തില്‍ സുരക്ഷ വര്‍ധിപ്പിച്ചിട്ടുണ്ട്. കൂടാതെ മത്സര ദിനത്തില്‍ ഗുജറാത്ത് പൊലീസ്, എന്‍എസ്‌ജി, ആര്‍എഎഫ്, ഹോം ഗാര്‍ഡ് തുടങ്ങിയ ഏജന്‍സികളില്‍ നിന്ന് 11,000ല്‍ അധികം ഉദ്യോഗസ്ഥരെ സ്റ്റേഡിയത്തില്‍ വിന്യസിക്കുമെന്ന് ഉദ്യോഗസ്ഥര്‍ അറിയിച്ചു.
നേരത്തെ ലോകകപ്പ് വേദികളില്‍ ഒന്നായ ധര്‍മ്മശാല ക്രിക്കറ്റ് സ്റ്റേഡിയത്തിന് സമീപം ഖലിസ്ഥാന്‍ അനുകൂല മുദ്രാവാക്യങ്ങള്‍ പ്രത്യക്ഷപ്പെട്ടത് ഏറെ ആശങ്ക ഉണ്ടാക്കിയിരുന്നു. ഒക്‌ടോബര്‍ നാലിനാണ് സ്റ്റേഡിയത്തിന് സമീപമുള്ള ജലസേചന വകുപ്പ് കെട്ടിടത്തിന്‍റെ മതിലില്‍ ഖലിസ്ഥാന്‍ സിന്ദാബാദ് എന്ന മുദ്രാവാക്യം കണ്ടത്. സംഭവം അറിഞ്ഞെത്തിയ പൊലീസ് ഉടന്‍ തന്നെ മതിലില്‍ പുതിയ പെയിന്‍റ് അടിക്കുകയായിരുന്നു.
ധര്‍മ്മശാല സ്റ്റേഡിയത്തില്‍ ലോകകപ്പ് ക്രിക്കറ്റ് മത്സരം നടക്കാന്‍ ദിവസങ്ങള്‍ മാത്രം ബാക്കി നില്‍ക്കെയായിരുന്നു സംഭവം. സമീപത്തെ സിസിടിവി അടക്കം പരിശോധിച്ച് പൊലീസ് പ്രതിക്കായി വലവിരിച്ചു. എന്നാല്‍ ഖലിസ്ഥാന്‍ മുദ്രാവാക്യം സ്റ്റേഡിയത്തിന് സമീപം പതിപ്പിച്ചതിന്‍റെ ഉത്തരവാദിത്തം നിരോധിത ഭീകര സംഘടനയായ സിഖ് ഫോര്‍ ജസ്റ്റിസ് ഏറ്റെടുക്കുകയായിരുന്നു. സമാനമായ രീതിയില്‍ കഴിഞ്ഞ മാസം ഡല്‍ഹിയുടെ പലഭാഗങ്ങളിലും സിഖ് ഫോര്‍ ജസ്റ്റിസിന്‍റെ പേരില്‍ ഖലിസ്ഥാന്‍ അനുകൂല ചുവരെഴുത്തുകള്‍ കണ്ടിരുന്നു.
